ليه الواحد بيتجوز؟؟؟
سؤال غريب مش كده؟
طيب معلش خليك معايا للأخر
حضرتك متجوز؟
طيب متجوز ليه؟
اتجوزت ليه يعني؟؟؟؟
لو سمحت ماتقوليش استقرار
الكلمة دي شكلهم بيوزعوها على قسيمة الجواز
بيوزعوا الكلمة لكن مابيوزعوش الفعل
ولا تكونش بتداري بيها خبتك
اعذرني على وقاحتي بس خلينا صرحا مع بعض
انت عايش لوحد رايك من دماغك فلوسك في جيبك صحابك على القهوة فشارك وتلفزيونك وماتشاتك وسلطاتك وبابا غنوجك
توجع دماغك ليه بقي؟
باللي يزاحمك في السرير ويعترض على تفكريك او ارائك -الاقتصادية تحديدا- ويقولك نتغدى بره واتفرج على المسلسل واروح ازور امي وتيجي تاخدي الساعة اتنين بالليل ومش مهم شغلك الصبح
ايه السبب اللي يخليك تشيل ده كله فوق دماغك
ايه
لقمة نضيفة
المطاعم ارخص من الجواز
اولا المطاعم مالهاش راس مال ثابت زي الشبكة والمهر والشقة
وبعدين اذا كانت المطاعم حرامية وبيغلوا الاكل عن تكلفته في البيت للضعف فافتكر انك واحد مش اتنين
يكفي انك هاتريح دماغك من انتظار الاكل
فضلا عن اختيارات الزوجه العبقرية لاكل النهارده
طابخة ايه النهارده يا سنية
طابخة بسلة وبتنجان
بس انا مابحبش لا البسلة ولا البنتنجان
مافيش غيرهم في السوق
على اساس ان السوق ده مافيهوش مكرونة ولا دقيق ولا حاجه ساقعة حتى
سيبك من ان في ريحة ملوخية بالطاشة طالعة من الشقة اللي جنبكم
اسمحلي
الاكل مش سبب بالمرة للجواز
امممم
طيب الهدمة النظيفة؟
اللي مشي على الاكل في المطاعم يمشي على الغسالة الاوتوماتك
حتى تنضيف الشقة
ممكن تجيب حد ينضفهالك وياخد اجرته ويمشي
طيب عشان البيولجي يعني؟؟؟؟؟
بس انا هافترض انك راجل محترم
مابتلعبش بديلك
وعمرك ما عرفت معنى البيولجي ده ايه
بس نت راجل محترم بقالك تلاتين سنه ماعرفتش البيولجي
نصهم على الاقل كنت محتاج في البيولجي ده
كمل جميلك بقي وانسي البيولجي
وبعدين البيولجي ده لو هايخليك تتجوز يبقي هايأثر على السيكولوجي بتاعك
يعني قصاد البيولجي هايجيلك سكر وضغط وقلب ومرارة وبنكرياس واحمد ومنه وتهى وحسين وسيف ورضوى
يمكن هو ده اللي خلاك تتجوز؟
العيال؟
مش عارف
دي بقي مش هاعرف اناقشك فيها
اسيبك انا بقي عشان تلحق تروح للمدام
هناك 4 تعليقات:
اولا:حمد لله على السلامه يا استاذ
شكلك كنت ناسى ان عندك مدونه
ثانيا:شكلك بردو نسيت ان الجواز ده لو كان فيه ضرر مكنش ربنا قالنا اتجوزوا
ثالثا:شكلك بردو نسيت حديث الرسول (صلى الله عليه وسلم)
تناسلوا فانى مباها بكم يوم القيامه
شيل من دماغك ان فى امل انه يتباها بينا
ما علينا بس تصورنفسك كده فى المستقبل ومفيش حد معاك وانت بتكلم نفسك من كتر الوحده والناس تشوفك فى الشارع تقول لا حول ولا قوه الا بالله الراجل اتجنن ولا العيال تقعد تلم فى بعضها الواد يقول للتانى الحق اهو الراجل اللى بيكلم نفسه اهو
تخيل انت بقى يعنى سكر وضغط وقلب ومرارة وبنكرياس ولا خفه عقل وممكن العقل يطير خالص
مفيش تعليق بعد
dadada
انا من راي الأخ لؤي يا جماعه
ليه الواحدة تتجوز وتجيب لنفسها راجل يتحكم فيها ؟
ليه يقولها روحي ومتروحيش واعملي ومتعمليش والبسي ومتلبسيش
علشان بيصرف عليها ؟
يبقى ايه الفرق بينها وبين الجارية ؟
ليه الستات هتموت عالجواز ؟
ليـــــــــــــــــه ؟
علشان يصرف عليها ؟
ما هيا قاعده ف بيت ابوها يصرف عليها ولا تتعلم وتاخدلها شهادة تتوظف بيها
ليه الواحدة بتتجوز ؟
علشان العيال ؟
علشان تحمل وبطنها تبقلل ويطلع روحها ف الخلفة وف الآخر تجيب عيل يزعق ف وشها بعد ما ترضع وتربي وتكبر ؟
و ف الآخر تفقد جمالها وقوامها ودلعها
كل دا ليه ؟ عشان احساس الامومة ؟
طب ما تتبنى طفل
وهو لما تتبنى يعني مش هيوقلها يا ماما ؟
عالاقل مش هينكر الجميل لانه عارف انها عملت فيه معروف وهو غريب عنها هيا مش مكلفة بكده
ليه الواحدة بتتجوز ؟
عشان الاستقرار ؟
صحيح زي ما لؤي قال الاستقرار دي كلمة بيدحكوا بيها علينا
استقرار ايه مع زوج ملوش هم ف الدنيا غير انه يامر وينهي وياكل ويشرب وينام وعاوز كل حاجته تبقى جاهزة وكانه جايب خدامة ف البيت
وعيال تعمل دوشة ودا بيزاكر ولا بيرضع ودا لازم اغيرله ودي اسرحلها شعرها ودا اسمع مشاكله
ليــــــه الواحدة بتتجوز ؟
عشان البيولوجي ؟
صحيح يا استاذ لؤي يفيد ايه البيولوجي طالما هيقصر عالسيكولوجي ؟
وف النهاية
بقول
يمكن عشان الحب
بس ف الحقيقة
مفيش راجل على وش الارض
بيعرف معنى الحب
او بيقدر احساس الحب والي بيحبه
يبقى ليه نتجوز ؟
ليـــــــــــــــــه
اسمحولي يا جماعه اقول رايي
اللي ممكن يكون مختلف عن رايك يا استاذ لؤي
رايي دا انا كونته من خلال تجربتي مع راجل انا بعتبره اروع راجل قابلته في حياتي - واللي هيكون قريبا جدا زوجي ان شاء الله - دعواتك لينا بقى
الزواج دا عبارة عن مشروع بناء حياة مستقبلية لفردين هيكونوا باذن الله لاحقا اكثر من اتنين
المشروع دا عبارة عن شركة
العقد بتاعها ينص على القبول من طرفه والايجاب من طرفها.
والأسس او المفاهيم اللي قامت عليها الشركة هي :
الحب
التفاهم
المشاركة
اما بقى عن اهداف الشركة فممكن نعد منها على سبيل الذكر لا الحصر :
وصول كل طرف بالآخر الى الجنة
التناسل لزيادة اعداد المسلمين واحد وبناء نشيءصالح يخلد ذكره بعد مماته ( اذا مات ابن آدم انقطع عمله الا من ثلاث صدقة جارية ، او علم ينتفع به ، او ولد صالح يدعو له )
دا اذا مكانش الولد الصالح دا هو صلاح الدين
و طبعا السكن
والمودة
والرحمة
السكن يعني الراحه اللي هتلاقيها مع ونيس يستقبلك بكل الحب ومستعد يخدمك بعنيه
و المودة يعني الانس والارتياح والائتلاف والحب اللي بيشرح القلب وبيساعدك انك تدي اكتر وينسيك همومك
والرحمة بوجود العطف والحضن والامان
ومن الاهداف التعارف
(يا ايها الناس انا خلقناكم من ذكر وانثى وجعلناكم شعوبا وقبائل لتعارفوا ان اكرمكم عند الله اتقاكم )
واحصان الفرج بالمتعه الحلال
الي قاللي انها ارقى بكتير من تسميتها بالعملية الجنسية وبس
وانها بتولد الحب والانسجام والمتعه الحلال اللي تساعدك حتى على غض البصر
لكن على الجانب الآخر
من الطبيعي ان الحياة متبقاش كلها وردي
لازم يكون في مشاكل
توترات
خلافات
ف رايي انها راجعه لاختلاف تكوين الانثى عن الذكر فسيولوجيا وسيكولوجيا
الراجل اكثر تحملا للمشاق الجسدية
الانثى اكثر تحملا للمشاق النفسية
يعني الراجل بيتحمل الشغل والشقا بره البيت بالعشر ساعات لكن الست متتحملش
وف نفس الوقت الست تتحمل الحمل والولادة والتربية ودي حاجه مش سهلة فوق شغل البيت والطبخ والتنضيف دا لانها مخلوقة بقلب كبير وعاطفة هيأت لآن تعطي الكثير مقابل القليل
الراجل مثلا اكثر صبرا وتأن وأرجح تفكيرا
المرأة أكثر رقة وعاطفة تجعلها قادرة على التعبير عن نفسها وعن مشاعرها
و لا تخلو نظرتها للأمور من سيطرة العاطفة عليها
في نفس الوقت بنجد ان الاختلاف دا هو هو نفسه الي بيحقق الاندماج بين الزوجين
فالرجل يحب ان يتباهى برجولته وقوته وقدرته على حل المشاكل امام المرأة
والمرأة تحب ان تشعر بضعفها واحتياجها الدائم لحضن وامان وحنان الرجل
وتربية الاولاد تحتاج الى حزم الأب وفي نفس الوقت حنان الأم
المخلوقان - الرجل والمرأة - مختلفان ولكن
متكاملان
خلق الله حواء من ضلع آدم عندما وجده في الجنة وحيدا لا انيس له ولا صاحب
يعني الجنة الي كلنا بنتمناها
آدم عليه السلام احس بنقص فيها
ولم يعوضه عن ذلك النقص شيئا الا وجود حواء
والخلافات اليومية ليست فقط في الحياة الزوجية
فانت كل يوم تختلف مع امك ابوك اخواتك
اصحابك ف العمل
سائقي الميكروباص
حتى مع دبان وشك ف بعض الاحيان :)
كل المطلوب هو :
1 - ان يتفهم الرجل والمراة طبيعه اختلاف كليهما عن الآخر
2- قليللا من التضحية والتنازلات مطلوبة حتى تستمر الحياة
3 - الصبر
4- الحب
وشكرا
إرسال تعليق