الجمعة، يوليو 02، 2010

حادثة



وانا في الشارع النهارده حصلت حادثة
عربية خبطت واحده بتعدي الشارع
قدامي بالظبط تقريبا
الحمد لله الناس اتلمت
الحمد لله ناس فضلت معاها لحد ماقامت وبقت كويسة
المهم
الخبطة عدت على خير الحمد لله
خلوني اوصلفلكم مشهد صغير
اولا
الست في اواخر الاربيعينيات
كانت بتعدي الشارع عشان تروح لجوزها اللي بالصدفة في المستشفى
لبسها بسيط جدا
طرحة جلابية
ماعهاش شنطة فيها ميكب او موبايل
معاها كيس صغير من اللي بيصروا انهم يسموه بوك
وشنطة بلاستيك فيها حاجه تتاكل

شوفوا معايا بقى ايه اللي حصل
الست العربية خبطتها من هنا وهي وقعت طبعا
الولد كان فرمل قبلها بشوية عشان كده الخبطة ماكانتش جامده اوي يعني
حتى عربيته ماحصلهاش حاجه
الست بمجرد ما وقعت قامت وقفت
ودي اول ملحوظة
مابصتش للي خبطها ولا حتى عرفت لون العربية
ودي تاني ملحوظة
توجهت مباشرة للرصيف ودي تالت ملحوظة
الرصيف اللي كانت رايحاله مش اللي كانت جاية منه
ودي رابع ملحوظة وبالمناسبة هي ملحوظة خطيرة من وجهه نظري
وبعدين ركنت جنب اول عمود على الرصيف وخبت وشها في ايديها
ودي خامس ملحوظة
ماردتش على حد فينا غير بعد فتره ودي سادس ملحوظة
وكانت اول كلمة قالتها بعد قدر الله وماشاء فعل

انا والله مش غلطانة
ودي بالصدفة سابع واخطر ملحوظة على الاطلاق
علموا الناس تعتذر عن غلطهم هما
الست خايفة لتتعاقب بسبب انها عدت الشارع فالعربية خبطتها والبيه صاحب العربية مزاجه اتعكر
طبعا اللي كان سايق العربية ماكانش بيه
كان شاب عادي
فضل واقف معاها لحد اخر لحظة الحقيقة

بس تفضل سابع ملحوظة قدام عيني

احترم اللي يعتذر عن غلطه
لكن عن غلط غيره فيه؟؟؟ّ!!!!!!
دي حاجه انا بعتبرها احد منتجات الحكومة