كان في مسلسل اطفال زمان اسمه بلاد السعاده
كان بيحكي عن اتنين بيلفوا الارض عشان يوصلوا لبلاد السعاده
ودي كانت احدى الحلقات
وصل الغريبين بلد جديدة
قابلهم واحد من اهل البلد
قالهم تعالوا اوريكوا أغرب حاجة عندنا في بلدنا
قالوله هي ايه؟؟؟
قالهم المحكمة!!!!!
راحوا المحكمة
لقوا واحد رايح للقاضي يشتكيله من واحد تاني
القاضي قاله مالك
قاله انا حرامي رحت أسرق بيت فلان
وعشان ماعييش مفتاح
قلت ادخل من الشباك
ولما جيت أدخل من الشباك
وكنت متشعبط فيه
الشباك طلع ملخلخ وخدني ووقع
فلما وقعت رجلي اتكسرت
وانا عايز تعويض
عن الكسر اللي في رجلي ده
قام القاضي سأل فلان ده قاله
أزاي يا راجل انت ماتركبش الشباك
بتاع بيتك مظبوط عاجبك كده؟؟؟اديك
هاتتشنق عشان غلطتك دي
فلان ده قاله يا سيادة القاضي
مش انا اللي مركب الشباك
ده النجار هو اللي ركبه
فأمر القاضي ياحضار النجار
ولما جه القاضي سأله وقاله
إزاي يا راجل انت ماتركبش
الشباك بتاع فلان ده مظبوط
عاجبك كده اديك
هاتتشنق
قام النجار قاله مش ذنبي انا
يا سيادة القاضي ,
اصلي لما كنت بركب الشباك ده
كان في واحد في الشارع
راكب حصان وقام الحصان
قعد يتنطط لدرجة ان صاحبه
وقع من عليه فانا قعدت اتفرج
وماركزتش في تركيب
الشباك
فأمر القاضي باحضار صاحب الحصان
فلما جه القاضي سأله وقاله
إزاي يا راجل انت تقع من
على الحصان مش عارف ان ده
بيعطل الناس عن
شغلها ؟؟؟
عاجبك كده اديك هاتتشنق
فقاله صاحب الحصان مش ذنبي
يا سعادة القاضي ده الحداد
اللي ركب للحصان الحدوة
هو اللي ركبها غلط
عشان كده الحصان قعد يتنطط
لغاية ما وقعت من عليه
فإمر القاضي يإحضار الحداد
اللي ركب الحدوة
فلما جه قاله ازاي يا راجل انت
تركب حدوة الحصان غلط
مش عارف ان ده هايخلي الناس
تقع من علي الحصان
والناس التانية تتفرج عليهم
وتسيب اشغالها يقوم الحرامي
الغلبان ده لما يجيي يسرق
بيت فلان ده ي
تشعلق على الشباك يقوم
ياخده ويقع تتكسر رجله؟؟؟
عاجبك كده اديك هاتتشنق
الحداد قاله مش ذنبي
يا سعادة القاضي اصل المعلم
بتاعي ماعلمنيش كويس
فأمر القاضي ياحضار المعلم
بتاع الحداد
فالحداد قاله ان المعلم ده مات
فقال القاضي يبقي مافيش غيرك
خدوه واشنقوه
فلما راحوا يشنقوه
لقوا الحداد طووووويل جدا على
المشنقة فماعرفوش يشنقوه
فالقاضي احتار
قالهم خلاص انا هاشفلكم
واحد قصير تشنقوه
تعالى انت
انت ده طلع مين؟؟؟؟
واحد من الاتنين الغرب عن
البلد اللي بيدوروا على بلاد السعاده
فاكرينهم؟؟
خد واحد منهم عشان يشنقه
بسبب انه قصير
قام الراجل اللي من البلد اللي
قالهم تعالوا افرجكم على
المحكمة حب يتوسطله
فراح للقاضي وقاله
يا سعاده القاضي
الراجل ده غريب
ولو قتلته ماحدش في البلد
هايحس بالعدل
حضرتك لازم تشنق واحد
من اهل البلد
قام القاضي قاله طيب
ماهو الحداد طويل على
المشنقة نتصرف ازاي؟؟؟
قاله انا هاجيبلك واحد مكانه
من اهل البلد ولا تزعل نفسك
تعالى انت
انت ده كان الحرامي
خدوا الحرامي وشنقوه
وتوتة توتة فرغت الحدوته
الهوم وورك
اذكر خمس
دروس مستفادة من القصة
هناك 5 تعليقات:
1- اوعى تمشي في بلد غريبة الله اعلم ممكن يكون عندهم المشي ممنوع و العقوبة .... .
2- ارمي دايما بلاويك على واحد عايش مش ميت.
3- الطول هيبة و كمان منجي من المشانق.
4- اطلب التعويض و انت لابس كعب عالي.
5- اللي يشوف محمكة غيرة تهون عليه .... .
اول درس لازم نتعلمه ان منسمعش كلام اى حد يقولك تعالى اوديك لبابا و ماما او هوريك حاجة غريبة فى بلدنا
تانى درس لازم تتعلمه انك لما تيجى تسرق تاخد بالك من الشبالك مربوط كويس ولا لا
تالت درس لازم نتعلمه ان انت مش محتاج تسافر حتة عشان تشوف حاجات غريبة دور فى بلدك ( اكييييييد ) هتلاقى
رابع درس لازم نتعلم ان المحاكم كلها كده فى العالم مش عندنا احنا بس
خامس حاجة ان احنا من الاول نلم نفسنا و بلاش نروح بلاد غريبة بلدنا اولى بينا يا ولاد
و عجبى
الدروس المستفاده
1 :لما نقوم من النوم نغسل وشين وسنانا بالمعجون
2 :نصبح على اخواتنا ونبوس إيد بابا و ماما
3 :نفطر كويس ونشرب اللبن ونلبس كويس علشان منبردش
4 :قبل ما ننام نغسل رجلينا
5 :مفيش عدل ممكن يحصل فى بلد تقام فيها محاكم
1- عيش ندل تموت مشنوق .
2- لازم تعرف كل حاجة في الدنيا
3- الإنسان بدأ في مرحلة التطور بالمقلوب يعني قبل كده دارون قال ان الإنسان كان أصله قرد وأهوه دلوقتي الإنسان بدا يتجه انه يرجع قرد تاني
مش عارف
متهيألي كفاية كده
الدرس الرابع صحيح
اني أدور كويس في المدونات عشان اشوف المدونات الكويسة زي مدونة حضرتك
السلام عليكم
1.لا تسير فى بلاد العجم
2.لا تبحث عن السعاده
3.لا تشتكى ...
4. لا امل ولا وفاء
5.لا تستمع لبرامج الاطفال
M.H
إرسال تعليق