انا اسمي لؤي صقر
عندي قريب او اكتر من الدرجة التانية او التالته في الجيش والشرطة
وبصفتي قريبهم وعارف سلاحهم احب اقولهم
انا واحد ضمن المواطنين المعتصمين في التحرير
انا سلمي وماعيش سلاح ولا استطيع استخدامه وانتو عارفين كده بصفتكم قرايبي
انا مواطن مصري وماليش انتماءات اجنبية ولا عندي اجندات خاصة وانتو بصفتكم قرايبي برده عارفين كده
انا صحفتي الجنائية نضيفة
انا لم اتهرب من الخدمة العسكرية
انا مواطن صالح بار باهلي
انا ضد حكم العسكر
انا هافضل في التحرير حتى لو قتلتوني
مش شرط ابقي في وسط الناس اللي في محمد محمود عشان اتئذي بقنابل الغاز سواء المسيل للدموع او منتهي الصلاحية او الغاز الغريب اياه ده .... انا ممكن اتئذي حتى لو انا واقف بعيد جدا ... حتى وانا معدي في المترو ومش معتصم اصلا
الحالات اللي بشوفها بتتأثر بالغاز في منها بيموتوا
فضلا عن الخرطوش والخرز والمطاطي وكمان الرصاص الحي
كل لحظة بتمر عليا بيزيد ايماني اني المفروض اقف اقرب للضرب عشان اخواتي المصريين اللي بيستشهدوا عشاني قدام الضرب ده مايخلصوش
انا نازل التحرير عشان ابني ماينزلش
انا بكلم قرايبي الي في الجيش والشرطة
وانت بتضرب المرة اللي جاية
خليك عارف اني ممكن اكون الشهيد اللي جاي
وانا مش مسامحك
---------------------------------------------------------------------------------------------
اي حد ينطبق عليه الكلام ده ياريت يكتبه عنده او يسجله ويرفعه على اليوتيوب او يوصله للاعلام باي شكل عشان يوصل لقرايبه اللي بيضربوه
ليست هناك تعليقات:
إرسال تعليق