السبت، يوليو 23، 2011

عن ثورة العسكر وثورة الشعب

يوم تاريخي في حياة مصر النهارده
غريبة جدا حكاية ان الواحد يدون في نفس الوقت اللي التاريخ بيتكتب فيه
وصعب اوي اني ادون النهارده ودلوقتي بالذات
دلوقتي اللي هو يوم 23 يوليو في مواطنين مصريين بيضربوا عند ميدان العباسية
وانا عارف ان المفروض مكاني معاهم
مش عشان هما حركة ستة ابريل اللي اتهمها الجيش جهارا نهارا كده بالعمالة ال ايه عشان بتتمول من امريكا
على اعتبار يعني ان المعونة الامريكية دي تمول لا ارادي يعني
ولا عشان الناس دي بتهتف ضد المجلس العسكري
لكن عشان الناس دي شعب بينضرب
المشكلة ان ظروفي حاليا بتقول اني بعيد جغرافيا عن العباسية وقريب اوي من النت
يمكن مش كتير بيقرولي بس اهو يمكن يجوا صدفة ولا حاجه

ايه اللي بيحصل؟؟؟
رأيي المتواضع
وهو لا هو تحليل سياسي ولا معلومات من مصادر موثوقة ولا حتى تخمين منطقي وعقلاني
لكن احساس
رأيي اللي انا شايفه دلوقتي
ستة ابريل بتتمول ؟.؟؟؟؟ اه
ستة ابريل كويسة؟؟ يعني احب انضم ليهم ؟؟؟ لا
طيب ستة ابريل وحشة يعني احب اشتم فيهم ؟؟؟ برده لا
طيب ستة ابريل عملاء؟؟؟ لا
طيب تسة ابريل حركة سياسية بتلعب سياسة بوساخة اي حركة سياسة تانية ؟؟؟ اه
طيب المجلس العسكري محترم؟؟؟........
طيب المجلس متباطئ؟؟؟ جدا
طيب المجلس متواطئ؟؟؟ ......
طيب المجلس عايز يقلبها عسكري؟؟؟؟ ماظنش
عايز يقبها دينية؟؟ اكيد لا
عايزها مدنية؟؟؟ بشروط طبعا
عايز يخرج وماحدش يحاسبه؟؟؟مين مش عايز كده؟
ابتدى يفقد اعصابه ويتصرف بطريقة مبارك؟؟؟ من عاشر القوم
في خلافات بين طنطاوي وعنان؟؟؟؟ كلام يفتقر للمنطق
هو في فلوس بتيجي من صفقات السلاح؟؟ غالبا
طيب مين اللي بياخدها؟؟ صاحب النصيب
حسني هايتحاكم؟؟؟ ادي دقني
جيمي وشرشر وسرسر وعزو هايتحكم عليهم؟؟؟ كان غيرك اشطر
طيب في حل؟ اكيد في حل
ايه ؟ خلي عندك امل وكمل ثورتك
طيب الحزب الوطني ؟؟؟ قصدك حزب الاتحاد ؟؟؟ ماله؟
طيب الاخوان ؟؟ قصدك العدالة والحرية ؟؟؟ ماله؟؟
طيب ستة ابريل؟؟؟ قصدك المحظورة؟؟؟ مالها؟
طيب السلفية؟؟؟ قصدك الوهابيين ؟؟ مالهم؟
طيب التمويل ؟ قصدك الامريكاني ولا السعودي ولا الوطني؟؟
طيب دلوقتي انزل اروح التحرير لا يتاخد مننا ولا اروح العباسية لا العيال هناك تموت؟؟؟
مش عارف
استرها يا رب

الخميس، يوليو 21، 2011

من دونك - من أشعار دكتور أحمد خالد توفيق

من دونك
لا أشعر حزناً
هل يملك قبر أن يشعــر ؟

-------------------------------------------

من دونك لن أزعم أبداً
أني أتنفس من دونك

حقاً ما زالت أبياتي
تتسكع في أرض الذكرى
ما زال الشعر يدغدغني
وتعربد في قلبي نشــوة
لكني
ـ عفواً يا قلبي ـ
أدري في ركن من قلبي
أني ما يبقى من عمري
أحياه وحيداً
من دونك

من دونك
أهذي
أتثاءب
أكتب أبياتاً
أتعثر
ولبضع ثوان أتمادى
ولبضع سنين أتقهقر

من دونك
لا أشعر حزناً
هل يملك قبر أن يشعــر ؟

شيء كالأنفاس الحمقى
تتلاحق في صدر مقفر
أحياناً أهمس: لا جدوى
لكني أجهل معناها
من دونك ما معنى (جدوى) ؟

أحياناً أضحك
أتناسى
أهمس ألفاظاً وسنانة
وأخط عبارات الشكوى
من فوق جدار الزنزانـــــة

من دونك
نبض مغمور
لا يجسر أن يدعى نبضاً
يغفو في صدري أحياناً
يغزو شرياني أحياناً
يوقظني في جوف الظلمة
يخبرني
أني من دونك

من دونك
حقاً لن أزعم
أني لن أحيا من دونك
لكني أتألم حقاً
أتلاشى في الظلمة حقاً
ولأني أحببتك حقاً
أطبق أجفاني منهوكاً
وأهيب بقلبي أن يفهم
ما معنى
أن أحيا دونك

الأربعاء، يوليو 06، 2011

عن المخالفات المرورية

تحديث
لقيت المادة دي وبتفيد ان الناس دي كان عندها حق
مادة ( 65)
لا يجوز بأية حال التوقف بالمركبة على بعد يقل عن خمسة أمتار من مفارق الطرق ومداخل الميادين وأماكن عبور المشاة ومحطات مركبات النقل العام للركاب والمزلقانات



اللينك اهو للي عايز يقرا بقية المواد


http://www.moiegypt.gov.eg/Arabic/Departments%20Sites/Traffic/trafficlaw/2777/trafficrulesandsigns/rules/stop



ببساطة النهارده ركنت عربيتي قدام الامريكيين اللي في شارع 26 يوليو
صف اول وربنا
كل المشكلة انها على ناصية
نقطة الزاوية القائمة اللي بين شارعين متعامدين
قدام باب الامريكيين بالظبط
الامريكيين اللي في نص الشارع مش اللي عند طلعت حرب

ما علينا
رجعت للعربية لقيت عليها مخالفة
رحت للعنصر الامني اللي واقف في الاشارة دي وسالته ممكن افهم المخالفة دي ليه؟
قالي انتظار ممنوع
ممنوع ايه يابني مافيش يفط بتقول ممنوع الانتظار
قالي اصل الانتظار على الناصية ممنوع
طيب انت كاتب كده في المخالفة ؟؟ اني منتظر على ناصية وده ممنوع؟
قالي اه
طب وريهاني-مرة ظابط دفعني غرامة انتظار صف تاني خمسين جنية بالرغم من اني كنت في العربية ماسبتهاش ولما اخدت الوصل لقيته تكاليف استخدام ونش- وريني يا عم المخالفة
قالي لا
طيب اسمك ايه
ابقي اسال في الداخلية
ياسيدي انت في جهاز شغلته خدمة المواطنين ومن حقي اعرف اسمك
قالي لا برده
من هنا لهنا
دورت على الظابط اللي مدي دفتر مخالفات لعسكري مالقتوش
فين وفين لقيت امين شرطة
اسمه ابو السعود
موبايله معايا -هافضحه واجرسه لو طلع اللي قالوا غلط
خلاصة الكلام
انه العسكري كاتب في المخالفة انتظار في الممنوع
بس كده
وكل من العسكري وامين الشرطة ابو السعود وامين شرطة تاني كان معاه اكدوا ان الركن على الناصية مخالف من غير يفط

ماشي يا عم
انا بقي رجعت وقلبت قانون المرور
مالقتش فيه حاجه بتقول ان الانتظار على النواصي ممنوع
بصراحة برده مالقتش حاجه بتتكلم عن انتظار الصف الثاني
كل الكلام عن الانتظار الخاطئ
وبغض النظر ان مالوش غرامة مالية ولا عقوبة حبس لكن كل الموضوع سحب رخصة قيادة مدة لا تقل عن شهر
وطبعا ده ماحصلش
الا اني عايز اتأكد من موضوع اماكن الانتظار الممنوع ده
ياريت اي حد يقرا الموضوع وعنده خلفية قانونية عن الموضوع ده ياريت يقولي
وانا هانتظر شوية ولو طلع الكلام ده فاكس هامرمط طقم المرور ده