احتفظ بنسخة منها هنا لسهولة الوصول والرجوع اليها واحرص على نقل رابطها وشكر مؤلفها طبعا على ذكري في الاحداث
مقدمة
هذه قصة جديدة وحقا لم اكن انتوى البدأ فى قصة جديدة لأنى دائما انشغل ولا اكمل ما بدأت من قصص ولكن الضغوط كانت اكبر منى
عندما تنظر حولك غالبا سوف تجد اقرب الناس اليك ومعظمهم من نفس تفكيرك او اقرب الى تفكيرك ولا تستطيع ان تندمج او تنسجم مع من تختلف كثيرا
فعندما نجد مجموعة من الاشخاص لدى كل منهم شخصية قوية مستقلة مختلفة بقدر كبير ولكن يستطيعون ان يتحدوا ويتحابوا وينتجوا ويتقاربوا
فسوف تجد الحقيقة التى لا نسطيع ان نقبلها بسهولة هو ان عند توافر مستوى من المبداىء مشترك وتبادل الاحترام وايضا النقاء
بالتأكيد سوف تلمس ما اتكلم عنه
قصتى تتحدث عن مجموعة شخصيات منفردة فى تصرفاتها نوعا ما شاء القدر ان تتجمع فى وقت ومكان واحد مع انى على قدر كبير من الثقة
ان اى شخص يحاول ان يجمع مثل هذه الشخصيات فى مكان واحد ظنا انهم سوف يتفقون وينجحوا فى تحقيق هدف ما فهو واهم
هذه الشخصيات اثرت كثيرا فى نظرتى للحياه وتعلمت منهم الكثير وعشت معهم الكثير فا اردت ان اكتي هذه القصة لكى تكون ذكرى لنا
وان اشارك بتفاصيل وردود افعال جديرة بالذكر
القصة سوف تكون منفصلة متصلة بمعنى كل حلقة او اثتنين سوف تحمل موضوع جديد وموقف جديد وردود افعال جديدة
سوف اعتمد على معرفتى بهذه الشخصيات فى تخيلى لردود افعالهم
القصة لها ابطال وسوف يكون هنالك ضيوف شرف فى الحلقات وجميعهم شخصيات حقيقة
وسوف تكون القصة كوميدية اجتماعية فكرية ساخرة وطبعا سوف تكون بالعاميـــــــــــة
ومن دلوقت بقولها اى محاولات تهديد عشان اوقف كتابة او اتجنب شخص انا قررت اتكلم عنه احب اقوله انسى لو رشوة ماشى واهو مصلحة ناكل عيش
نيجى بقى للأسم كان موضوع صعب انى الاقى اسم مناسب بس كان فيه بعض المشاركات زى:
نعم نسطيع ان نعملها
برا الصندوق
مطورين النينجا
يجب ان تأخد مامتك معك هنا
وتم اختيار " نعم نسطيع ان نعملها " لتكون اسم القصة مع العلم ان برا الصندوق كان مهم وبقلها بردوا من دلوقت
اللى فاكر هيلاقى قصة تقليدية شوية هزار ومواقف عادية اقول لأ ابسوليوتلى المواقف سوف تكون غير متوقعة او ردود الافعال نفسها
كنت ناوى اشرح او اعمل مقدمة عن الشخصيات بس قررت اعمل دا فى اول حلقة فممكن تكون حلقة بسيطة لأنى هتكلم عن كل الشخصيات فيها ومجرد هدى نبذه عنه ولكن باقى الحلقات سوف يكون العمق بتاعها اكبر بكتير عموما ما تيجوا نشوف
----------------------------------------------------------------------
الحلقة الاولى
فكرت ازاى ابدأ ارسم الشخصيات وجت فى دماغى فكرة ان دايما ملامح الشخصية بتترسم من الطفولة فتخيلت الشخصيات دى متجمعة فى فصل واحد وسنهم تقريبا 7 سنين ونشوف ازاى بيفكروا او بيتصرفوا
مع العلم ان معظم الشخصيات سنها فوق الخمسة وعشرين سنة حاليا وكمان منهم المتزوج
هيكون معانا انهاردة ضيفة الشرف صفاء وهتقوم بدور المدرسة
صفاء ليها طريقة مختلفة فى التدريس هى مقتنعة ان المدرسة مش مكان بس لحشو عقول التلاميذ وبعيدا عن نظريتها فى التعليم فهى مخصصة حصة اسبوعيا لمناقشة مفتوحة
بينها وبين التلاميذ منها بتقرب منهم اكتر ومن عقليتهم ومنها فتح مجالات تفكير جديدة ليهم ومشاركة الافكار بينهم وبين بعض
وانا شايفها دلوقت شايلة حاجات كتير فى ايدها وداخلة الفصل
صفاء: صباح الخير يا اولاد شكلكم مصحصحين انهاردة طبعا عشان مش هناخد حاجة من المنهج
فا ابتسم الاطفال وكانت بتطلع ادواتها من شنطتها
هديل: مس صفاء...مس صفــاء.... مس صفـــــاء
صفاء:ايه يا هديل مش شيفانى بطلع الحاجة
سكتت هديل وحطيت صباعها على بقها
صفاء: عايزة ايه يا حبيبتى
هديل: نقفل الباب اصل فى واحدة صاحبتى واقفة بعيد عمالة تطلعلى لسانها وعارفة انى مش هعرف اعمل زيها عشان منا فى الفصل
ابتسمت صفاء مشكلتك بس ان فى الفصل ماشى يا هديل وادى الباب اتقفل
بمجرد وصول صفاء لمنتصف الفصل وهتبدا تتكلم
لقت اللى فتح الباب ودخل على طول من غير كلام
صفاء: هيثم اقف لو سمحت
هيثم بصلها كدا وقال نعم
صفاء: مش المفروض قبل ما تدخل الفصل تخبط وتستأذن
هيثم: استأذن ليه دا الفصل بتاعى
صفاء: لأ المفروض بتستأذن لما تدخل اى مكان مقفول وكمان تسلم على زمايلك تقول صباح الخير مثلا مش داخل مكشر فى وشك
وراحت مقطعاها هديل
هديل مس صفاء...مس صفــاء.... مس صفـــــاء:
صفاء: ايه يا بنتى فى ايه؟
هديل: هيثم نسى الباب مفتوح البنت عمالة تطلع لسنها اهيه اهيه واقفة اهيه
صفاء: خلاص روحى اقفليه
وراحت تقفله وهى بتقفله راح مطلعة لسانها للبنت وقفلته
صفاء: خلاص يا هيثم اتفقنا
هيثم: ماشى
صفاء: انت ايه اللى عامله فى وشك دا ؟
هيثم: دقنى
صفاء: دقنك ايه هى الدقن بتترسم ؟
هيثم: اصلى كدا كدا هربيها فقلت اعملها من دلوقت:
صفاء: يا هيثم لازم تعيش سنك ولما تكبر وتحب تربى دقنك دى حاجة ترجعلك يلا روح اغسل وشك
خرج هيثم من الفصل يغسل وشه
ولسه هديل هتقول مس صفاا.....
راح قايم لؤى جارى بسرعة قفل الباب وبصلها وقالها : حراااااام هتشغلينى بواب عشان اللى بتعمليه دا
صفاء: برافو عليك يا لؤى ارجع مكانك لو سمحت
وهو ماشى قلتله استنى يا لؤى
صفاء: هو دا اليونيفورم ولا حاجة تانية
لؤى: بصى يا مس لو هتبصى عليه من حيث عدد القطع فهو اليونيفورم ولو هتبصى عليه من عليه من حيث الالوان فهو بردوا اليونيفورم
صفاء: بس مش هو دا اليونيفورم
لؤى: اه صح عشان مش عليه البادج بتاع اليونيفورم فاتيتنى دى
صفاء: ممكن افهم
لؤى: اصلى خرجت بعد المدرسة امبارح ورحت مكان كدا اتفرج ازاى بيصلحوا العربيات فهدومى اتبهدلت فا لقيت هدوم شبه اليونيفوم لحد ما نصلح الغسالة اللى بوظتها محدش قالى ان موتورها مش زى موتور العربية اصلااااااااااا
صفاء: موتور عربية !! وايه الشنطة دى كلها
لؤى: دى فبها حاجاتى كتب المدرسة كلها افرض احتجت ابص فى اى حاجة الاقيها وكمان شوية حاجات بتساعدنى كدا
صفاء:ربنا يكون فى عون مامتك المهم عايزكم تجيبوا افكار نزين بيها الفصل بس خلينا فى موضوعنا الاول تحبوا تتكلموا فى ايه انهاردة:؟
هشام رفع ايده
صفاء: قول يا هشام
هشام : هطلب طلب الاول بس ممكن دا يدايق هديل
صفاء: ليه يدايق هديل؟
هشام : عايز افتح الباب بس اوريكى حاجة
هديل: ليه يا هشـــــــــــــــــام البنت واااااااااااااقفة
صفاء: مش تبصلها يا هديل وادى الباب يا هشام فتحته اهوه
هشام: انا ملاحظ ان نور الشمس اللى كان موجود اتحرك شوية وبعدين بعد اربع حصص الشمس عند نص اليوم يعنى بتلف وبتيجى عن الشباك وبردوا نورها بيفضل يتحرك
صفاء: اه هقولك يا هشام انت عايز تتكلم عن الشمس وحركتها دا موضوع مهم بس صعب شوية
هشام: لأ انا عارف ان الارض بتلف حوالين الشمس ودا طبيعى يحصل وعشان كدا فيه ليل ونهار
صفاء: ما شاء الله امال بتسال على ايه
هشام: انا بتكلم اننا ممكن نستفيد منه اننا نحط زى مرايات عند الشباك والباب تعكس نور الشمس كدا هتبقى الشمس نورها فى الفصل طول فترة اليوم الدراسى
صفاء: حلوة الفكرة يا هشام هنشوف ازاى ينفع نستغلها فى تزيين الفصول بس نستخدم مرايات
لؤى: انا معايا حاجة زى المراية يا مس
صفاء: دى عدسة يا لؤى مش مراية وخلو بالكم
عشان العدسات لو اتركز عليها نور الشمس ممكن تحرق اى حاجة قريبة منها
صفاء: بالنسبة للثلاثى اللى ورا دول بتعملوا ايه
صفاء: انا بنده عليكم علي فكرة نورهان... اميرة... كمال انتوا قاعدين ليه ورا كدا ؟ يا كمال انت هادى جدا قاعد ليه مع الاتنين المشكلة دول
نورهان: يا مس احنا ساكتين اهوه مش بتكلم
صفاء: ماهوا دا اللى مخوفنى طيب يا اميرة انتى كنتى قولتى هتنغنى المرة دى اغنية فاكرة؟
اميرة: اه يا مس فاكرة
صفاء: طب يلا غنيلنا اغنية بولا بولا اللى اتفقنا عليها
اميرة: على فكرة بقى اسمها فولا فولا مش بولا بولا وراحة باصة لنورهان قالتلها ايه المس دى
نورهان: ضحكت قالتلها معاش هناخدلك حقك
فراحت تراجع اميرة الاغنية مع صفاء
نورهان بتسال كمال بتعمل ايه؟
كمال: انتى مش واخدة بالك المس قالت ايه ؟
نورهان: قالت ايه
كمال: بتقولك لو خلينا نور الشمس يجى على عدسة ممكن تحرق حاجة زى الورق مثلا
نورهان : وانت بتعمل ايه بقى انت عارفنى بحب العب بالورق جدا
كمال:لألألأ دنا هحرق الورق
نورهان ازاى؟
كمال: اصلى معايا منقلة فيها عدسة صغيرة فا حنا نحطها قدام الشمس ونحط تحتها ورقة فا تتحرق
نورهان: الله دى فكرة حلوة قوى
كمال: خدى حطيها جنبك بقى انت قريبة من الشمس
نورهان: لأ تلسعنى
كمال: لأ انتى بعيد وبعدين هعملك حاجة جامدة بالورق
نورهان: هتعملى صاروخ؟
كمال: صاروخ ومركب كمان
كمال خلص المركب والصاروخ واداهم لنورهان ولسه الورقة متحرقتش ولا باين عليها انها هتسمر حتى
نورهان خدت الصاروخ وراحت رامياه على هديل
هديل: انتى يا نورهان انتى بتحدفى ايـــــــــــــه؟
نورهان تحاول تلفت نظرها انها تسكت صفاء هتاخد بالها مفيش
هديل: دا حلو اووووووووووووى الصاروخ دا عملتيه ازاى خالى بالك المس تاخد بال....
راحت صفاء بصالها
هديل: تاخد بالها من الصاروخ
نورهان:الله يخرب عقلك
صفاء: مين عمل الصاروخ دا؟
كله ساكت
بصت لنورهان: قالتلها مش انا اللى عملته
وراحت باصة لكمال:
صفاء: مش عايز تقول حاجة ؟
كمال: بصى بقى اصلا انتى بتضحكى علينا والعدسة مش بتحرق حاجة لما الشمس بتيجى عليها
صفاء: قول تانى كدا ايه بيحرق ايه انت كنت بتعمل ايه
حكالها بالتفصيل موضوع المنقلة والعدسة
صفاء: اصوت اسمع عم اسماعيل البواب
هديل: ممكن صاحبتى اللى برا دى تسمع وتندهله
صفاء: ااااااااااااااااااااااااااه دماغى
صفاء: بصى يا كمال موضوع العدسة دا بتكون نوعيات خاصة من العدسات وقوية انما اللى فى المنقلة دى متعملش اى حاجة انت بقى اللى حدفت الصاروخ؟
كمال: لأ انا عملته بس
صفاء: بتعترف بسهولة جدااااا عموما هعديها المرة دى عشان عجبنى ابقى علمنى ازى اعمله
صفاء: ممكن نرجع بقى لفكرة ازاى نزين الفصل عايزة من كل واحد فيكم فكرة بس بشرط كل واحد يقول حاجة تكون ماشية مع افكار اللى قبليه
وبدأ يتناقشوا فى افكار مع اختلافها كانت كلها متفقة مع بعض وكونت شكل جميل جدا للفصل
والنشاط دا اتعمل مع كل الفصول والنتيجة كانت ان دا اجمل فصل اتزين
وطبعا بالصدفة المقصودة لقوا كل حاجة الفصل محتاجها فى شنطة لؤى
اشوفكم الحلقة الجاية
ليست هناك تعليقات:
إرسال تعليق