التحرش النفسي

السلام عليكم

النهاردة هاحكيلكم عن التحرش النفسي

لاني انتهكت نفسيا

مش انا لوحدي

ده الدفعة كلها

اصل الحكاية اني بعمل دراسات عليا

ودي على حد علمي يعني دراسات عليا

يعني المفروض ان يكون فيه احترام نوعا ما للطالب اللي جاي ده

لانه جاي بمزاجه عشان يتعلم

مش اهله ضاربينه بالجزمة عشان ينزل يجيب شهاده يتجوز بيها وبعد كده يقعد على القهوة

والحمد لله لقيت الاحترام ده في التعامل

وبعض الدكاترة بيحترموك الاحترام ده في كل حاجه

عندنا دكتور لو قابلته في الشارع وانت ماتعرفوش وعرفت انه بيفهم في الماده الفلانية وسالته سؤال ممكن يقعد معاك على الرصيف عشان يشرحلك

لكن حكايتي النهارده عن دكتور تاني

دكتور سقاني حاجة اصفرة

بمعنى ادق سمعني حاجه اصفرة

مش انا لوحدي

ده الدفعة كلها

هو -الشهاده لله- متمكن جدا في مادته العلمية

مادخلش غير خمس محاضرات من حوالي خمسة وعشرين او تلاتين محاضرة

لكن الحق يقال محاضرته بعشرة

استاذ استاذ يعني

بالمناسبة هو رئيس قسم المادة دي

واحنا اكتر من شعبة

وبقية الشعب كلها دكاترتها بيدخلو ليهم كل محاضرة

ومع ذلك الدكتور بتاعنا بيدخل يشرح المعلومة في دقيقتين ويطبق عليها مثالين بالعدد وبعدها نقدر نحل اصعب مسألة متعلقة بالمعلومة دي

كنا راضيين تماما-على حد قول احد الزملاء- عن عدم حضوره للمحاضرات في مقابل اننا بنفهم وهو ده اللي مطلوب

لدرجة ان المعيدة لما كانت بتشرحلنا كنا بندرك القاعدة اللغوية اللي بتقولي ان التضاد يظهر المعنى ويؤكده-على حد قول زميل اخر-

من كتر ما كان بيسهلنا المعلومة كنا بنضايق من اي حد تاني يكلمنا في الماده دي

لحد هنا الدنيا وردية وان كنا نأخذ عليه عدم التزامه بالمواعيد اللي هو شخصيا بيحددها

وهي صفة تعلمت اليوم ان اعطيها قدرا كبيرا من الاهتمام

في محاضرته الخامسة والاخيرة

سالناه عن المنهج

قام سمعنا الحاجه الاصفرة

قال اننا مش محتاجين حتى نحل مسائل من مراجع

لان محاضراته هي المنهج كله والامتحان مش هايخرج من المحاضرات دي

كلام جميل والله وماده مضمونة والحمد لله

دخلت النهارده الامتحان

فوجئت ان في حاجات طبعا من بره المنهج اللي هو قال عليه

ومن بره اوي

طبعا الاقسام التانية كانت بتجاوب لانها عرفت ده وذاكرته

لكن احنا معتمدين على المعلومات العامة والحس الرياضي للمسألة -واؤكد هنا ان المسالة لا تحل بمجرد الحس الرياضي ولكن توجد قوانين وفورم ناس خدت فيها دكتوراهات قبل كده عشان نقدر نحل بيها المسائل دي

هنا حسيت بالانتهاك والتحرش الفكري والعقلي

انا انضحك عليا يا جدعان

شايف واحد بيضحك وبيقول هو انت في المدرسة يا حبيبي عايز الامتحان من جوه كتاب النماذج

دانت بوست جرادويد

اقوله معترف تماما اني مطلوب اني ادور في مراجع وانا اللي ابحث عن المعلومة

بس قولي ايه هي المعلومة اللي مطلوبة مني

لان ده اللي حصل فعلا

كنا بنعرف ان مطلوب منك مثلا انك تعرف تكامل تكامل محدود

مطلوب من الدكتور انه يفهمك يعني ايه اساسا تكامل محدود

مطلوب منك انك تعرف تكامله

تتمرن عليه

ازاي

تتصرف

مطلوب منك يابني انك تعرف التطبيقات الفلانية للتفاضل

تروح انت تدور وتبحث عن التطبيقات دي

لكن ماتدورش على تطبيقات التفاضل في حاجات مش مطلوبة منك

لو كان قالنا مطلوب منكم كذا كذا كذا وانا مش هاشرحه

والله كنت احترمته اكتر من اللي حصل ده

املي الوحيد انه يراعي النقط اللي هو ماقالش انها مطلوبة

بل بالاحرى اللي قال انها مش مطلوبة

كنت بقول اني لما لقيت كده حسيت بالانتهاك الفكري

ولما اشوف حد من قسم تاني-في الامتحان ممكن نقعد كل الاقسام في نفس اللجنه -بيجاوب وعارف

كنت بحس باحساس بلية اللي كان ممكن يبقي احمد زويل بس لو كان راح المدرسة وعرف مطلوب منه ايه عشان يبقي احمد زويل

كنت بحس احساس بلية ده وهو شايف ولد تاني لابس لبس المدرسة وشايل الشنطه على كتفه

هنا حسيت بالقهر الفكري

ولما لقيت ان في ناس بتغش وللعجب مراقبين اللجان كانو سايبنهم مش عارف عن عمد ولا عن معدومية ضمير

كنت بحس بالتعذيب والتنكيل الفكري

معقولة ؟

دانا بتعلم وبمتحن عشان ابقي استاذ دكتور

معقولة اخد الشهادة دي بالغش؟

اقبلها على نفسي؟

هو مش المفروض ان الارتقاء علميا يتبعه الارتقاء خلقيا ؟؟؟

بقت مشكلتي معقدة محتاجه فرويد عشان يحللها تحليل يعتمد على الكبت الجنسي زي عادته

اولا في حاجات راحت مني يعني في درجات راحت يعني في تقدير راح

ثانيا انا مقصرتش من ناحيتي لان مافيش حاجه اطلبت مني وماذكرتهاش لكن دانا اضحك عليا

ثالثا في غيري في نفس ظروفي وبيغشوا من ناس عارفين -من الاقسام التانية- يعني حتى مش هابقي متفوق بالنسبة لشعبتي على الاقل لان في ناس خدت معلومة مش من حقها

قلت اجي اكتب الكلمتين يمكن اطهر عقليتي شوية من الاعتداء اللي حصل عليها

عشان اعرف افكر في الامتحان اللي جاي ربنا يستر