اقراها وماتمررهاش- اخيرا رديت

ده كان ردي على رسالة جاتلي بالميل كالعاده عن فيلم اباحي عن الرسول صلى الله عليه وسلم
عاملاه الدنمارك
استفذيت اخر تلات اربع حاجات وقمت عامل ربلاي تو اول وبعت الكلمتين دول


اسف يا جماعة
بس الرسالة استفذتني
بقابل كتير رسايل من النوع ده
مابلاقيش فيها دليل واحد
مافيش مصدر يقول ان الفيلم ده نزل
مافيش مصدر يقول ان الفيلم ده اتعمل او حد فكر يعمله اصلا
مافيش مصدر يقول ان رجال الاقتصاد هددو النائب البرلماني
مافيش مصدر يقول النائب البرلماني ده اسمه ايه حتى

الهدف الوحيد اللي انا شايفه من الرسالة دي هو تجميع ايميلات لاغراض دعائية
خصوصا اللي بيعيدوا ارسال الايميلات تاني
لان دول ببساطة
1 ايميلاتهم شغاله
2 بيقروا كل ايميلاتهم ومابينفضوش للعناوين اللي بتدل على المحتوى
3 عندهم شبكة اصدقاء على النت
4 مممكن نبعتلهم ايميلات من دي كل فتره عشان نحدث البيانات اللي عندنا
5 لو كنت مؤمن بنظرية المؤامرة كنت هاقولكم ان دي اهدافها جمع نوع من الاحصائيات بيقيس مدى تحمس الناس للدين وتناسب ده مع حماسة الكلام اللي بيتقالهم وتناسبه مع الدلائل اللي بتقدملهم


انا اتكلمت عن الموضوع ده قبل كده في الموضوعين دول

http://ta-kha-ref.blogspot.com/2009/10/blog-post.html

http://ta-kha-ref.blogspot.com/2009/12/blog-post_17.html

الرسالة دي بتوصل لكل اللي وصلتلهم الرساله معايا او قبل مني
انا بعتلهم الميل ده بدوسة زرار واحد

لو عندكم ايميلات مزعجة كتير
ياريت تربطوا بينها وبين اللي بتعملوه ده

اسف لازعاجكم

صفوت

بستغرب ليه في مشكلة بطالة في البلد

ضاعت

ده حصل من كام يوم
النهارده اقدر اقول ان مفاتيحي ضاعت
واقدر اقول كمان
مش مفاتيحي بس!!!

تدوينة حرة مباشرة

كوبري خمستاشر مايو رايق

ههههههههههههههههههههههههههه

مررها

يالمرة بقي مادام بندون على المحور
كان في موضوع واقف في زوري من زمان
كل الرسايل اللي بتجيني ومفادها باختصار
ابعت الرسالة دي لكل اللي تقدر عليه
الله يكرمكم يا ناس
يعني بغض النظر ان المواضيع دي بيبقي فيها احاديث غريبة على ودني شوية
وبغض النظر اني شايف-كواحد بتاع اي تي يعني- ان الرسايل دي ممكن استغلالها استغلال سيء عن طريق لم الايميلات منها
ده لو ماكانش ده الغرض الاساسي يعني
وبغض النظر ان الرسايل دي بتاكل نسبة محترمة من الميل بوكس
وبغض النظر عن انها -نفس الرسالة - بتجيلي اكتر من مرة من اكتر من صديق
ده وانا ماببعتهاش
فما بالكم بقي لو ببعتها

بغض النظر عن ده كله
جاتلك رسالة وعجبتك؟؟؟
كتبت رساله وعايز خلق الله تقراها؟؟؟
اعملك (ك) مدونة من ام بلاش واكتب فيها اللي انت عايزه
واللي عايز يقرا يقرا
واللي عايز ينشر يبقي يبعت لينك المدونة بتاعتك يا سيدي

طيب وايه الفايدة؟؟؟؟
اولا كون الرسالة دي تبقي عندك على مدونتك مرة واحده احسن ما يبقي عندي انا في الميل بوكس بتاعي عشر مرات
ثانيا بعد شوية لو مواضيعك فعلا الناس عايزة تقراها هاتبقي تخش على مدونتك اول باول
ثالثا ممكن تعمل للمدونة ار اس اس واللي عايز يتابعك يتابعك
رابعا لو الكلام اللي في رسالتك فيه حاجه غلط زي حديث موضوع او ما شابه
ممكن حد بيفهم في الكلام ده يدخل يعلق ويقول رايه
ويبقي اللي بيقرا الرساله بيقراها وبيقرا التعليقات اللي عليها عشان توصله المعلومة كاملة

وبعدين مساحة رسالته بصورها ببوربوينتاتها بسلاطتها ببا با غانوجها اكيد اكبر بكتير جدا جدا جدا من مساحة لينك مدونتك اللي هايوصلني على المي

عزيزي المراسل

ارحمنى بقي

تدوين اون ذا رن

للمرة الاولى -على ما اذكر- ادون وانا راكب الباص
على محور سته وعشرين يوليو
عمرك دونت على المحور؟؟؟؟

فوقوا - احمد مكي

صورة وصورة

زمان وانا في ابتدائي
كان استاذ محمد ربنا يمسيه بالخير
بيقرلنا درس اسمه
اجازة واجازة
كان بيتكلم عن واحد خد اجازة من المدرسة وقضاها ضحك ولعب وجد وحب
والتاني قضاها مزاكرة عشان كان عنده ملحق باين
او يمكن واحد قضاها نوم والتاني قضاها شغل
حاجه كده
الحقيقة ماكنتش فاهم ليه العنوان امبيجيواس اوي كده
ماكنتش اعرف اني هاستخدم في يوم من الايام نفس التكنيك العناويني

من فترة شفت صورة رمزية لشخص على الفيس بوك

كانت طفل بيعيط
وبعدها -ماشفتش صورة رمزية لنفس الشخص شبه الصورة اللي حطتها هنا

بس النهارده شفتله صورة رمزية مختلفة
صورته -من وجهه نظري-الحقيقية
صورته اللي صدقتها وبقوله انها اختيار جيد
طول عمرك اختيارتك مناسبه
بس المرة دي اختيارك طلع جيد
ربنا يوفقك :)

الوزيرة مشيرة خطاب وزيرة الأسرة والسكان

النهارده
خمسة وعشرين
اكتوبر
الفين وتسعة
الساعة عشرة ونص

اليوم والساعة اللي كلمتي فيهم اطفال بتشتغل عشان تصرف على نفسها واهلها في برنامج البيت بيتك
اطفال ماهماش اطفال شوارع
اطفال مش بتشحت في الاشارات
لا
اطفال شغالين بقالين وترزجية وجزمجية وعمال معمار

اطفال مابيروحوش المدرسة غير يوم اجازتهم من الشغل
ومع ذلك بينجحوا
او على الاقل بيقولوا كده
لكن الاكيد انهم بيشتغلوا
اطفال في منهم ابن مدرس وابن موظف

اطفال اهلهم سابوهم ينزلوا يشتغلوا -مش يشحتوا-ويسيبوا مدارسهم او على الاقل مايدوهاش اولوية

اطفال بتشتغل من وهي عندها سبع سنين

بفكرك تاني
اطفال بتشتغل مش بتشحت
والسبب
ضيق ذات اليد

فكان ردك اللائق بوزيرة مصرية
هو ان الافضل ان كان اهلهم يشحتوا عشان الاولاد دول يهتموا بالدراسة اكتر

ماسالتيش هما بينجحوا ازاي وهما مش مهتمين بالدراسة؟؟؟
ماحطتيش نفسك مكان اهلهم
ليه يشحتوا عشان يعلموا عيالهم في مدارس بتنجحهم من غير ما يتعلموا اصلا؟؟

ماسالتيش نفسك انتي ايه علاقتك بالموضوع كوزيرة للاسرة والسكان؟؟؟؟؟

ماسالتيش نفسك
هو وزارتك اللي بتاخدي على وزارتها فلوس دافعي الضرائب على رأي الامريكان
وزارتك دي عملت ايه للاطفال دول؟
عملت ايه للأسر دي؟؟
عملت ايه للسكان اللي في مصر دول؟؟؟؟




خليني انا اسالك سؤال؟؟
لا لا
مش هاسالك هاتقولي ايه لربنا يوم القيامة؟
ده ماليش دعوة بيه
ده بينك وبين ربك
ومش هاسالك انتي ليه بتمشي بحراسة

لان ممكن يكون السبب انك مش عايزة حد من العيال دول يشوفك في الشارع من غير حراسة

ومش هاسالك انتي ليه مركبة ستاير على ازاز عربيتك
لانه يمكن عشان الشمس ويمكن عشان انتي ماتشوفيش حد من الاطفال دي





انا هاسالك سؤال بسيط جدا؟
هاتعرفي تنامي النهارده؟؟؟؟؟

عزيزي المبتذل

المنظر : ساحة كلية


عزيزي المبتذل...
اختي المبتذلة...
انضموا الى الاتحاد القومي للمبتذلين
نحن نضمن لك حقك في الابتذال
شعارنا
ابتذل بحرية
ابتذل ونام خفيف
ابتذل بابتذال
الابتذال حق مشروع ودستوري لكل مواطن
ولو كان ليس دستوريا فنحن نسعى لجعله دستوريا
ابتذالك هو شخصيتك
---------------------------------------------------------------------
المنظر: مولد شعبي


اررررررررب ارررررررررب ارب
ارب واتفرج
العرض العالمي
بعد مالف امريكا واوربا
والصين وروسيا
واليونان وجنوب لبنان
بنقدمهلهكم النهارده يا حضرات
عشان بلدنا واهل بلدنا

الفنان العالمي
عباس حرِك
اللي دخل موسوعة جنيس للابتذال
استاذ الابتذال العالمي
ملك الاسفاف
...
...
...
وبكام التذكرة يا حضرة
بنص جنيه بس
ولا سعر رسالة المحمول
ولا سعر باكو اللبان ولا كيس مناديل
عشان بلدنا واهل بلدنا
اررررب واتفرج
----------------------------------------------------------------------
المنظر: استديو تصوير تلفزيوني

حضرات السادة المشاهدين
النهارده هانتكلم عن موضوع مهم جدا
موضوع الابتذال
موضة السنادي
ازاي الست تبقي مبتذلك اخر حاجه
ازاي نتكلم باخر ابتذال
موضوع النهارده شيق جدا وهانستضيف فيه........


---------------------------------------------------------

المنظر: برنامج ديني

ياخونا ياخونا ياخونا ياخونا
ليه ياخونا الناس بقت مبتذلة جدا
تلاقي المسلسلات بقة غاية في الابتذال
الاغاني -مش بتكلم هي حلال ولا حرام-لكن بقت مبتذله اوي
ياخونا ياخونا ياخونا ياخونا
الناس في الشارع بقت مبتذلة
ياخونا
معنا ضد الابتذال
---------------------------------------------------------

المنظر: مدونة تا خا ريف

تييييييييييييييييييييييييييييييييييييييييييييييييييت
هو ايه لامؤاخذة الابتذال اب الأحتتتتتتتتتتتتتتتتتتتتتتتتتتتتتتيت اللي ماشي في البلد التيييييييييت دي
خلاص الناس كلها بقت ولاد تيييييييييييييييييييييييييييييييييييييت من عالم تاني

يعني لامؤاخذة
انا افهم ان في ناس مش بتسلم على حريم
وافهم برده ان في ناس بتسلم
وافهم برده ان في ناس بتسلم وتبوس
لكن لامؤاخذه نسلم ونبوس ونحضن ونطول ونأفور عشان يبان اننا سبور ده لامؤاخذة مش اسفاف

افهم ان في واحده تلبس شورت
هي بنت متيييييييييييييييييييييييييييييييييت حرة
لكن لما تلبس الشورت وتشمره يبقي مش حاجه بنت تييييييييييييييييييييييييييييييييت تعصبك
افهم ان في مسلسلات بتتكلم عن ناس عايشة في قصور
لكن لما اشوف مسلسل تلاتين حلقة كله قصور مافيهوش واحد موظف من اللي ماليين البلد
ولا مافيهوش بياع مناديل
ولا سواق ميكروباص
ولا حتى حد من اللي بيركبو الاوتوبيس او الميكروباص او بيشتروا المناديل العادية دي يبقي مسلسل مسف
لما اللي قدامك يحاول يقنعك بحاجه
لا هو مقتنع بيها
ولا انت مقتنع بيها
ولا اي حد يعرفكم انتوا الاتنين مقتنع بيها
وكل الناس دي عارفه المعلومات دي كلها
ويقوم اللي قدامك يصر انه يقنعك بيها
لمجرد انه يوصلك معلومة معينه او احساس معين حس انه ماوصلكش كويس
يبقي ابتذال
لانه بيسحب الشوية اللي ماوصلكش كويس دول ويحطلك مكانهم احاسيس تانية
منها احساس بالابتذال
كانك بتشوف فيلم من افلام المقاولات ولا بتشوف طفل عنده ستنين تلاته بيشيش او بتشوف ست معدية التمانين سنة في كباريه بترقص على المسرح

كانك دخلت ماك ولا كنتاكي
وطلبت صاندوش سبايسي قام الراجل قعدك على ترابزيتك اللي اتأكد انها محجوزالك ونزلك السلطات والشوربة الاول وبعدين جابلك الصاندوش بعدها بربع ساعة في سرفيس فضة ومعاه شوكة وسكينه ومعلقة وفضل وراك واحد بكامانجا يعزفلك مقطوعة كلاسيكية

كانك رحت عيد ميلاد
فلقيت صاحب العيد ميلاد جايب البولشوي عشان يقدموا بحيرة البجع او كسارة البندق

ليه الحياة بقت بالابتذال ده
بعتذر عن شوية الشتايم الابيحة اللي قلتها النهارده بس بجد الموضوع ده منرفزني
بيس

تحويل البريد الالكتروني

كنت سالت نفسي في الموضوع ده سؤال
وكتجربة
هاشرح النهارده ازاي تسحب ميلاتك من ميل لميل تاني اجابة على سؤال اتسالته من حد وكان معايا الوقت اللي اعمل فيه الموضوع ده

تجربة النهارده هانسحب بيها ايميلات من ميل على الهوت ميل HotMail ونبعتها لميل على الجي ميل GMail

الفوائد
اولا نسخة احتياطية من الميلات كلها
ثانيا لو الميل اللي بتجيب منه ممكن يكون ميل الشغل والكوتا بتاعتك اتملت
ثالثا لو ميل الشغل برده وانت بتستخدم الاوت لوك ممكن يكون الميل ما بيحتفظش بالايميلات اللي انت بتبعتها
رابعا للاستفادة من امكانيات ميل الجي ميل


اول خطوة نعمل ميل على الجي ميل









تاني خطوة بعد ما ندخل على ميل الجي ميل ندخل على الاعدادات


نختار حسابات واستيراد

بعد كده

استيراد البريد وجهات الاتصال
ندخل بيانات الميل اللي احنا عايزين نجيب منه



بالشكل ده الميل اتظبط انه يجيب اوتوماتيك
لو تابعت في الاعدادات تقدر تظبط الجي ميل بحيث يمسح الميلات اللي بيجبها من الميل المصدر عشان تفضل الكوته بتاعته فاضيه لو عايز


نظبط السند ميل
يعني لما تحب تبعت ميل من الميل الاساسي الهوت ميل مثلا في المثال
تبعته من على ميل الجي ميل ويوصل للمستقبل باسم الميل بتاع الهوت ميل

كل اللي هاتعمله انك هاتيجي على الجزء بتاع ارسال البريد وتختار الميل بتاع الهوت ميل وتدوس على تحديد كافتراضي



بس خلاص
نعمل تجربة بقي
بعت ميل من الميل بتاع الجيميل على الميل بتاع الجي ميل برده وهانشوف هايوصل ازاي

وصل
تعالو نفتحه
نشوف هو مبعوت من مين؟؟





ملحوظة

اول مرة الجي ميل هاياخد شوية وقت في انه يجيب الميلات بتاعتك من على الميل الاساسي

بعد كده الجي ميل بيسحب الميل اوتوماتك لوحده كل ما يجيلك ميل
بس بيبقي في تأخير مابيزدش عن ربع ساعة


ده كان محاولة متواضعة لشرح طريقة تحويل الايميلات للجي ميل اتمنى انها تكون وفت بالغرض

ويكي

قريت في مدونة شبايك في الموضوع ده ان ال ايه ادوبي -وهي شركة سوفت وير-
بتقول انك المفروض ماتجاوبش على اي سؤال يجيلك على الميل
لكن تكتب الاجابة على ويكي -موقع ما اي حد يقدر يكتب فيه واي حد يقدر يشوفه-وتبعت لينك للحل

بصراحة الفكرة عجبتني
ولقيتها منطقية لدرجة ان الفكره مستخدمة منذ الالف السنين
واللي مابيكتبش في ويكي بيكتب في مدونته
وانا شخصيا ممكن اتزنق في معلومة فالاقيها على ويكي او على مدونة

ليه انا ماعملتش كده
ليه مش بعمل كده
ليه مش هاعمل كده؟؟؟؟؟؟؟؟


لا تعليق

لم أعد اصلح إلا للفناء

كلمة قرتها في سم وير
بغض النظر عن شاعريتها وكآبتها ونكدها
الا انها خلتني افكر فيها صحيح

مين بيقول الكلمة دي في حياتنا اليومية
فلقيتهم كتير
خد عندك مثلا الملف المنتشر على المحمول اليومين دول
اللي من القطعيه بتاعة الصعيدي اللي حول رصيد بتاع مية جنيه لبنت -واسمحولي في التعبير- بيمز معاها في التليفون وبعد تحويل الرصيد يكلمها عشان تفاجه انه ولد وبيشتغله

خد عندك الموظف اللي سرحوه من شغله

خد عندك طالب نص خريج ثانوية عامة

خد عندك واحد بيحط رجله في مركب وبيهاجر هجره غير شرعية

خد عندك موظف غلبان سمع عن مرتبات رؤساء مجالس ادارة البنوك

خد عندك واحد من رؤساء مجالس ادارة البنوك دي لسه جايب للواد عربية هامر وبعدها بشهرين لقي تيوتا منزله عربية اختها بنص التمن

خد عندك راجل غلبان وهو مروح لعياله اول الشهر اتسرق ولا اتثبت

خد عندك راجل اغلب منه وهو مروح لعياله اول الشهر ماتسرقش لانه ماعوش فلوس اساسا

خد عندك واحد اتجوز وبعد كام سنة اكتشف انه استخدم في حياته كل المنتجات الصيني حتى غشاء البكارة


خد عندك بقي شوية ناس مابيحبوش يقولوا الجملة دي
مش عشان هما فلة شمعة منورة
لا
يمكن عشان قروا البوست ده قبل كده

مراة الراجل بتاع الصيني ده

خد عندك الراجل الغلبان اوي اللي ماعهوش فلوس لما سرق الراجل الغلبان اللي معاه فلوس

خد عندك رئيس مجلس الادارة اياه لما عرف غلطته فأجر العربية سياحة او قسطها -باكتر من تمنها-للموظف اللي تحت منه او اللي تحت تحته

خد عندك الراجل اللي سمع عن مرتبات رئيس مجلس الادارة اياه منه هو شخصيا لانه يبقي حماه
فقرر انه يعمل اهم خطوه في حياته
انه يتجوز

خد عندك الراجل اللي بيهاجر هجرة غير شرعية لما يوصل ايطاليا عوم يقوم مقطع باسبوره ويسالوه انت منين يا حبيبي
يسكت
لانه لو قالهم مصري هايرحلوه ويتحبس بقية عمره

لكن لو قالهم ايطالي هايحبسوه يومين وبعدين يخرجوه ومش بعيد يطلعوله بطاقة ايطالي بدل فاقد ويكتبو فيها ناقص اهلية
بس ايطالي


خد عندك نص خريج الثانوية العامة لما يدخل كلية خاصة ويقعد طول النهار في الكافيتيريا يبيع حشيش

خد عندك الموظف اللي سرحوه من شغله فراح شرشح لشغله في الجرايد وخلاهم يكتبوا ان التسريح ده بسبب الازمة الاقتصادية مصر اتأثرت بيها فالوزارة المسؤوله عن الشركة دي رجعته غصب ويمكن اول مايرجع يطلب اجازة او حتى علاوة


خد عندك الراجل اللي اتنصب عليه في المية جنية عشان الصوت الحنين
لما قعد اسبوع يعيط زي النساوين وبعدين هبط عليه الحل السماوي
نساوين نساوين
وقام بلعب نفس العملية تاني بس المرة دي طالع في دور (الولية)



في كل الحالات دي
ولا واحد من الناس دي يبقي بيقصدها فعلا
ليه؟
لانه لو مقتنع بكده ماكنش ملا الدنيا كلام عن عدم صلاحية لاي حاجه-منها الكلام-الا الفناء


ايها الاخوة
ارجوكم ...............................دعونا نفنى في صمت

من اسخف ما قرأت

ضروووووووووووووووووووري

"المصل بتاع انفلوانزا الخنازير اللى عاوزين يطعمونا بيه يجيب السرطان والموضوع ده مبيبانش الا بعد التطعيم بسنة وده مش كلامى ده كلام برنامج اسمه 48 ساعة بيتذاع على قناة المحور الفضائية ) خد خطوة وعرف الناس خليهم مياخدوش المصل ويعرفوا اولادهم فى المدارس دى مبعوتالى والله اعلم بصحتها يا جماعه والله الرئيس حسني مبارك بنفسه حذر في الاخبار من الموضوع ده وقال كل مواطن لازم يتأكد من سلامة المصل ربنا يعافينا ويعفو عنا جميعا"



رسالة تلاقيها مبعوتالك
المشكلة انها مبعوتالك مش شخص عندك على الميل
يعني مش هاتروح سبام
يعني هاتضايقك هاتضايقك
كلام كلام كلام
مافيش دليل
هي انفلونزا الخنازير اصلا بقالها كام سنة عشان المصل بتاعها يبقي بقاله كام سنة فنعرف انه بيجيب سرطان بعد ما بيتاخد بسنه

بلاش
يمكن في طرق علمية انا ماعرفهاش
طيب انهي مؤتمر علمي قال كده
انهي دكتور
في انهي وقت وانهي داهية
رسالة هاتنتشر زي النار في الهشيم
وتأثر في ناس كتير
يمكن ماياخدوش المصل ويطلع كويس ويموتوا بسبب واحد نشر الرسالة دي
ويمكن يعملوا زيي ويستسخفوا الرسالة فياخدوا المصل ويطلع زفت فيموتوا برده بسبب عدم موضوعية واحد نشر الرسالة دي

الرسالة دي وزيها كتير
زي مش عارف مين في انهي دولة بيعمل ايه وبيقول ايه ضد الاسلام
مش عارف مين قال ان الحديث ده اللي بيقوله تتحققله كل امنياته
وتدور على الحديث ماتلاقيهوش اصلا لا صحيح ولا ضعيف
مالتلقيهوش اساسا غير في الرسالة دي
تدور على ابن التيت اللي بيقول على الاسلام ده تلاقيه فص ملح وداب
طب ياخونا جبتوا الحديث من انهي صحيح
هسسسسسسسسسس
طيب ابن التيت ده قال الكلام ده فين
صمت

ليه احنا بتكلم الاول وبعدين بنسكت
في الوقت اللي البني ادمين الطبيعيين اللي بيتقدموا ويتطوروا ويتنيلوا على عنيهم يبقوا دول عالم اول
بيسكتوا الاول وبعدين بيتكلموا

خلاص تراث سيد درويش غناء وسط البلد

محسوبكو انداس صبح محتاس
مسختو جزمة ياناس
مافيش فلوس بقيتو منحوس
فقرتو خلاص
نشتغلو في إيه يافندي يابيه
مادام البخت موريه
مافيش تهييس مافيش قميص
مافيش لباس
فين نروخو سابرستيه دنيا لسه تربيتيه
أيام الأنس فنيتو خلاص
محسوبكو انداس صبح محتاس
كفرتو ياناس
بوكر مافيش يابودرويش
قهاوي رقص مافيش
إزاي يافندي ابن الكيف يقدر يهيص
بوكر مافيش يابودرويش
قهاوي رقص مافيش
مادام مافيش بدال يغنيش
نبيع ورنيش
دوخنا نروخ لمين سوخنا يامسلمين
نشكي نقول لمين آه
حانتيش مانتيش يابو الريش
إن شالله تعيش
سبت الخمارة سكنت ف خارة مافيش ولا واخد بارة
علشان نروخ كلنا لطوخ ونيجي منفوخ
أفتي كلا بولي كالا سمك باكالا
أحيه أمان أمان فين المصر بتاع زمان
والمدام فامولاكي
والله ياخرلمبو كانت أيام
فاريج لي كي

رمضان 2009

كالعادة
اسم البوست يحمل بعض الخبث مني
اسم يرفعه في محركات البحث
وده بحثا مني عن زباين جداد
عشان اكيد الزباين القدام بطلوا يجيوا
ده اذا كان في زباين قدام اصلا
بس عشان مابقاش خبيث اوي
انا وضحت من الاول اهو

المهم
كل يوم
بيحصل لي او قدامي او بسمع عن موقف يستاهل التدوين
يستاهل اني اكتبه عشان مانسهوش
يستاهل ان الناس يعرفوه عشان يحصل تبادل للخبرات
لكن كل مرة باجي اكتب
بلاقيني مش عارف اكتب
مش نافع اكتب
الكلام ده يا اسرار يا خصوصيات يا كلام انا مش عايز حد يعرفه عني عشان اكتر من سبب
فبقول بلاش اكتبه
المشكلة ان ده المكان الوحيد اللي بعرف اكتب فيه من غير ما الكتابة تضيع
فكرت ابعت لنفسي ايميلات
بس لقيت الدنيا هاتتوه
الا لو عملت ميل مخصوص للموضوع ده
فكرت اقفل المدونة عشان اكتب فيها اللي انا عايزة من غير ما حد يقراه اصلا
لقيت ان ده هايلخبطني
هايبقي في مدونة للمواضيع العامة ومدونة للخاصة
ماتحمستش اوي
النهارده هاتكلم عن الرسالة اللي وصلتني
واحد كاتبلي
ما ملخصه
ان كل سنة وانا طيب ووانا اغلى الناس واقرب الناس
وماضي اسمه في الاخر
لانه باعت الرسالة من نمرة غريبة
طبعا فضلت حوالي عشرين ثانية افتكر مين ده اللي اسمه مكتوب
وعرفت في الاخر تخمينا وليس تأكيدا
ساعتها قعدت اضحك
كفايا كده النهارده

لو كنت اعرف

لو كنت اعرف بان الوعد مداري
ماكنت اطلع ولا اخرج اصلي من داري
ياريت ماحبيت
ولا كان الهوى جالي
وداري على بلوتك ياللي اتبليت داري




محمود الجندي
مسرحية انها حقا عائلة محترمة

تعب الشغل

شكلي كده هاحترف التدوين
دي تاني تدوينة في نفس الشهر
واحتمال تبقي التالته في نفس السنة
انا لازم اتعالج من التدوين ده

ما علينا
النهارده كنت تقريبا فاضي في الشغل
حاجه ممله جدا
كنت نمت في بيتنا احسن
المشكلة اني ببقي مضايق برده وانا في ضغط شغل
بس مرة السمكري قالي
تعب الشغل احسن من تعب قلته
صدقته ساعتها عشان فهمت ان قصده على الفلوس
وصدقته النهارده عشان فهمت ان قصدي على الفكر

انا ليه عندي بلوج

مش عارف ايه السبب اللي مخليني مالغيش المدونة دي؟؟
كسل؟
فاكر اني هادون بانتظام في يوم من الايام؟
معقولة هايجيلي فترة واكتب فيها كل يوم او يومين حاجه؟
مش عارف
ابتديت احس بسخافة التدوين
على الاقل التدوين الجولوبال ده اللي كل الناس ممكن تقراه
يخليك تحط خمسين قيد على نفسك وانت بتكتب
تقول بلاش اكتب ده لحسن فلان يفهمه غلط
او فلان يفهمه صح فيزعل
او فلان يفهمه اصلا فاطلع كداب لما قلت عليه مابيفهمش
في الاخر تكتشف انك مش هاتكتب حاجه
او مش هاتكتب حاجه تستاهل انك تكتبها
ده طبعا لو ماكنتش فيلسوف وكلامك درر
بيس

فكرة مجنونة 1

بتجيلي افكار مجنونة ساعات بس بنساها بسرعة

النهارده جاتلي فكره مجنونة فقررت اني ادونها

ليه الشرطة محتكرة البلد؟؟!!!

ليه مايبقاش في اكتر من شرطة زي ما في اكتر من شركة محمول؟؟؟؟

تخيلوا معايا

يبقي عندنا في البلد شرطتين

رجال الشرطة الاولانية ليهم لون لبس معين اي كان نسميه احمر مثلا زي فودافون

والتانين يبلسوا برتقاني زي موبينيل

وبالمرة بقي يبقي عندنا شرطة تالته لابسة اخضر زي اتصالات

طيب ليه؟؟؟

عشان لما يبقي ظابط احمر مفيم الازاز او بيبتز سواقين الميكروباص في الشارع يقفله ظابط من شرطة تانية

عشان الفساد يقل

الشرطة او اي حاجه تانية في الحكومة فيها فساد سببها-من وجهه نظر فكرتي المجنونة-هي احتكار المنصب

لو عندنا اتنين شرطة

وبما ان اللي عندنا اصلا مكفيين البلد

فممكن نقسمهم

على تلات وزارات مختلفة للداخلية

ساعتها بقي

الميزانية هاتتقسم على تلاته

والتقسيم ده مش هايبقي بالتساوي والا نبقي ماعملناش حاجه

هايبقي بناء على تقيم من الشعب

انت كمواطن تروح تقيم الشرطة الحمرا والشرطة البرتقاني والشرطة الخضرا

عجبك مين فيهم

مين فيهم ماضربكش على قفاك

مين فيهم ماخدكش على القسم عشان يفرد عضلاته عليك

مين فيهم ماعكسكيش وانتي رايحة تعملي ورقك

مين فيهم ماسبتكش في الشارع وعملك مخالفة عشان عطست في الاشارة عشان ياخد منك اي مصلحة

مين فيهم يا ست ياكبيرة وانتي بتعدي شارع صلاح سالم مسك ايدك وعداكي عشان مش عارفة تعدي لوحدك

مين فيهم منعك انك تنتخب رئيس الجمهورية

مين طلعلك خمسين مشكلة في عربيتك وانت بترخصها عشان تعديله حاجه

مين وقفك في كمين وفتشك او فتش عربيتك من غير اذن نيابة

مين لما اتسرقت رجعلك حاجتك -لان دي شغلته اصلا-؟؟

مين من الاخر ترشحه عشان ياخد جزء اكبر من ميزانية الداخلية

يعني انهي ظابط مرتبه هايزيد واني ظابط مرتبه يقل

ممكن حد يقولي دي لا فكرة مجنونة ولا حاجه

انت بتتكلم عن الخصخصة

اقوله مش خصخصة

انا بتكلم ازاي نرجع للوضع الطبيعي

ان الحكومة دي ناس شغاله عن الشعب عشان تحققله مطالبه

انا بقول ان المواطن مادام بيدفع ضرايب يعني حق الدولة ليه الدولة ماتديلوش حقوقه

الفكره فكرت فيها اننا نعممها

يعني نيابة ومحكمة ووزارات

سرحت حتى في الرياسة

بس لقيت اننا هانتكلم في مفهوم جديد هو الدول المتنافسة

اروح ادفع ضرايبي لانهي حكومة

ممكن نظرح ده في تدوينة تاني

المهم دلوقتي

ايه رايك في الفكره

لو مقتنع قول اسبابك

لو مش مقتنع قولي اسبابك

تفتكر التقيم يبقي على ايه

ايه تصوراتك

يمكن الفكره المجنونة دي تبقي حقيقة في يوم من الايام

اختيار

جالك أوان ووقفت موقف وجـــود
يا تجود بده يا قلبي يا بده تجــــود
ما حد يقدر يبقي علي كل شـــــــئ
مع إن – عجبي – كل شئ موجود
عجبي !!!

صلاح جاهيين

هذه الحادثة حصلت في باريس ، وقد تحصل فيأي وقت بأي مكان آخرقبل بضعة أسابيع وبالتحديد في السينمافي باريس، أحست إحدىالفتيات بوخز في المقعد، وعندما قامت ،وجدت إبرة مغروزةفي المقعد، ملصق بها ورقة مكتوب عليها( لقد حقنت بفيروس الإيدز)مركز الحماية من الأمراض أو السيطرة على الامراضأبلغ عن وقوع هذه الحادثة في مدن أخرىغير باريس،وبعد فحص الإبر وجد أنها حاملة فعلالفيروس الإيدز.كما أنها حصلت في لبنانكما أبلغ المركز بأن هذا النوع من الإبروجد في الصراف الآلي ،ونطالب من الجميع توخي الحذر عند مواجهةمثل هذه المواقف،يجب التمعن والتدقيق في المقاعد قبلالجلوس عليهاكما يجب إيصال هذه الرسالة إلى جميع منتعرفونه،وكل من يهمكم أمرهم وخاصة أفراد العائلةالصغير قبل الكبير.مؤخراً، صرح دكتور في الهند، حيث أن هذهالحادثة حصلت لإحدى مرضاه،أيضاً في السينما بنيودلهي، كانت فتاهمخطوبة، على وشك الزواج، وجدتالإبرة بعد أن وخزتها وقد كان ملصق بهاورقة مكتوب عليها( أهلا بك في عالم الإيدز)الدكتور أخبر عائلتها بأن مفعول الفيروسلن يبدأ إلا بعد 6 أشهر، وعادةًالمصاب يعيش مابين 5 إلى 6 سنوات، ولكنالفتاة توفيت بعد 4 أشهر.يجب جميعاً أن نتوخى الحذرتخيل بأنك بإرسالك هذه الرسالة قد تنقذحياة شخصلا تغفل عن هذا الموضوع... رجاءً خذ منوقتك بعض الثواني وليس الدقائقوقم بتمريرها لكل من تعرفه
المصراوي التعليمي

المصدر

http://www.almassrawy.com/forum/showthread.php?p=115143#post115143

التعليق

مش عارف الحكاية دي حقيقية ولا لا

لكن للأسف لو حقيقية صعب اوي تخلي الناس تفتكر كل مرة يقعدو على كرسي عام

سينما مسرح محطة اوتوبيس كرسي في المواصلات

صعب تخليهم ياخدو بالهم

وللأسف الحكاية دي لو مش حقيقية يبقي الموضوع ده بيدي فكرة جبارة سواء للي عايز يأذينا عشان عايز ارضنا او اللي عايز يأذينا لان الايدز خلاه حاقد او جاحد على المجتمع

ملحوظة

لا اقصد من هذا الموضوع الا المعلومة والتعليق على الموضوع بشكل مباشر ولا اقصد اي شيء اخر

قصة قصيرة

للبيع....
حذاءا طفل رضيع.....
لم يلبسا قط....

تمت!
هيمنجواي

امي والشغل والبطاطس

عمري ما هافهم ايه اللي يخلي امي تقوم بالليل لما ارجع من الشغل تقشر بطاطس وتقطعها وتحمرها عشان اكلها
مع انها ممكن تعمل حاجه اسهل بس هي عارفه اني بحب البطاطس
مع اني ممكن اعمل لنفسي اي اكل تاني
مع اني ممكن اكل بره اصلا
مع اني انا اللي جعان مكسل اكل اساسا


ربنا يخليكي ليا يامه