ام زلومة --اعلان

قريبا.....

Apple

شوفت في احصائيات المدونة
حد بيدخل عليها من براوسر سفاري
بما يعني انه في الغالب بيستخدم اوبريتينج سيستم غير الويندوز
وماشين غير البي سي
الراجل ده جديد
انا ماعرفوش
في حد تاني في دمنهور
بيتابع المدونة باهتمام
ماعرفش هو هو اللي بيستخدم ابل ولا لا
بس ياريت يقولي برده هو بيدخل المدونة ليه
غريبة يعني الاقي ناس ماعرفهاش بتخش المدونة

خطة

باختصار شديد
دي العربية اللي نفسي اجيبها
وهاجيبها ان شاء الله

ودي الحتة اللي نفسي اسكن فيها
وهاسكن فيها ان شاء الله


ممكن اجيب الشقة بس وابقي اقعد فيها اوقات معينة
بس هاجيبها ان شاء الله

طيب وانتوا مالكم؟؟؟
انتوا مش موجودين اصلا
ساعات بحس اني عندي مرض نفسي ما ليه علاقة بالناس اللي بنكلمها وهي مش موجوده
بس ده لا يمنع اني بالرغم من مرضي ده لو كان عندي يعني
بالرغم من كده
هاجيب الشقة والعربية دول ان شاء الله

تاريخ

7 اغسطس 2006
قبل صلاة الظهر

للذكري

ايه الاساتوك ده

يستيقظ احمد كالعاده في السادسة واالنصف
يتناول اصطباحته اليومية من المكيفات المتمثلة في كوباية الشاي بحليب
يرتدي ثيابه ويذهب لعمله
فهو موظف في السجل المدني
بعد حوالي نصف الساعة من العمل
وجد حسين زميله يزغده برفق
ايه في ايه ياحسين
شوفت الخبر ده
(بصوت خفيض)
بيقولك قسيس في كنيسة تنبأ بظهور العذرا النهارده
طب واحنا مالنا يا اخي
هما بيستهبلولنا فيها ولا ايه
طيب ما بالمره بقي يشوفولنا بكره الجو هايبقي حر ولا برد
يابن الناس احنا مالنا ليهم دينهم ولينا دينا
شوية شوية يقولولك العذرا بتقولنا لازم حد منا يترشح للرياسه
طيب يابني ماهم ممكن يترشحوا للرياسة من غير ماتقولهم
لا طبعا الدستور بينص على ان مصر دولة مسلمة وبالتالي ماينفعش يترأسها مسيحي
بص انا مافهمش في الحكاية دي اوي بس عموما
لو الدستور بيسمح يبقي هما مش محناجين العذرا تقولهم حاجه ممكن يترشحوا كلهم ولو مابيسمحش يبقي مش هاتفرق معاك حاجه تقولهم ولا ماتقولوهمش

لا يا عم ماهم بكره يقولولك حقوق الاقليات وبتاع ويقوموا مغيرين الدستور

يابني اولا دول زي مانت قلت اقليات
يعني لو حد رشح نفسه منهم مش هايكسب
ثانيا يعني هي جت على اللعبه دي في الدستور
ولا انت ماشي اوي يعني بالحكم الاسلامي
دا الكفار ياخي ماكانش عندهم طابور عيش

يعني انت فاكر كان حد في دول يستجري يتكلم ايام الرئيس المؤمن الشهيد انور السادات؟؟؟

يابني دينهم وهما احرار عندهم قناعاتهم وماطالبوكش انك تقتنع

بقولك مستحيل حاجة تحصل زي دي بالتنبأ ولازم الكنيسة تشوف صحة الكلام دة
وبعدين اشمعنى بتظهر فى مصر بس هى باقى الدول غضبانه عليها ولا ايه مابتظرهش فى الفاتيكان لية ربنا يهديهم

ومين قالك انها انهم مش بيقولوا انها بتظهر في اماكن تانية كتير
في الهيصة اللي فاتت دي انا سمعت ان في قرية في مش عارف فين بيقولوا ان الظهور هناك شبه اسبوعي

ايه ده ايه ده ايه ده ؟؟؟ انت مصدق ولا ايه؟؟؟


ياسيدي مش مصدق انها بتظهر لكن ده لا يتعارض مع اني مصدق انهم مصدقين انها بتظهر


طيب مين اللي قال اصلا ان السيدة مريم هي اللي في الصورة دي اساسا

نظام بقي البيضة ولا الفرخة
يعني تفتكر انهم مصدقين انها بتظهر ومش مصدقين ان هي دي اللي في الصورة؟؟
اكيد عندهم قناعتهم

بس بس
والله عال
تلاقي القسيس ده معاه مكنة الليزر عشان يطلع هو العذرا وشكله ما يبقاش وحش
ال ايه تنبأ بالظهور
ايه الاساتوك ده يا عم


ينتهي اليوم

بعد مرور عدة اشهر
يحصل احمد على منحة ليكمل دراساته العليا في الولايات المتحده الامريكية
يطير فرحا
في اول صلاة للجمعة له في بلاد العم سام
يتحدث الخطيب عن رحلة الاسراء والمعراج

بعد الصلاة
يخرج احمد فيستوقفه احد الماره
ويساله عن محتوى الخطبة فقد سمع منها شيئ بسيط اثناء عبوره امام المسجد
ففي امريكا لا توجد مكبرات صوت خارج المساجد
يخبر احمد انه استرعى انتباهه بعض الحديث من الخطبه ويود ان يفهم الموضوع الذي تحدثت عنه الخطبه
يجدها احمد فرصه طيبة في بلاد الحرية ان يحدث شخصا اخر عن الاسلام بدون امن دولة ولا فتنه طائفية

يظل حوالي النصف ساعة يحدث الامريكي عن قصة الاسراء والمعراج
والامريكي يستمع باهتمام
وفي النهايه قاله له
بقى سافر من السعودية لفلسطين وطلع السبع سموات ورجع لقى سريره دافي كمان؟؟
بتقولوا عليها ايه عندكم في مصر؟؟؟
اه
ايه الاساتوك ده؟؟



للمراجعة
برجاء مراجعة الرابط هنا

تاني يوم كاس الامم الافريقية

كالعاده
عندي حاجات عايز اكتبها بس مش هاعرف
عشان شوية اعتبارات اجتماعية
فالحل
اجي هنا الف وادور حوالين الموضوع
عشان ابقي فضفضت وفي نفس الوقت انتوا ماتفهموش حاجه
ماهو خلونا صرحا
انا بكتب يعني لكام واحد؟؟
انتوا فاكرين نفسكم كام واحد اساسا
لو راجعتوا الاحصائيات
هاتلاقوا انكم خمسة ستة
اصحابي اساسا
الباقي اللي بيجي ده بيجي صدفه
بيجي عشان انا كتبت عنوان زي ده في يوم زي ده
يبقي نتكلم بصراحه بقي
انا بكتب لنفسي
واللي بيتابعوني
من الاخر يعني
بيتابعوني مجاملة
وانا اصلي مش فيلسوف بتكلم ولا حتى لما بتكلم بشرح حاجه
ولا حتى بترجم حاجه
حتى المدونة مافيهاش اي سرفس
لا درجات الحرارة ولا اسعار العملات ولا حتى ساعة
ماهو برده لامؤاخذه يعني
انت مش داخل عند حلاق هاتلاقي عنده مجلات
عايز الحاجات دي روح لحد بيقدمها
يبقي الخلاصة
انا بكتب لنفسي
طيب ليه بكتب على النت
اعتبروها نوع من الاركيفنج
اعتبروها حتى نوع من الحفاظ على ادميتي
انا اصلي لو كتبت وانا متاكد ان ماحدش هايقراه
كنت قليت ادبي
وشتمت
وقلت كلام ابيح ابيح يعني
كنت بقيت حد تاني غير اللي اي حد فيكم يعرفه
يمكن لو عملت كده ابقي بفضفض وما بكبتش في نفسي والحاجات دي
بس
بصراحه
انا خايف الاقي نفسي وحش اوي كده
انا لسه بحب نفسي ومش عايز اكرها
كفايا كده النهارده