ارادة النكد
سيداتي انساتي سادتي
مرحبا بكم في برنامجكم المفضل فلسفات ومعجنات
معنا اليوم دكتور زكي ماهر نبيه
وده على فكره اسمه يا جماعه
اسمه بس
هايكلمنا النهارده عن تلات حاجات
البيتزا بالتونة وارادة النكد واحدث رنات الموبايل
اهلا بحضرتك معانا يا دكتور
اهلا بيكي
تحب تكلمنا في ايه الاول؟؟
نتكلم الاول في البيتزا اللي بالتونة
ولو في وقت في اخر الحلقة ممكن اكلمكم عن البطاطس بالخيار
..................................
....................
....................................
..................................
(تم حذف الكلام الفارغ ده لانه مايهمناش في المدونة)
وبعد ما اتكلمنا عن الفطيرة ام سكر نتكلم بقي عن ارادة النكد
فرويد مرة قالي انه مؤمن تماما بارادة الموت
قمت انا طلبت واحد سحلب -ماحنا كنا قاعدين على القهوة زي عادتنا- وقلتله
انا بقي مؤمن بارادة النكد
قام فرويد مافهمش
سالني يعني ايه
ودي ميزة -الشهاده لله- في فرويد الحقيقة انه لما مايفهمش يسال على طول
صحيح هو بيسال كتير وساعات تحسي انه غبي كده
لكن انا شخصيا مابطقش الناس اللي بتدعي العلم دي
نرجع لما فرويد سألني في (غباء) يعني ايه اراده النكد
قلتله يعني الناس تبقي عايزة تنكد على نفسها
يعني مثلا عندك اي واحده ست في عزا
تقعد تعيط وتصوت وتلطم
ليه ؟
تفتكر بتعيط على المرحوم
هي بتعيط عشان نفسها تعيط
حابه جدا انها تشعر بالحزن
على فكره اغلب الستات كده
اغلب الستات بيفتكروا ان الحزن بيديهم جمال
وده اكبر غلط
مافيش حد بيبقي جميل وهو مكشر
وهو ممبوز
وهو قرفان
عمر ما واحده تتصور انها لما تقول لجوزها ان الدنيا حر جدا -وهي مش عايزاه يجبلها تكيف لان في تكييف فعلا- عمرها ما هاتقوله كده وتنتظر انه يبقي مبسوط
انا هاضرب للمشاهدين مثل يقرب الصورة
لو انا عندي عربية
والعربية دي بتبوظ
لو بتبوظ لسبب منطقي
هاوديها للمكانيكي يصلحها
وكل الناس عربيتها بتبوظ وبتصلحها
ده عادي جدا
لكن لو العربية دي بتبوظ لاسباب غير محددة
انزل الصبح ادورها ماتدورش
اجيبلها الميكانيكي تشوفه تروح تدور عادي جدا ومافيش مشكلة
اجي امشي بيها تحلف ماهي ماشية
تجيبلها حد يشوف مالها تلاقيها بقت رهوان
وياسلام لو بتبوظ كتير بقي
لو العربية فاهمه انها بكده هاتخليني مهتم بيها اكتر تبقي غلطانة
ليه؟
لاني مش هايبقي عندي وقت اغسلها ولا انظفها
مش هايبقي عندي حتى استعداد لكده
عربيتي بتبوظ على طول
مش مامن اركبها وماعملش بيها حادثه
تفتكروا هاسمكرها كويس ولا هاحطلها شخاليل وكشافات
طبعا لا
امتى اهتم بعربيتي
لما تبقي مريحاني
مريحاني مش مقضيالي الغرض
ماهو اللي عربيته عربية عاديه جدا
بتبوظ بشكل عادي وبتتصلح بشكل عادي هايعاملها بشكل عادي
لكن اللي عربيته دايما سانداه
كل ما يحتاجها يلاقيها
اكيد هايحافظ عليها
هايحافظ عليها قوي
وعمره ما يبعها
لكن صاحبنا ابو عربية نكدية
مش هايفكر كتير لو جاله مشتري للعربية دي
اما بقي بالنسبة لرنات الموبايل فرنات عمرو دياب الجديده هاتنزل قريب اوي اوي اوي.........................
......................
........................
وفي نهاية برنامجنا بنشكر الساده المشاهدين وانا بقولكم اهم حاجه نكون مسكنا ورقه وقلم وكتبنا وصفة البتزا وارقام التليفونات اللي هاتنزلوا منها النغمات
كنت سعيده معاكم اوي يا جماعة
اشوفكم الحلقة اللي جاية على خير
تترات
الدكتور
انتي ليه مانوهتيش عن ارادة النكد في ختام الحلقة
المذيعة
اصل المخرج لاقاك هاتعك قام منزل اعلانات لو كان سابك كانت مراته قتلته
هناك 4 تعليقات:
أسلوب رائع في سرد الأحداث
واهتمامك بالتفاصيل هايل
ومفيش أي شعور بالملل أو النكد الحمد لله وأنا بقرأ كلامك
بس أنا متفقة معاك جدا في موضوع الستات والنكد
مع اني المفروض اكون متحيزة بس دي الحقيقة
دعني اولا ابحث معك عن نقطة توافق
فأنا ارى ان المرأة هي التي تملك مفاتيح جذب و نفور الرجل اليها
لكن
لا ارى امكانية تشبيه المرأة بأي جماد
المرأة كتلة من المشاعر والأحاسيس الفياضة للغاية
واذا انت اعتبرت مشاعرها دي ارادة نكد
فأحب اقولك ان لولامشاعرها دي مكانتش المرأة تستحق تكون ام حنونة او زوجة محبة لأن ربنا هيأها بمشاعرها دي لوظائف معينة لا تستطيع انت القيام بها لأن فاقد الشيء لا يعطيه
المرأة لا تستطيع كتمان مشاعرها او مداراها وتستمتع بإظهارها للرجل لجلب عطفه واهتمامه
هيا تسعد عندما يحتوي ضعفها بقوته
و يمسح دمعها بابتسامته
هي تشعر ان بيده مفاتيح الأمان والحماية والحنان
دموع المرأة ليست لمجرد - النكد -
واذا كان النكد ارادة فلتبحث عن أسباب هذه الإرادة
المرأة لا تبكي وهي آمنة
المرأة لا تبكي وهي محبوبة
المرأة لا تبكي ولها عاشق يقدرها ويحترمها ويهتم بها
المرأة لا تبكي لغير حاجه ولغير سبب
بالتأكيد ينقصها شيء ما
ربما تكون نفسية المرأة معقدة بعض الشيء حيث أن النساء غالبا يقلن نعم وهن يقصدن لا ويقلن لا عندما يقصدن نعم - جملة صحيحة الى حد كبير سمعتها في فيلما أجنبيا شهيرا بعنوان french kiss
دعني أقل لك معلومة
المرأة إذا أعكيتها درهما تعطيك دينارا
وان اعطيتها قيراطا تعطيك اربع وعشرون
وتذكر دوما
انها انها لا تعطي الحب
بل تفيييييض به
شرط ان تعطيها انت امانا وحبا ورعاية
انصحك بقراءة كتاب اهداني به اغلى من عرفت ف حياتي
وهو ايضا شهير جدا
واسمه : الرجال من المريخ والنساء من الزهرة :)
انا لو كان معايا عربيه زى دى كنت
روحت بيها الصحراء وسبتها هناك
وروحت ماشيه
مش فاهم ليه كل لما بدخل وأقراء
موضوع بيحصلى حاجه من الأسبيهلال
أو الأنتعاش الفورى
الموضوع ده حالت الأسبيهلال معايا دلوقتى
هو فيه توافق بين النكد والمكرونه وأحدث الرنات المستفزه
لكن
بص
سلام بقى
إرسال تعليق