الى المجلس الاعلى للقوات المسلحة اوعى العلم يقع على الارض

بعد اللي حصل الجمعة خمسة وعشرين فبراير الفين وحداشر
انا كمواطن مصري
اسمي لؤي احمد عاطف عبد المحسن محمد صقر
مصري وابن مصري وابن مصرية
وابويا وامي ولاد مصريين
باختصار
انا واحد من اللي البلد دي بتاعتهم
مش هاقولكم انا من الثوار
انا اقل من كده بكتير اوي
ومش هاقولكم حتى اني بساند الثورة
انا برده اقل من كده بكتير
انا مصري حسيت يمكن لاول مرة اني اقدر ارفع راسي فوق عشان انا مصري
ففرحت
يعني ممكن تقولوا عليا حد من المستفيدين من الثورة
وبعد اللي حصل من الجيش
بلاش الجيش
خليني اقول بعض العناصر في الجيش
حلو كده؟؟
بعد اللي حصل ده
انا محتاج شوية حاجات
اولا اعتذار باسرع وقت ممكن
وده الشهاده لله حصل
حصل حتى قبل ما اعرف اللي حصل

ثانيا
بعيدا عن كل مطالب الثوار من ان حكومة شفيق ترحل
والدستور يبقي مؤقت
والافراج عن المعتقلين السياسين
وكل الطلبات دي
بعيدا حتى عن اعتراضي على ان اللي يترشح للرأسة مايبقاش سبق له الحصول على جنسية اخرى
ولا حتى مراته تكون مش مصرية
ولا امه
يعني لو ابني اتولد غصب عنه في امريكا لكن اتربى وعاش في مصر
مايبقاش منتمي لمصر
بغض النظر عن الكلام ده كله
انا عايز اي حد مد ايده على مصري وهو ينتمي للقوات المسلحة يحاكم محاكمة علنية
علنية
علنية
وعلى الهوا مباشرة
ومافيهاش تأجيلاات
وكلها ورا بعض
يعني القاضي بيشتغل في العادي تمن ساعات شغل
يبقي المحاكمة تبتدي النهارده
من الصبح
لحد ما التمن ساعات يخلصوا
الناس تروح عشان بكره نكمل
لحد ما القضية تخلص
من غير تأجيل
ولا حتى جمعة وسبت
عشان الجيش المفروض انه هو اللي ماسك البلد
لما واحد من الجيش يمد ايده على مواطن مصري
يبقي ده اول واحد الجيش يحاسبة
وده بقي لامؤاخذة لا في ايديه ملفات
ولا ماعليهوش اثبات
ولا كل الكلام الكتير ده اللي مش عارفين نمشي شفيق علشانه
ثالثا
المحاكمة دي تبقي في اقرب وقت
لانها لحد ما تحصل وتخلص
هافضل واقف قدام كل ظابط جيش اشوفه
رافع علم بلدي
وواقف مستني اشوف هايعمل ايه
ولو حاول يمد ايده عليا
هاقوله
اوعى العلم يقع على الارض
لو ضربني ووقعني على الارض وانا شايل العلم
مش عارف هاعمل ايه
هاحس بايه
يمكن اموت من الحسرة

بس لو مت
هاموت من الحسرة عشان مت من الحسرة
اصل الشهيد اللي مات من الداخلية
مات عشان كرامة  كل مصري ترجعله

انا بقي لو مت من الجيش
هابقي بموت عشان كرامة المصري تروح منه تاني

يعني هو مات عشان حاجه وانا هاموت عشان ولا حاجه

عشان كده
ايها المجلس الاعلى للقوات المسلحة

اوعى العلم يقع على الارض

The Revolution...season two

للأسف
الجزء التاني هايبقي ضد الجيش
وهايفضل لحد ما الشعب ياخد كل حقوقه وتحقق كل مطالبه
كلها دي تتضمن طلبات الشعب الحالية والمستقبلية

ازاي تثور ومامعكش انترنت.... الحقيبة الكاملة للثوار التكنولوجيين

لو اقتنعت باهمية الكلام ده ماتوقفوش عندك

اهداء لجمع الاخوة العرب اللي لم يمروا بعد بتجربة قطع الانترنت

في شوية طرق جربناها في مصر وقت الثورة

وزي ما الاخوة التوانسة ربنا يباركلهم نصحونا بالاسبراي الاسود على ازاز عربيات الامن المركزي وكان للنصيحة دي مفعول مؤثر جدا
احب ان مصر تشارك اخواتها العرب في بعض النصائح الثورية
خصوصا اني مالحقتش ليبيا قبل الفيس ما يتقفل
ياريت اللي يعرف حد هناك ينقله المقال ده

اولا
الحلول البسيطة جدا لمعرفة الاحداث من غير فيس بوك ولا تويتر وبرده تعرفها من فيس بوك وتويتر

الحل ببساطة هو جوجل ريال تايم

خد اللينك ده
http://www.google.com.eg/realtime?hl=en&tab=wY

او خش على جوجل عادي جدا ودوس الوقت الفعلي او ريال تايم من فوق
واكتب مثلا اسم بلدك
ده هايجيبلك كل التويتس والستاتس اللي بتتكتب في فيس بوك وتويتر وليها علاقة باسم بلدك بمجرد ما تتكتب
يعني هاتبقي عارف الاخبار اول باول


طبعا الطريقة دي تنفع في اي وقت ودي مفيدة جدا

الطريقة التانية للناس اللي فاهمين شوية في النت
طبعا البروكسيهات
لو مش عارف يعني ايه بروكسي
هو عبارة عن زي ماتقول كده
موقع
الموقع ده بلده الاصلية- المكان اللي موجود فيه سطرين الكود اللي معمول بيهم الموقع- بلد تانية
مش مقطوع عنها الفيس بوك
والموقع ده مش مقطوع في بلدك
فالموقع بيشتغل حاجه كده زي الكوبري

مش محتاج اديك لينكات
اكتب على جوجل بروكسي
او
proxy
وجربهم كده وشوف مين شغال في بلدك ومين لا

الحل التالت للناس اصحاب الهوايات الخاصة
ممكن توصل صوتك للعالم عن طريق شفرة موريس
ايوة
حصلت عندنا في الثورة
وفي هواة شفرة مورس كتير حوالين العالم
لو تقدر تتصرف في جهاز تقدر تتواصل مع العالم عن طريقه

الحل الرابع بتاع جوجل
http://google-arabia.blogspot.com/2011/01/blog-post.html?utm_source=feedburner&utm_medium=feed&utm_campaign=Feed:+GoogleArabiaBlog+(Google+Arabia+Blog)
وده للي عندهم خط دولي


الحل الخامس للمحترفين في البرمجه

الحل مكتوب هنا
http://ta-kha-ref.blogspot.com/2011/02/how-to-create-your-countrys-internet.html


مرة تانية
لو اقتنعت باهمية الكلام ده ماتوقفوش عندك

انشره لو سمحت

من البوم الثورة 11

من البوم الثورة 11

من البوم الثورة 10

من البوم الثورة 9

من البوم الثورة 8

من البوم الثورة 7

من البوم الثورة 6

من البوم الثورة 5

من البوم الثورة 4

من البوم الثورة 3

من البوم الثورة 2

من البوم الثورة 1

How to create your country's Internet when it is unavailable

https://docs.google.com/document/d/1yphpTrj2Ty3qi6eo58MbW9eOexVN8BYXrvpQHh41HoM/edit?hl=en

By Luay Sakr, Software Engineer

LuaySakr@Gmail.Com

Contents

---

Introduction 2

Problem Statement 2

Previous Options 2

Proposed Solution 3

Implementation 4

Summary 4

Introduction

Communications nowadays is simply, directly and deeply like oxygen, it always standby to just use it, just whenever you need it.

Email boxes, newspaper, cell phones always standby, when it standby actually it works to inform you more and more information.

 

Problem Statement

In my country Egypt, internet connection was not available twice.

One of them in 2008 when internet cable was damaged (accidentally), and the second one was in 2011 (intentionally) and this one was synchronized with non-availability of cell phone calls and SMSs (intentionally also) all of these intentionally non availability of communications synchronized with illegal prisoners releasing (intentionally one more time :)).

So the problem is simply, directly and deeply "NO OXYGEN IN Intensive Care".

So we need some oxygen even some air, all Egyptians was under them homes with Improvised weapons with huge rumors  of hundreds of armed robbers, people in Egypt were need deeply kind of communication to share the information about the robbers.

on the other hand hundreds of thousands of protests people need to communicate to save them live -unfortunately some people was killed because of this - people were need any kind of communications

Previous Options

Most of people communicated through landlines, and some of them communicated with each other -even out countries - through Morse code

Proposed Solution

Concept

Pic 1-1

Internet in Egypt is networked as Pic 1-1

Assume that S1 is Vodafone network and S2 is TEDATA network and S3 is Link network.

And WAN is the outer networks over world

And Each LAN is home network (router with node or more)

Pic 1-2

Each network acting as domain in Pic 1-2

And switch acting as a physical switch

Connects all this domains to the main Internet cable or acting as logical switch like DNS

The global intention cutting of Internet can be through one of two ways,

One is disabling DNS

But this can overreach by using the IPs.

It did not work

The second one is switching off the switch

So these domains will be separated of each other but still each node in each domain is connected to other nodes in the same domain

By testing it worked

How

Each router in each LAN acting as node in domain network and it has IP

So node can ping any router within network.

So we can develop any small and simple social application and host it on any machine on network and simply create a port forward role through router that hosting machine connected to. So any other node can use this application by writing the hosting router IP in browser address bar.

(Tested from multi regions like Cairo and Alex and them all can use the same application also it worked over TEDATA and VODAFONE

Also I sow the application on Vodafone router though my cell phone by activating mobile network connection to internet)

Benefit 1

Creating local social network over domain

Benefit 2

We can use node or more to bridge between domains, and then more than one domain can see the same application

Benefit 3

Communicating through cell phones means that we can transfer files through cell phones without connecting to the same LAN or being beside each other    

Benefit 4

Also we can develop VOIP application that allows free calls and chats through same network and also we can use the concept of bridging.

Implementation

To implement these ideas for large scale we need

• Consistence server
• Static router IP
• Piece of code
• Advertising

Summary

In this white paper we proposed some ideas to create special kind of communications at special situations.

Also some ideas for free voice calls and chats between cell phones and computers proposed.

Team Work

Nader Abd El Hameed

Mohamed Sayed

Amr Gubr

Luay Sakr

Images from Data Communications and Networking fourth Edition

More than seven other testers over Egypt

محمد فاروق

محمد فاروق جديد
اخر واحد خد مني تلات اربع شهور
ياترى هاعرف اعمل ايه مع ده

مين اللي يقدر ساعة يحبس مصر

اتجمعوا العشاق في سجن القلعة … اتجمعوا العشاق في باب الخلق

و الشمس غنوة من الزنازن طالعة .. و مصر غنوة مفرعة في الحلق

تجمعوا العشاق بالزنزانة …. مهما يطول السجن مهما القهر

مهما يزيد الفجر بالسجانة .. مين اللي يقدر ساعة يحبس مصر

……………

تجمعوا و العشق نار في الدم ….. نار تحرق الجوع و الدموع و الهم

نار تشتعل لما القدم ينضم …. لما الايادي تفور في لم اللحم

و اللحم متنتور في رملة سينا …. و الكدب بيحجز على أيادينا

قدم العدو غارسة في لحم ترابي … و الكدب عشش مخبرين على بابي

و المخبرين خارجين كلاب سعرانة … بيجمعوا العشاق في الزنزانة

……………

مصر النهار يطلقنا في الميادين .. مصر البكا .. مصر الغنا و الطين

مصر الشموس الهالة من الزنزانين .. هالة و طارحة بدمنا بسا تين

مصر الجناين طرحة مين يقطفها .. مصر الجناين للي يرفع سيفها

مهما يطول السجن مهما القهر .. مهما يزيد الفجر بالسجانة

مين اللي يقدر ساعة يحبس مصر

احمد فؤاد نجم

مصر يابني اللي ماشفتهاش 2

ها يابني
ذاكرت البوست اللي فات؟؟؟
شفت مصر قبل الثورة؟؟؟
ماحدش يقدر يقولك اننا كنا مبسوطين ومتهنين
لا الفقير كان مبسوط بطابور العيش
ولا الغني كان مبسوط بزحمة المحور
لا الصنايعي كان مبسوط بدخله
ولا المهني كان مبسوط باستغلال الصنايعي ليه
ماحدش كان مبسوط باجرة الاوتوبيس العام اللي غليت
ولا حد رضي عن التأكس اللي اشتغل فيه العداد
ولا حتى حد كان راضي عن الميكروباص اللي بيركب اربعه ورا

تقريبا مصر البلد الوحيدة في العالم اللي فيها ميكروباصات
عمري ما شفت فيلم اجنبي فيه ميكروباصات
ما علينا
ماكانش حد مبسوط
جيلي جيل ماشافش انبساط
كان ايامي برده اول ايام فيها حاجه ستاند اب كوميدي عربي
كان في ولد وصف حالنا باسلوب جميل اوي
قال ان احنا البلد الوحيده اللي بيتقالك فيها مبروك لما تاخد فيزا
ده لانك طالع بره
وبالتالي اللي في مصر دول جوه
العالم كله بره واحنا بس اللي جوه
والراجل اللي بره ده لما بيرجع مصرمش بيقول راجع مصر
ولا داخل مصر
بيقول انا نازل مصر
يعني احنا جوه وتحت
احنا عايشين في حفرة
تفضل تكافح ويطلع تلاتينك عشان تبقي على وش الحفرة
على الارض يعني

خلاصته يابني
البلد كانت وحشة
مية مجاري بتتشرب
اكل مسرطن
حتى الدوا فاسد
بس فاكر اني رحت المتحف
فاكر اني رحت الهرم
فاكر كورنيش النيل في التحرير
فاكر اني كنت بروح الساعة اتنين وتلاته واربعة الفجر ومافيش مشاكل
فاكر اني حتى كنت بحب اروح بالليل اوي عشان الطريق يبقي فاضي
واروح شغلي بدري اوي عشان الطريق يبقي فاضي
فاكر ان ماكانش في عسكري واقف في شارعنا لكن ماكنتش بقفل بابي بالترباس

نرجع يابني لموضوعنا
قبل ما الشرطة تنسحب
كان في ثورة برده
كانت الناس في الشارع برده
كل الناس متعاطفه معاها
كان اللي في التحرير ده بطل
راجل بيجيب حق الغلابة ومعض نفسه للضرب
بعد الحركة الوسخة اللي عملتها الداخلية
الدنيا اتقلبت
مابقاش في اشغال
الداخلية مش بس سابت البلد في حالها ومشيت
لا
دول بوظوها
طلقوا على الناس المساجين والمسجلين
والداخلية كمان
في منهم اللي كان مستخبي في بيته
ومنهم اللي كان بيسرق مع الحرامية
ومنهم -الشهاده لله- اللي كان سهران في الشارع مع رجالة حتته بيحرسها
بس الناس في مصر عملت حاجه ماحصلتش في تاريخ الشعوب كلها على مدار التاريخ
نزلوا يحموا نفسهم بنفسهم في يوم واحد

اكيد يابني زمان زمان
قبل ما يخترعوا الشرطة
كانت الحكاية عامله كده
بس مش بالسرعة دي
يعني كان في عيل ولا اتنين سو في المنطقة
الناس كانت بتقفلهم
لما العيال زادت
وقفة الناس زادت
بعد كده شوية دوريات
بعد كده بقوا ينقوا اللي بيقف يحرس الناس-كشف طبي ورياضي-
بعد كده بقوا يختاروا ولاد الناس-كشف هيئة- عشان يبقوا شبعانين
بعد كده خصصولهم زي ومرتب وبقوا شرطة

بس اللي حاصل في البلد اليومين دول مش هايبقي كده
الكبت اللي كانت عاملاه الداخلية للناس انعكس في اللجان الشعبية دي
الشاب -ابن الناس- اللي واقف بيحس بمتعة بشكل او باخر لو فتش عربية بي ام دابليو

والشاب -من غير ابن الناس- بيحس بمتعة بشكل او باخر لما بيفتش توكتوك حتى
طبعا الحاجه غليت
البورصة قفلت
مافيش اشغال
لو سمحت يابني ماتسألنيش عن الناس اللي رزقها يوم بيوم
ماتسألنيش عن الناس اللي لسه ماقبضتش
ماتسألنيش ازاي عشنا يوم من غير موبيلات وخمس تيام من غير انترنت
لو سمحت يابني ماتفكرش في ان الناس اللي بتحرس الشارع دي لما فلوسها هاتخلص هايعملوا ايه
ولو سمحت يابني ماتفكرش في ان الناس اعصبها ممكن تبوظ وتتخانق مع بعض وكلهم معاهم سلاح
لو قريت في التاريخ ان ابوك زيه زي كل الناس شاف قنابل مولوتوف بتتعمل تحت بيته اللي في شارع عرضة مايتعداش عشرة متر ماتسالش كان بيعمل القنابل دي معاهم ولا لا
والله يابني رفضت واعترضت
اللي بيعمل القنبلة دي لاهو عارف بيعمل ايه
ولا هايولعها ازاي
ولا هايرميها ازاي وهي والعه في ايده
ولا حتى عارف بيعملها ازاي ولا هايرميها فين وعلى مين
ماتسالنيش يابني عن الناس اللي كان في ايديها سلاح ابيض هايعملوا بيه ايه
ولا اللي كان في ايديها سلاح ناري فاهمين اللي في ايديهم ده ولا لا
ماتسالنيش يابني عن موقفي السياسي في الوقت ده
لاني كنت كل ساعة برأي
كنت مش فاهم حاجه

كان في ايامي مسرحية اسمها ماما امريكا
بتاعة محمد صبحي

كان بيقول فيها

كنت بقول لابويا عايز اشتغل في السياسة
يقولي لا يابني
انا عايزك تطلع راجل محترم
اسيبك دلوقتي تفكر في الحاجات اللي طلبت منك ماتسالنيش عنها
يمكن انت في زمنك تكون عارف الاجابة

مصر يما يا سفينة

مصر ياما يا بهيه
يا ام طرحه وجلابيه
الزمن شاب وانتي شابه
هوا رايح وانتي جايه
جايه فوق الصعب ماشيه
فات عليكي ليل وميه
واحتمالك هوا هوا
وابتسامتك هيا هيا
تضحكي للصبح يصبح
بعد ليله ومغربيه
تطلع الشمس تلاقيكي
معجبانيه وصبيه
يا بهيه

مصر ياما يا سفينه
مهما كان البحر عاتي
فلاحينك ملاحينك
يزعو للريح يواتي
اللي ع الدفه
صنايعي
واللي ع المجداف
زناتي
واللي فوق الصاري كاشف
كل ماضي وكل اتي

عقدتين والتالته تابته
تركبي الموجه العفيه
توصلي بر السلامه
معجبانيه وصبيه
يا بهيه

احمد فؤاد نجم

مصر يابني اللي ماشفتهاش

البوست ده لابني
لو جه وعاش ولحقت اقوله عليه يمكن يقراه

لو مجاش بقي معلش يابني ياللي بتقراه دلوقتي
لو دلوقتي ده سنة 2025 مثلا يادوبك تكون بتسمع عن الكلام ده في التاريخ
ولو جه وملحقتش اقوله عليه حد الله يكرمكم يبقي يقوله

امبارح يابني كانت جمعة الرحيل
اكيد عرفت الحكايه
بس يابختك انت عرفت اخرها وانا لسه
احنا بقالنا عشر تيام في الموضوع ده

من يوم التلات والمظاهرات عادية
كتير بس زي اي مظاهرات
يمكن على ايامك انت المظاهرات شكلها اختلف
يمكن حتى مافيش مظاهرات اساسا
يمكن جيلي حقق كل مطالبه
يمكن اي مطالب جديدة بتتبعت اس ام اس
يمكن حتى سبتوا البلد كلكم
او قمع المظاهرات رجع اوسخ من الاول
الله اعلم

بس يابني
ابوك زمان
قبل ما يدخل الجامعة
ماكنش يعرف يعني ايه مظاهرات
عشان كانت قليله
وكمان ماكنتش اهتماماتي
لما دخلت الجامعه
كانت في شوية مظاهرات
مرة طيارة مصرية راجعة من امريكا
عليها ظباط جيش كانوا بيتدربوا هناك
الطيارة دي وقعت
الناس قامت بمظاهرات
بس المظاهرات دي جوا الجامعة بس
طبعا موضوع فلسطين اللي الله اعلم وصل ايامك على ايه بالظبط
كان واخدله الكم الاكبر من المظاهرات
مش عارف لسه على ايامك بتسمع عن محمد الدره وايمان حجو ولا لا
ياترى في اسماء غيرهم ولا المشكلة اتحلت
شوية كده بعد ما اتخرجت
كان في عبارة غرقت
باللي فيها طبعا
مات بتاع الف واحد مرة واحده
مشكلة اهمال
طبعا قامت مظاهرات برده
بس في الوقت ده كنت بطلت مظاهرات
معلش يابني بقي اكل العيش مر
بس على الاقل كنت متعاطف
كنت عارف موقفي
دايما كنت عارف موقفي
حتى قبل الجامعة
كنت عارف اني ماليش فيه
وايام فلسطين كنت رافض تماما اني ابيع دم الاطفال
كنت-ومازلت-كاره اي اسرائيلي
اي يهودي ساب بلده اللي اتولد فيها عشان يقتل طفل فلسطيني ويعيش مكانه

بس يابني المظاهرات كان ليها نظام
دايما لما كنا في الجامعه كان في عصافير
شباب زمايلنا برده
بس خدوا موقف معين
انهم مع الامن
يقفوا في وسطينا ويعرفوا معلومات عن مين اللي منظم المظاهرة
ونظامها وامتى وليه وحاجات كتير ويروحوا يبلغوها لقائد الحرس

ماحنا برده ايامنا في الجامعة كان في حاجه اسمها حرس الجامعة
ادارة كده في وزارة الداخلية
ويا سعده يا هناه اللي يشتغل فيها
الظابط ده لازمله واسطه كبيرة
اصله يابني شغال موظف
تمن ساعات
بيروح بيتهم كل يوم
مافيش شمس وعرق ادارة المرور
مافيش حرامية وقرف الاقسام
مافيش سفر
مافيش شغل تقريبا
الشغل بيعملوه العصافير
الفتره اللي فاتت طلع شوية دكاترة جامعة
سموا نفسهم حركة تسعة مارس
يعني مارس الفين وعشرة
رفعوا قضية عشان يشيلوا حرس الجامعة من الجامعة
على اساس ان الجامعة ليها سيادة واستقلالية
مش عارف الكلام ده دلوقتي بيضحكك ولا بيدهشك
بس ايامنا احنا استغربنا اوي
اللطيف بقي ان المحكمه حكمتلهم

ومع ذلك لسه الحرس موجود

المظاهرات بقي بره الجامعة او جواها كان فيها صفة مشتركة
هي الامن المركزي
تمشي في الشارع تلاقي امن مركزي تعرف ان في مظاهرة هاتحصل
تمشي في شارع الجامعة على طول تلاقي امن مركزي احتياطي
كنت تقرب من المظاهرة تتمنع
اول شغلانة للامن المركزي انه يمنعك تدخل المظاهرة
ويمنع المظاهره تخرج من كردونه
من الاخر يحجم المظاهرة
عشان تقل ماتكترش
طبعا موضوع ضرب المتظاهرين ده عادي جدا
امال ليه كل عسكري امن مركزي معاه درع وعصايا؟؟؟

من تلات سنين المظاهرات خدت شكل تاني
حركة سته ابريل الفين وتمانية قالتلك خليك في البيت
نوع من العصيان المدني
تخيل ان الشركات الخاصة في منها اللي قال للموظفين ان اللي هايغيب اليوم ده هايتخصمله تلات تيام مش يوم واحد
فكر بقي الشركات الحكومية كانت عامله ايه
بشكل ما البلد كانت فااااااااضية اليوم ده
خصوصا انه كان يوم مغيم
اليوم ده انا نزلت ميدان التحرير اتفرج على البلد
فاكر ساعتها شكل الميدان
كان فاضي كما لم اتخيله من قبل
بس كنت لسه مابعرفش اتخيل
بعد شوية ابتدت الاعتصامات
اي حد عنده مشكلة-واغلبهم موظفيش شركاتهم اتخصخصت- بيطلع يعتصم قدام مجلس الشعب
طبعا كان بيتنفضلهم
شهر شهرين تنفيض

تنفيض يعني تجاهل
مش عارف بتقولوا عليها ايه في يومينكم دول

من كام شهر كده بقي
مات خالد سعيد
واحد مات على ايد عناصر في قسم شرطة سيدي بشر
لحد دلوقتي القضية ماتحكمش فيها
بس انا وكتير غيري مقتنعين انه اتقتل منهم تحت التعذيب
ماهو كان ده العادي بتاع الشرطة
الشرطة يابني كان-خلي بالك- كااااااااااااااااااااان ليها هيبه
ورهبه
وكانت مقرفه
هاتلاقي بوستات انا كاتبها قبل كده بتكلم فيها عن الشرطة وقرفها
وهاتلاقي موقع اسمه التعذيب في مصر
هاتلاقي بلاوي عن الموضوع ده لوحده مش محتاج احكيهولك دلوقتي
المهم
المظاهرات خدت شكل تاني
بقت الشباب اللي مهتمين بقضية خالد سعيد اللي بقت قضية رأي عام-على فكره المصطلح ده انا ماسمعتوش غير في الكام سنة الاخرانين-
المهم
الناس دي بقت تنزل لابسه اسود
تقف على الكورنيش في اي بلد
ماهي مصر كلها يابني عايشة جنب النيل
ويدوا ضهرهم للشارع
يقفوا ساعه بالظبط
كل واحد لوحده
لا هتاف ولاتجمع
طبعا كان في مضايقات امنية
بس كانت بتعدي

بعد شوية كده
حصلت ثورة تونس
الله اكبر
ده في امل ياناس
قالك ننزل يوم خمسة وعشرين يناير
ايامنا احنا كان اليوم ده عيد الشرطة
ماظنش ايامكم انه هايفضل زي ما هو

الناس نزلت في مظاهرة سلمية
ماحصلش تخريب فيها
كان المفروض انها تبقي في شوارع وحواري المناطق الشعبية
معرفش ايه اللي خلاها توصل التحرير
بس طبعا قنابل الشرطة المسيلة للدموع بهدلت الناس
فضلوا في ميدان التحرير
لحد الساعة اتنين بالليل
وقامت الشرطة غادرة بيهم وداخلة عليهم بالجامد اوي
حبيب العادلي بقي الله يحرقه
المظاهرات كملت اربع وخميس
وكل ده والمتظاهرين سلميين تماما
ومصر بامان
وانا حتى كنت في شغلي الاربع والخميس دول
يعني الحياه لطيفة
مظاهرة بس البلد ماشية
يوم الجمعة ناس اكتر نزلت
والاحتكاك مع الامن بقي على اخره
وهوووووووب
الناس انتصرت
عربيات الامن المركزي ولعت في كل حته في مصر
وهووووب الشرطة بقت مافيش
مافيش شرطة خلاص
لا امن مركزي ولا امن دوله ولا اقسام ولا حتى عسكري مرور
وهوب السجون اتفتحت

والمساجين خرجوا
والبلد اتنهبت
المحلات والمولات الكبيره اتكسرت واتسرقت
والحزب الوطني والاقسام ولعوا واتسرقوا
تخيل الناس هاتسرق ايه من القسم غير السلاح؟؟؟؟
وبعد شوية طلعوا على البيوت
كان في ناس عايزين يسرقوا المتحف بس نجا سبحان الله
الشباب بتاع الاربع تيام اللي فاتوا وقفوا قدامه بصدورهم يحموه
ماهو مافيش شرطة
والناس في مصر كلها بقت واقفه تحت بيوتها بالعصيان والسكاكين بيحموا بيوتهم
والجيش نزل
وحظر التجول اتفرض
وحسني اقال الحكومة
وعين نائب
والناس مارضيتش
عايزينه يمشي
وحسني قاعد
المظاهرات استمرت

كفايا عليك كده يابني النهارده وهاكملك المره اللي جايه
خد وقتك عشان تتخيل مصر ايامي
عشان تعرف ازاي بقت مصر ايامك

كش ملك مات الملك

مبارك لعبها صح
لوى دراعي صح
الراجل برده خبرة تلاتين سنة رئيس جمهورية
وقبلهم اتنين وتلاتين سنة قائد عسكري

زنقتني يا مبارك
يا اضحي بالبلد واسيبك فيها
يا اضحي بالبلد واسيبها تولع

يا خسارة ماعرفش اقلب الدور
بس هاتتحسب بالنقط
البلد اهم

مش هاعرف اضحي بالبلد

مصر مصر تحيا مصر

مصر مصر تحيا مصر
مبارك مبارك يسقط مبارك

بس برده مصر مصر تحيا مصر

صورة بروفايلي

كومنتات كتير بتقولي
غير صورة بروفايلك
خليها علم مصر
اهدي وفكر وتعقل
ماشي

ماعنديش مشكلة
حاضر
ويلعن ابو اللي يمسك طوبة
ويلعن ابو التعصب
وخلينا سابجيكتف ويلعن ابو الاوبجكتيفز

طيب
عندي شوية طلبات بالهدوء كده وبالراحة
1 حد يضمنلي ان الريس مابيكدبش!!!! ع العلم ان عنده سوابق كدب قبل كده
2 حد يضمنلي ان الشباب اللي زي الفل اللي واقفين في التحرير من يوم خمسة وعشرين دول مش هايعتقولوا
ممكن اقبل اي حل مفتكس
ممكن مثلا دكتور زويل او عمرو موسى ينشر نمرته عشان لو حد تم اعتقاله منهم نكلمه ويضمن سلامتهم

3 حد يضمنلي اني ممكن اتظاهر سلميا من غير الداخلية تضربني
4 حد يضمنلي ان حبيب العادلي هايتحاكم بتهمه الخيانة العظمى عشان سحب الشرطة من البلد وفتح السجون مش العناصر المدسوسة زي ما بيقول الاخ عمر سليمان

5 لو سمحتوا اللي يطلب مني ده مايتهمش شباب التحرير بالعمالة لان دول بيجبولي انا حقي
ماحدش يكلمني ويقولي انتوا بيجيلكوا كنتاكي وبتاخدوا فلوس
هاحطلكم صورة لتوم اند بصل في طلعت حرب وتشوفوا العيال دي بتاكل ازاي

6 اي حد يطلب مني ده يفتكر كويس اوي
انه كان نايم في بيته يوم التلات والاربع والخميس والجمعة
السبت بس نزل يحرس بيته عشان الشرطة هي اللي خانت
والسجون هي اللي اتفتحت
والفوضى عمت مش عشان شباب التحرير لكن عشان الحرس القديم


7 اي حد يطلب مني ده ياريت يلتزم بوعد قدام نفسه
انه في اي وقت لو فهم ان شباب التحرير دول طلعوا بيفهموا اكتر منه ينزل ويقف معاهم في الوقت والمكان وبالطريقة اللي هما يقولوله عليها


عشان اثبت حسن نيتي
انا هاغير صورة البروفايل بتاعي

مبارك والرصاصة

معلش يا مصر
في رصاصة في ضهرك اسمها مبارك
عايزين نشيلها
يمكن بتوجعك دلوقتي شوية
لكن اكيد لو ماشيلنهاش هاتموتي
اجمدي يا مصر

مية معدنية

واحد صاحبي اتصل بيا وسالني...انتوا صحيح بيوزوعوا عليكوا اكل وفلوس؟؟؟؟؟
رديت عليه وقلتله...في ناس ماشية بتمر وفي ناس ماشية بمية لو هاتعتبر التمر والمية اللي في صلاة التراويح دعم اجنبي يبقي الناس اللي في التحرير دول عملا

رأيي السياسي

اليومين اللي فاتوا غيرت رأيي كذا مرة
حسني وحش
لأ حلو
لا وحش بس فيه سنة جدعنة
لأ ده وحش اوي

كل مرة كنت بعلن عن رأيي-اللي انا مقتنع بيه- كنت بلاقي مختلفين معايا
حقهم
وكل مره كنت بغير رأيي كنت بعتذر للي كان ليه وجهه نظري الجديدة دي من الاول
حتى لو كان مغيرها دلوقتي

ناس كانت بتقبل اختلافي معاهم
وناس كانت بتقبل اعتذاري
وناس كانت بتقبل اختلافي عنهم بعد ماكنت متفق معاهم
وناس لأ

الجمعة اللي جاية

امبارح كنت في التحرير
وانا مروح
قبل موضوع خطاب الريس ده ما يتم التنويه عنه اساسا
قابلنا واحد من الجماعة اياهم
بالظبط عند الامريكيين اللي عند دار القضاء العالي
قالنا-ولغيرنا طبعا- ان المنطقة مرشقة امن دولة
فهمت ساعتها طبعا انه عايزنا ننشر الخبر واحنا ماشيين
فاللي مروح مايرجعش
واللي رايح يفكر مرتين
بس مادتش خوانة
ولما حسني قال خطابه اللطيف
صدقته
صدقته ابن الكلب
والمصيبة اني ابتديت اقنع ناس لسه مصرة على التظاهر ان انتقال السلطة هاياخد وقت
بس بعد اللي حصل النهارده
مش هاقدر استحمل
مش هاقدر احترم نفسي قدام ابني
البلد دي مش هاتتظبط ولا هاتتعدل
انا مادخلتش الجيش
بس دلوقتي فهمت معنى كلمة ان الواحد ممكن يموت عشان وطنه
بدل ما يموت ويموت بلده عشان خمسين جنيه

يوم الجمعة اللي جاية
اربعة فبراير الفين وحداشر
انا نازل ومش راجع
مش راجع خالص
حتى لو مطالبي اتحققت
لؤي اللي هاينزل يوم الجمعة
مش هايرجع تاني
طلباته بقت ملهاش حدود
وزير الداخلية الحالي اخباره ايه في المجزرة اللي في التحرير دي
الجيش المصري الجميل
اخباره ايه في المجزرة دي
كل رجالة الحزب الوطني
اخبارهم ايه في المجزرة دي
سيادة رئيس الجمهورية المحترم
اللي بيقتل الناس في التحرير ده
اللي بيولع في البلد
 اخباره ايه
البلطجية اللي خرجوا يضربوا الناس دول
طلباتي اللي بره الثورة اصلا بقت كتير اوي
كل ده غير الدستور والبرلمان والطوارئ والتمديد والتوريث والاشراف القضائي والحكومة الانتقالية والاستقاله وكوووووووووول الحاجات دي

ماظنش عمري هايكفي احقق كل مطالبي دي
عشان كده هافضل هناك لاي الاجلين اقرب
على الاقل ابني يا اما مايجيش يا اما يجي ويلاقي انه ابن راجل حافظله على حقه في البلد دي