الموت

كل مرة اقول اني اتعظت واكتشف المرة اللي بعدها اني محتاج اتعظ

Published with Blogger-droid v1.6.8

مصر قالت نعم يابني ....ياخسارة كان نفسي اشوفك

طلعت النتيجة يابني من يوم الحد اللي فات
والنهارده الاربع
77.2 في المية قالوا نعم
مشهد مهيب
حوالي عشرين مليون نزلوا يصوتوا
طوااااااااااااااااااابير ايه
اول مره في مصر
حاجه كده زي الفل
المهم
استنينا الاستكرار مافيش
تيب الاعلان التستوري يا جماعة
لسه
البورصة فتحت النهارده
خمس ثواني  نزلت عشرة في المية
الله
هي مش النتيجة نعم؟؟؟؟؟؟؟؟؟؟؟؟؟؟؟

طيب ربنا يستر
خلينا مع اللي قالوا نعم للاخر
سيبك بقي من اللي قالوا عليها غزوة الصناديق
عادي
كلنا بنغلط
وكلنا بقالنا تلاتين سنة مش فاهمين سياسة
هانيجي ونفهم دلوقتي
سيبك ان الناس كانت نازلة تصوت على المادة التانية اللي هي مش موجوده في التعديلات دلوقتي اصلا
ماعلينا
خلينا في البلد
تبتدي تكلم الناس ياجماعة نحط ولو مية جنية في البورصة
ياكش نخسرهم كلهم
لكن من شوية طلع خبر
ان ال ايه مجلس الوزراء اقر قانون تجريم الاعتصامات
باختصار كده اللي هايتظاهر هايتسجن ويدفع نص مليون جنية
على اساس انه معاه خمسين الف اصلا
مش فاهم انا ازاي مجلس الوزرا يقر قانون من غير مجلس شعب
مين اصلا اللي اقترح القانون ده ومين كتبه
وامتى؟؟
ولذك احب اقول لكل اللي قال نعم
البس يا معلم
بالنسبة بقي للي قالوا لأ
هما كانوا عارفين ان نعم هاتلبسهم من الاول

طيب تعالى نشوف هايحصل ايه يعني
بالقانون ده يابني
لو عز والعادلي طلعوا من السجن براءة من غير بقية المحاكمة ما تكمل مش هانعرف نتظاهر
ولو حسني خد قلادة النيل ماحدش هايعترض
ولو الجيش فضل قاعد في الحكم عشان الامن القومي مافيش مشاكل
كبيرنا هاريبورت الصفحة بتاعته على الفيس بوك

تعالى نشوف بقي التحليل المتخلف بتاعي والمشبع بنظرية المؤامرة
الغاز اللي رايح لاسرائيل اتفجر
رساله رقم واحد
عبود الزمر خرج من السجن
رسالة رقم اتنين
الشعب قال نعم
رساله رقم تلاته
الجيش هايقعد يا بني
وبترحيب من المجتمع الدولي
وبسكوت من المثقفين والثورجية
وبتعاطف شعب قال نعم
وادي دقني لو طلع حد بيقول لا بعد كده
مبروك على جيلكم يابني الديكاتور الجديد
على الاقل احنا حاولنا
ولسه هانحاول

معلش يابني

أبوكي أيوه
ما كانش حاجه
لكنه حاول يعيش لحاجه
وجيل أبوكي
كان يعني حاجه
وجيلك انتي
حيبقي حاجه
ومصر تبقي ألنهارده حاجه
وبكره حتما
حتبقي حاجه
وأي حاجه
وماتكونيش حاجه
إلا وسببها
فى الاصل حاجه
وبكره لمن
قمر كو يطلع
والشمس تسطع
فوق كل حاجه
حتقولوا
كان فى المكان دا ناس
فيهم طيابه
فيهم حماس
وفى الحماس
بعضش عباطه
وكانوا اخر الامر
ناس
وكان زمانهم سجون
وكانوا
مابين سجونه وامريكانه
وبين ضباب الطريق حياري
ما حد قادر يشوف مكان
حتقولوا كانوا
وياما كانوا
وياما كانوا
وياما شربوا
وياما عانوا
وياما جالهم
وياما جيلهم دفع
وكان التمن أمانه
ويا ما ناس فى المسيره
مشيت
وناس ف نص المسيره خانوا
حتقولوا كانوا
لكن يبقي فى الامر حاجه
ان اللى عربد
ما سابش حاجه
وساب كلابه
على كل حاجه
تهبش وتنهش
فى كل حاجه
ما قدرش يقتل فى أي حاجه
روح التفاؤل
بكل حاجه

انا قلت لأ

انا جيت يابني
وزي ما وعدتك قلت لأ
جايز بكره لما تيجي وتفهم تشتمني
او تشكرني
بس عذري ليك اني عملت اللي انا شايفه صح دلوقتي
وماكدبتش عليك
وزي ما قلتلك
بكره هاتطلع النتيجه هابقي معاها
مادام مافيهاش تزوير

ولو اني
للذكرى والتاريخ بس
عرفت ان في بقال سلفي جاله واحد عايز علبة حلاوة فاضية بعته يصوت ويقول نعم بعد ما رجعله قاله هو البتاع ده بتاع ايه؟؟؟قاله الدستور ..الراجل مافهمش ساله دكتور!!؟؟؟
راجل كبير عنده بتاع تسعين سنة
ولو ان برده بعض اللجان مالقوش الورق مختوم

عموما يابني
ده اللي انا عملته
ادعيلي وربنا يكرم مصر ويكرمك وتيجي بالسلامة 

لأ

بكره

بعد كام ساعة كده

هانزل وهاقول رأيي

هاعلم على ورقة كده واحطها في صندوق

والورقة دي هاتتعد

وتتقال كرقم في النتيجة

كام واحد قالوا اه وكام واحد قالوا لأ

وانا هاقول لأ

لاول مرة هايبقي ليا صوت

اول مرة في حيااااااااااااااااااااتي انتخب

وبقولك يابني

ياللي لسه ما جتش

انا هاقول لأ

ولما اقول لأ هاجي هنا واقول اني قلت لأ

لأ عشانك يابني

لأ لاني لو قلت نعم وطلعت الاختيار الغلط انت اللي هاتلبس المصيبة دي 

انت اللي هاتشوف ديكتاتور جديد

لكن لو قلت لأ وطلعت الاختيار الغلط انا اللي هالبس فراغ دستوري مش انت

هاقول لأ يابني عشان انا مش موافق على دستور 71 اللي بيعمل رئيس الجمهورية اله

هاقول لأ يابني عشان انا مش عايز فرعون يقولي لا اريكم الا ما ارى ولا اهديكم الا سبيل الرشاد

هاقول لأ يابني عشان انا فرحان باني ابتديت افهم سياسة ومش عايز البس العمة تاني

هاقول لأ يابني عشان لو انت اتولدت وانا بره باخد دكتوراه يبقالك حق الترشح للرئاسة

هاقول لأ يابني عشان اللي ليه حق الانتخاب ليه حق الترشح

هاقول لأ يابني عشان لما اترشح للرئاسة مالفش على المحافظات اجيب تلاتين الف صوت والسيد البدوي يترشح عشان مصطفى شردي نجح في بور سعيد

هاقول لأ يابني عشان مش مرتضى منصور يرشح نفسه واحمد زويل يادوبك يصوت 

هاقول لأ يابني عشان مش عايز خمسين في المية فلاحين وعمال انا عايز الفلاحين والعمال وبقية فئات الشعب كله

هاقول لأ يابني عشان عايز دستور برلماني

هاقول لأ يابني عشان مصر تبقي احسن واكثر استقرارا مش عشان اقضي السنة اللي جاية بحارب في اخوان ووطني

هاقول لأ يابني عشان اللي يشكل الدستور لجنة منتخبة من الشعب كله مش منتخبة من دوائر انتخابية بس

هاقول لأ يابني عشان مش عايز فساد تاني

هاقول لأ يابني عشان مش عايز غش تجاري وجشع رجال اعمال وشوارع مكسرة تاني

هاقول لأ يابني عشان عايز مستشفيات نضيفة ورعاية طبية كويسة 

هاقول لأ يانبي عشان انا كمصري يبقالي احترامي جوا وبره البلد

هاقول لأ يابني عشان انا اطالب بدستور جديد يكفل حرية التعبير والرأي ويسائل الفاسدين عما يفعلون حتى لو كانوا رئيس الجمهورية

هاقول لأ يابني عشان امشي في شوارع مسفلته

هاقول لأ يابني عشان الطريق يبقي فاضي

هاقول لأ يابني عشان السلع ماتغلاش على الفاضي

هاقول لأ يابني عشان يبقي عندنا اكتفائنا الذاتي من القمح

هاقول لأ يابني عشان اعرف اكل واشرب من غير ما اتسرطن

هاقول لأ يبني عشان يبقي عندنا صناعة وزراعة نصدرها لبره

هاقول لأ يابني عشان اعرف انا وملاين الشباب والبنات اللي زيي نتجوز

هاقول لأ عشان انت تيجي 

لكن 

بكره هاقول لأ

وبعد بكره هاقول اللي نتيجة الاستفتاء تقوله

عشان نقوم بمصر تاني

اللي هايقول اه مش خاين ولا عميل ولا عنده اجنده ولا حتى مابيفهمش

اللي هايقول اه ليه وجهة نظر احترمها

ولو هو الاغلبية هامشي معاه ايدي في ايده واحارب عشان نقوم بالبلد 

عن الشرطة والشعب اللي طلعوا ايد واحده

غريبة الحكاية دي
من امتى ولامؤاخذة
ماشي معاك الشرطة دي اخويا واخوك وابن عمنا وابن خالنا
بس بيني وبينك كده لامؤاخذة مش عارف اخوك وهو ظابط كان بيعمل ايه؟؟؟
بلاش
ماشي معاك الشرطة مهمة
مهمه كمفهوم طبعا لكن مش الشرطة اللي عندنا دي
جهاز الشرطة اللي عندنا ده كان بيأمن المواكب حلو اوي
بقية الحاجات كلها كانت فاكسه

لكن انا بتكلم عن مفهوم جهاز الشرطة ده مهم
ماشي يا عم
واحنا ماحليتناش غير دول

وماشي يا عم اخويا لو غلط فيا هازعل منه شوية وبعدين اسامحه
وماشي يا عم خلينا نروح الجيش بقي عشان اعصابهم ابتدت تبوظ
وماشي يا عم هانقول نعم للتعديلات الدستورية-عشان الحياة المدنية ترجع مش اكتر-
بس يا اخي حس على دمك وانت بتهتف للشرطة
افتكر ان اخوك اللي غلط فيك ده ماداسش على رجلك
ده داس على اخوك التاني

ماشي يا عم الراجل اللي في الفيديو ده ايده طاهرة وماعملش حاجه وحشه
لكن بالنسبة للراجل اللي مش في الفيديو ده اخباره ايه
عملتلي ايه عشان تحفظلي كرامتي منه
ماشي يا عم وزير الداخلية الجديد راجل محترم
لكن دم الشهدا هانعمل فيه ايه

طول عمري مابفهمش في السياسة
يمكن عشان اللي بيفهموا في السياسة بيعرفوا اجابات الاسئلة اللي فاتت دي

طيب انا مواطن عادي مابفهمش سياسة
ممكن من اي حد فاهم يجاوبني

الى الخائفين ....اطمئنوا

وقت من الاوقات ابتديت اخاف...زيي زي اي حد
خايف من انعدام الامن
خايف اخويا ولا اختي يروحوا بلليل لوحدهم
وللحظة فكرت في ان لو كانت الداخلية موجوده كنت اطمنت
لو كان امن الدولة موجود ماكانش في هايبقي في الجحيم بتاع الفتنة الطائفية ده
وبعدين فوقت
هو انا بتكلم كده ازاي؟؟؟
هو الظابط من دول كان بينزل شغله كل يوم الصبح يحط صباعه في الخرم بتاع المجرمين فيقوم يحوشهم؟؟؟
يعني مثلا لو ظابط تعب وغابله يومين الكام حرامي بتوعه هايبهدلوا منطقته؟؟؟
حتى لو عارفين انه هايغيبله يومين؟؟؟
اكيد لا
الظابط ده مش سدادة بنسد بيها حنفية المجرمين
وظابط امن الدولة ده مش حابس كل اللي بيعملوا فتنه طائفية في البلد

الظابط شغتله الاساسية انه يسيطر على البلد ضد المجرمين
يعني مايبقاش موجود اصلا تشكيلات عصابية
يعني من الاخر كده مايبقاش في عصابة بتتجمع مع بعض ومرتبين كل حاجه وبيتمرنوا كل يوم عشان لما الظابط بتاعهم يغيب ينزلوا يسرقوا

المفروض ان مايبقاش في عصابة من اساسه
حتى لو في حد تكوينه الجيني اجرامي
المفروض ان الظابط بيمسكه لما بيعمل الحاجه الصغيرة
وبالتالي مايبقاش في فرصة للحاجه الكبيرة

لو سمحتوا بقى
ماحدش يقولي ان تاني يوم الامن انسحب كل العصابات دي نزلت تسرق عشان الامن بس هو اللي كان حايشهم

ولا ان تاني يوم امن الدولة فرم ورقه حصلت الفتنة الطائفية دي عشان بس امن الدولة هو اللي كان حايشها

كن مع الثورة

ايه احسن من مليون دولار

ايه اللي احسن من مليون دولار؟؟؟؟؟؟؟؟؟؟؟


































مليار دولار!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

فقط للتاريخ

مش عاجبني

اللي يخليني ادمي واللي هو الديموقراطية في نفس ذات الوقت عبارة عن شوية نقط بسيطة واساسية
اولا اني اشعر بالامان في بيتي وفي الشارع والشغل وحتى وانا مسافر بره
للأسف ولا حاجه من دول كانت موجوده قبل الثورة
ثانيا اني اشعر بحريتي في تكوين رأيي والدفاع عنه
طبعا ده ماكانش موجود برده
اني اشعر باحترامي لنفسي واحترام الغير ليا واحترامي للغير
مادام احنا الاتنين بنتصرف بشكل محترم
ايه اللي يخلي ظابط امن الدولة يوافق او مايوافقش اني ادرس في الكلية
هو انا هادرس في الكلية عشان انا عندي معلومة ولا عشان ماشي جنب الحيط

انا احترمت شفيق عشان مشي من غير دم
انه لما ماعجبنيش-انا الشعب مش واحد ولا اتين انا مجتمع- مشي بالادب
بس مش معقوله عشان مشي دي حاجه كويسة اقوم ارشحه رئيس جمهورية
ده حتى ساعتها هايبقي مامشيش والحاجه الكويسة اللي حيلته راحت
يعني فلسفيا حتى الافتراض فاسد

بالنسبة بقي للناس البني ادمين والربع بني ادمين
انا -كبني ادم- مش عاجابني حسني مبارك وفكره توريثة للحكم
ومش عاجبني سامح فهمي وتصدير الغاز-حتى لو مش لاسرائيل- بسعر اقل من سعر تكلفته
ومش عاجبني وزير العدل بوجود تزوير في الانتخابات وتأخير في القضايا وعدم تنفيذ لاحكام الدستورية العليا اللي طالعه ضد الحكومة
ومش عاجبني ابو الغيط وانا لما بخرج برا مصر بخبي بسبوري المصري
مش عارف سمعتم عن حملة انا افريقي قبل كده ولا لا
بس هو ده كان الحل
احترامي كمصري اقل بكتير من احترامي كافريقي

ومش عاجبني وزير الداخلية وفي معتقليين رأي وكمان بتعذبوا
ومش عاجبني الظابط اللي بيتعامل معايا بناء على وظيفتي في البطاقة او الكونتاكتس اللي عندي في الموبايل

ومش عاجبني الظابط اللي بيديني وصل بمخالفة صف تاني فلما اقراه الاقيه تكاليف استخدام ونش
وانا اساسا ماكنتش واقف صف تاني
مش عاجبني الامين اللي بياخد فلوس في اشارة
مش عاجبني المسجل خطر اللي بيقف في طريق الميكروباصات عشان يدوله كارته-فرده حكومية مقنعه- واللي مايدفعش يضرب باكثر الطرق امتهانا-حصلت قدامي كذا مره

مش عاجبني العسكري اللي واقف في المرور بياخد جنيه عشان يجيب ملف عربيتي من الارشيف
ودي شغلته الاصلية والوحيده على فكره
مش عاجبني الموظف اللي لو مااخدش الفلوس-اللي هو عايزها بالظبط- يبقي الرد الطبيعي فوت علينا بكره او ايه ده اللي بتديهوني هو انا بشحت
مش عاجبني موظفة الحكومة اللي قالتلي بما انك جامعي يبقي تخرج تخلي عم فلان هو اللي يكتبلك الطلب
مش عاجبني طابور العيش اللي الناس بتموت فيه بعضها
مش عاجبني الناس اللي ماتت في الدويقة والعبارة والمظاهرات
مش عاجبني كم الشحاتين اللي في البلد
مش عاجبني كلمة بقشيش اللي بتبقي اول كلمة السياح بيعرفوا ترجمتها قبل حتى ان مصر يعني ايجيبت
مش عاجبني تفتيشي اتناشر مرة وانا نازل شرم اللي هي حته من بلدي اصلا
مش عاجبني جرنالي القومي اللي بيدفعلوا فلوس من الشعب عشان يطبل ويزمر لحزب واحد بس
مش عاجبني ان نتيجة تدخل امن الدولة في التدريس الجامعي ان الدكاترة المحترمين اللي درسولي -في ام مجانية التعليم-يتعدوا على الصوابع
مش عاجبني اني ادي ابني دروس من اولى ابتدائي
مش عاجبني الزحمة
مش عاجبني النمر الخاصة في العربيات
مش عاجبني مواكب الوزرا اللي بتعطلني
مش عاجبني كوني مصري قبل الثورة

بس
بعد الثورة
حابب اوي اني اكون مصري ومافيش حاجه مش عاجباني

محمود وجدي بيخوفنا....لا يابابا لا مابنخافش

كل شوية اقرا ان ال ايه تم القبض على سبعة ستعة خمسة تلاتاشر مسجون هارب
ومعاهم سلاحين او خمسة او اربع اسلحة ناريه

مش فاهم انا ايه اهمية الاخبار دي غير التخويف
غير انهم عايزين كل ما مواطن يقرا الخبر يقعد يفتكر هو في كام الف لسه بره
الله الله الله
دي الشرطة مهمه بقي على كده

على فكره
مابنخافش
ومش مصدقين
ماحنا ماشيين في الشارع وشايفين الشرطة رافعه ايديها من اي حاجه
حتى مخالفات المرور مابيخدوهاش
مساجين ايه بقي اللي قبضتوا عليهم
دانتوا سايبين التكاتك تمشي على الكورنيش

قديمة يا محمود يا وجدي
وبرده هاتمشي