لاسباب يطول شرحها التحقت في حياتي بثلاث جامعات
جايز ده من حسن حظي
يمكن عشان تباين الفئات اللي قابلتها في كل جامعة
الاولى كانت خاصة -يعني بمصاريف عالية وخاصة لفشلة الثانوية العامة- ومش عيب اني اعترف اني فشلت في الثانوية العامة
خصوصا اني مش معترف بمجاميع الثانوية العامة اصلا
نرجع لموضوعنا
قابلت فيها ناس غريبة جدا
واذا اخدنا في الاعتبار ان ده اول احتكاك ليا بالدراسة الجامعة هانلاقي اني كنت دخل في عالم غريب
قابلت نوعيات سفلة من البشر
ونوعيات جدعة
وكدابين ومؤدبين وناس فاكرة صوتها حلو وناس غاوية تمثيل وناس غاوية تعليق
بفضل ربنا تفوقت وخرجت من الجامعة الخاصة لجامعة حكومة
لما بسال نفسي دلوقتي لسه بكلم كام واحد من اللي عرفتهم في الجامعة الخاصة دي
بلاقيهم تلاتة بالعدد
واحد منهم بكلمه على مضض اساسا
في الجامعة ام بلاش
عرفت كتير اوي
بكلم منهم كام واحد لحد دلوقتي
عشرة اتناشر بالكتير
نصهم مش فرحان اني بكلمهم
بس لما نبص لفرق العدد
نكتشف ايه؟
نكتشف اني في الاول كنت مش بعرف اعرف الناس الصح
عشان كده مابيتبقاش منهم كتير
مع اني في الجامعة الاولانية دي عرفت تقريبا اربع تخماس الدفعة معرفة قوية مش سلام سلام يعني
بس ارجع واقول
الذبد بيذهب
واللي بينفع الناس يظل راسخ في الارض
النهارده هاحكيلكم حكاية من ذكرياتي الجامعية التانية
كنا في مشروع التخرج
مطلوب منك تعمل تيم وورك بين اربعة وعشرين طالب
منهم اللي مابيعرفش يعمل حاجه واللي عامل نفسه مايعرفش
واللي بيستهبل واللي رامي عليك الحمل
مرة من المرات
اكتشفت ان الاربعة وعشرين طالب
مافيش اتنين منهم طايقين بعض
اي اتنين يقفوا مع بعض
يشتموا في بقية المشروع
وانا اولهم
انا اول اللي بيشتموا مش اول اللي بيتشتموا
والنتيجه الطبيعية
ماحدش عايز يشتغل في المشروع قبل ما التلاته وعشرين طالب التنين ما يشتغلوا
تفتق ذهني عن فكرة عبقرية -او انا كنت فاكرها كده- هي اني انظم رحلة
ايه رايكم يا جماعة نطلع رحله
يمكن نلطف الجو
طبعا كانت اول خناقة هي نروح فين
لكم ان تتخيلوا
تاني خناقة نروح ازاي
تلات خناقة نروح امتى
رابع خناقة نجيب مرافقين ولا لا
خامس خناقة نروح فين-كنا نسينا اننا اتخانقناها في الاول-
سادس خناقة لما بعض الناس اتاخرت
سابع خناقة كانت في الطريق مع بعض المتسولين
تامن خناقة لما وصلنا نعمل ايه
تاسع خناقة نعمل كلنا حاجه واحده ولا كل واحد يعمل اللي هو عايزة
بعد كده مابقتش اعد
في لحظة صفا
قعدنا نلعب لعبة الازازة
جه دوري اسال بنت زميلتنا سؤال
سالتها سؤال بريء جدا
وردت على مضض وهي بتبصلي بقرف
ولما جه دورها تسالني
سالتني سؤال غريب جدا
لؤي انت ليه قليل الزوق؟؟؟
سؤال صعب واجابته اصعب
قلتلها اصلي مالاقتش زوق كفاية
المهم عملنا في اليوم ده حوالي مية وخمستاشر خناقة
وجاهدا حاولت اصلح الموقف لحد مارجعنا كلنا مبسوطين والحمد لله
تاني يوم رحت الكلية
صباح الخير
......................
صباح الخير
...................
سلام عليكم
.....................
الله الله الله
هو فيه ايه
اكتشفت ان كل واحد عايز يقتل الباقي
ليه؟؟؟
قعدت يومين اتحرى لغاية ما عرفت
كل الناس راحت الكلية تاني يوم
لقوا الكلية كلها معاها تفاصيل الرحلة
بالاضافة الى بعض التفاصيل المشينة لبعض البنات اللي كانوا معانا
الله الله الله
احنا كدا دخلنا في منطقة اعراض
طبعا كل واحد فاكر ان فلان او فلان هو اللي قال الكلام ده
وكله بينكر
حادثة غريبة
بعد شهر عرفنا مين اللي قال وطلع واحد بره المشروع اساسا بس معانا في الكلية وكان جاي مع صاحبه
وبعد سنتين عرفت ليه البنت سالتني السؤال ده
ببساطة لانها فهمت سؤالي غلط
فهمته على ضوء ان في حد كان قايل عليها كلام وافتكرتني بنبط عليها
طيب انا بحكي الموضوع الطويل ده كله ليه؟؟؟؟
عشان النقط التالية
1 لو بتعمل مشروع تخرج اعمله لوحدك
2 لو اضطريت تعمله مع حد اختاره بعنايه
3 لو ماخترتوش بعناية حاول ماتكرهوش بعض
4 لو كرهتوا بعض حاول ماتطلعوش رحله
5 لو طلعتوا رحلة حاول ماتلعبش لعبة الازازة
6 لو لعبت لعبة الازازة حاول تكون قبلها على علم بكل الاشاعات اللي طالعة على اعضاء مشروعك
7 لو ماكنتش عارفها كلها حاول ماتسالش اسئلة مالهاش لازمة
8 لو سالت اسئلة مالهاش لازمة حاول ماتكونش قليل الزوق
9 لو طلعت قليل الزوق حاول تروح مصحة نفسية تتعالج
10 لو قابلك في كليتك حد وحش ماتنظمش حياتك عليه لانها كلها كام سنه وتشيله من حياتك اصلا
11 لو نظمت حياتك عليه هاتلاقي الف غيره بوظولك حياتك دي تاني
12 حاول تنتقي اصحابك بعناية
13 حاول تفكر في مستقبلك وماتبصش تحت رجليك
14 لو وقعت في مشكلة حاول تحلها مش تورط نفسك فيها اكتر
15 يوجد في مصر جامعات خاصة
16 يوجد في مصر جامعات حكومية
17 يوجد في مصر جامعات لسه مانعرفش عنها حاجه
18 مصر فيها اكتر من جامعة على الاقل تلات جامعات
19 الجامعات فيها الغث وفيها الثمين
20 حاول تركز مع الكويسين لان دول اللي هايفضلوا معاك
21 حافظ على بسمة في حياتك ولكن حافظ على عقلك اكثر ولا تتشتت مع الاسماء المتعددة
22 اذا ادعى شخص ما انه مصطفى من الله بعد النبي صلى الله عليه وسلم فلا تكترث لما يقول
23 المرء على دين خليله فلينظر احدكم من يخالل
24 تحلى بالصبر والايمان فهو المعين لك في حياتك
