البوست ده لابني....
بقالي يومين مابتكلمش عن الانتخابات ورأيي فيها عشان ابقي محترم نفسي وماوجههش حد
اللهم غير اللي يسألني صراحة
فبقوله اني هابطل صوتي ولما يصر ويقولي ارشح مين فبقوله رأيي بصراحة
والنهارده هاكتب رأيي ده بصراحة
احنا دلوقتي يوم 28 نوفمبر سنة 2011 الساعة اتنين ظهرا
امبارح يابني كنت سهران بالليل في اعتصام مجلس الوزرا
كانت الدنيا ممطرة
والشارع نضيف
والاعتصام على الجنبين
وكان في شاب-وياللغرابة فيه شبه من احمد شوقي بس مش هو طبعا- كان معاه عود وبيغني لسيد درويش والشيخ امام والناس كلها ملمومة حواليه وبيغنوا معاه
وقفت معاهم وقاومت نفسي كتير اني اصوره او اتويت عن الموضوع ده
حبيت استمتع باللي بيحصل بدون اي تدخلات اخرى تشغلني
حتى لو كان مجرد توييته
انا يابني لسه مانزلتش الانتخابات
هانزل كمان شوية ان شاء الله
هاعمل ايه؟
هابطل صوتي
هاكتب في الورقة يسقط يسقط حكم العسكر
جملة بليغة جدا
من ابلغ الجمل اللي سمعتها وقلتها في حياتي
واحب اقول للي قالها اول مرة
انت عبقري
ليه هابطل صوتي؟
اولا
انا شايف ان مجلس الشعب ده مسرحية هذلية
مجلس مالوش صلاحيات يغير حكومة ولا يسائل وزير دفاع
مجلس بيعملوا انتخاباته في ظل تأمين داخلية لسه قاتلة ناس كتير في شارع محمد محمود على مدار الاسبوع اللي فات كله
مجلس دعا ليه مجلس عسكري سمح بدخول البلطجية في موقعة الجمل وسمح بتعذيب للمظاهرين في المتحف المصري-ياريتها اي حتة تانية- وسمح بعمل كشوفات عذرية وبيحاكم المدنين عسكريا
وبيعاملنا زي الدبان والناموس
اللي يرمي قنبلة غاز مسيل للدموع - بغض النظر عن بقية القنابل اللي ماحدش عارفلها ملة ولا اصل واللي في كلام كتير اوي على انها سلاح كيماوي واستخدامه في الحروب يعتبر جريمة حرب لا تسقط بالتقادم
اللي يرمي قنبلة زي دي من فتحات محطات المترو
وتبقي ماشي في وسط الميدان بعيد عن شارع محمد محمود اصلا
وممكن تكون راكب المترو ومانزلتش منه اساسا
وتبقي الاطفال بتقع
بتقع منك وهي مش فاهمه
الطفل بيبقي ماشي ويقع وهو مش فاهم ليه
اللي ياخد قرار زي ده يبقي بيعاملنا زي الحشرات
بيرش علينا مبيد بشري
قصدي مبيد حشري
وده شخص مش ممكن اصدق انه حمى الثورة
وده شخص مش ممكن اعترف بشرعيته في انه يعمل انتخابات
والشخص اللي داخل انتخابات وبيعمل دعاية انتخابية والناس دي كلها لسه ميته يبقي شخص ماعندوش دم
سواء كان ليبرالي او يساري او اسلامي-مع العلم ان الاسلاميين تحديدا كانوا هايموتوا والانتخابات تتعمل
فاكرين انهم اللي هايكسبوا
ازاي يبقي بقالهم ستين سنة شغالين في الشارع واول انتخابات بعد الثورة مايكسبوهاش
جايز اطلع مابفهمش
بس اكيد اكيد لو الانتخابات دي كملت اصلا مش الاسلاميين الي هايكسبوها
مش هايبقوا اغلبية يعني
لعدة اسباب
اهمها ان ده مسمار في نعش المجلس العسكري الا اذا كان مظبط الاسلاميين
واعتقد انهم مش بالغباء ده
وثانيا لان المجلس العسكري سايب الفلول تخش الانتتخابات دي
سايبها عمدا
والفلول شخصيا اكيد مش داخلين الانتخابات اونطة
لحد دلوقتي سمعت عن شوية انتهاكات بسيطة في الانتخابات
زي التأخير في فتح اللجان
وزي ان الورق مش مختوم
وحاجات كتير كده
تاني حاجه مش عاجباني في الانتخابات
ان اي كان اللي بيعمل حملته الانتخابية المرة دي
واي كان برنامجه الانتخابي
فهو برنامج مالوش لازمة
لان المجلس ده اول مرة يجتمع فيه-بناء على التعديلات الدستورية اللي الشعب قال عليها نعم عشان ماحدش يقول اني بلتف على ارادة الشعب- اول اجتمال للمجلس هايختار اللجنة اللي هاتعمل الدستور
والمفروض الدستور ده يخلص
واول ما يخلص الدستور
لازم مجلس الشعب والحكومة ورئيس الجمهورية يتحلوا
ببساطة لان كل دول معتمدين في تكوينهم على الدستور اساسا
يعني افرض الدستور الجديد مافيهوش خمسين في المية عمال وفلاحين
افرض الدستور الجديد بقي فيه ان مصر دولة برلمانية
فأي برنامج انتخابي للناس دي مش هايتفذ اساسا
اللي هايخش مجلس الشعب ده شغلته الوحيدة -لو كان هايشتغل يعني- انه يختار اللجنة اللي هاتعمل الدستور
طيب ليه ماختاروش على هذا الاساسا
انا بنتخب اللي هاينتخب اللي هايعمل الدستور
مش هاعمل كده عشان اي لجنة تأسيسية لكتابة دستور المفروض عشان تكون لجنة محترمة فعلا نعمل حاجه من اتنين
اولا اننا نقعد كلنا كده مع بعض عشان نكتب الدستور ده
ده لو عددنا قليل
لكن لما يكون عددنا كبير اوي كده
لازم ناخد من كل رجل قبيلة
ناخد من كل فئة حد ميثلها
ومجلس الشعب متقسم جغرافيا
يعني الراجل اللي هايكسب في منطقة شبرا ده
ايه اللي يخليه يفكر في حل مثلا لمشكلة اسكان الشباب
او حتى الناس اللي ماعندهاش سكن
ايه اللي يخليه يفكر يكتب في الدستور ان على الدولة ان توفر المسكن والمأكل والملبس-احتياجات الانسان الاساسية- لكن مواطن لا يستطيع توفيرهم بسبب عجزه او سنه او اسباب اخرى؟؟؟
عمره ما هايكتب كده
لانه انتخب عن طريق ان الناس اللي ساكنه في شبرا انتخبته
وللأسف ما فيش حد من سكان شبرا ماعندوش سكن
لان اي حد ساكن في شبرا هو بالضرورة عنده (سكن) في شبرا
ايه اللي يخليه يتكلم عن طلبة المدارس
ايه اللي يخليه يفكر في سواقين التاكسي
ايه اللي يخليه يتكلم عن حقوق المرأة او حرية الاعتقاد او حرية الصحافة او دين الدولة او صلاحيات رئيس الجمهورية حتى
ايه اللي يخليه يفكر مصر تبقي دولة برمانية ولا رئاسية ولا شبة رئاسية؟
عشان نعمل دستور محترم
لازم يبقي عندنا دكتور في الجامعة وطبيب اسنان ومهندس وطالب جامعي وطالبة ثانوي ومكانيكي وخباز وسواق تاكسي وعاطل
لازم يبقي عندنا ام واب وابن وحفيد وجد
لازم يبقي عندنا غني وفقير
لازم يبقي فيه جزار وتاجر فاكهة
لازم -صدقوا او لا تصدقوا- يبقي عندنا شحات
والاعجب
لازم يبقي عندنا مسجون جنائي وسياسي
ومجلس الشعب ده مافيهوش حاجه من دي
طيب هو ممكن نعملهم
اه عادي
كل طائفة تفضل تنتخب منها فيها كده حد لحد ما نوصل لواحد او اتنين من كل طائفة
اصلا لو عملنا كده
هانقدر بسهولة نعرف من الانتخابات السابقة لتأسيس الدستور دي
عندنا كام دكتور سنان وكام سواق تاكسي
وبالتالي لو طلع مثلا عدد سواقين التاكسي ضعف عدد دكاترة السنان
يبقي في اللجنة التأسيسية دي
المفروض يبقي في سواقين تاكسي ضعف عدد دكاترة السنان
ايه الموضوع صعب وخيالي حبتين؟
لا
ابدا
نقعد زي ما نقعد
المهم نطلع بدستور محترم
لاننا بنأسس دولة محترمة
توقعي للي هايحصل؟
كنت متوقع انتهاكات شديدة جدا النهارده بس واضح ان لحد دلوقتي ده محصلش
لكن مازال توقعي ان الانتخابات النهارده هاتبوظ
لو فرضنا ان الانتخابات عدت على خير-ربنا يستر-فنتيجتها هاتبقي الاغلبية فلول
وسواء كانت الاغلبية فلول او لا
فمجلس الشعب ده هايبقي مجلس طراطير
بيسمعوا كلام المجلس العسكري
وستقوم موجة جديدة من الثورة عشان نعيد كل اللي بيحصل ده تاني
بس في النهاية يابني
مش هاقدر ادي صوتي لواحد ممكن ينجح فعلا ويبوظ البلد اللي انت هاتعيش فيها بعد كده
ده لو المجلس ماكملش في السلطة يعني واتقبض عليا ساعتها انت مش هايبقي عندك مشكلة اساسا لانك لسه ماجتش
اللي يستحق صوتي فعلا هو شخص رفض ينزل الانتخابات دي
او على الاقل عمل حاجات لا يمكن ان نقارنها باللي بيقول عليه المرشحين
اللي يستحق صوتي مات عشان البلد دي تبقي انضف
اللي يستحق صوتي هو الشهيد
هناك 4 تعليقات:
النموذجيه التي تتحدث بها شئ ملهم واحترمه بشدة واتمنى ان تكون من الذين يديرون حياتهم الخاصة والعامة بنفس الطريقة - لقد اضفت لي الكثير شكرا لك رغم اختلافي معك وانا سوف اشارك لأن البديل اصعب من الانتخابات
اولا هذا رايك عن مصر وما يحدث فيها وعن الانتخابات ولا تجزم انه راى الاغلبية وتجزم عن قيام ثورة ثالثة
عموما انا ارى ان كل ما يحدث خير ان شاء الله ونصر من الله بجد انا لم ارى انتخابات كده من زمان والناس بتنتخب بالشكل ده
كل ده معناه ان استحالة كل المنتخبين من الفلول معلش مهو احنا مش اغبية اللى بننتخب ومش جهلة والحمد لله على قدر من العقل برده زيكم انا مهندس ووالله لا انتمى لاى حزب ولكن اامل ان مصر تكون افضل واامل مش كل شوية يموت مننا حد لتنفيذ مطلب معين لابد من وجود وسيلة اخرى لتحقيق مانريد غير الدم وده ان شاء الله اللى هيتحقق بعد الانتخابات واللى جاى احسن
اخيرا هذا رايى وليس راى غيرى والله اعلم كم شخص يوافقنى ولكن ان شاء الله اللى جى افضل
اولا هذا رايك عن مصر وما يحدث فيها وعن الانتخابات ولا تجزم انه راى الاغلبية وتجزم عن قيام ثورة ثالثة
عموما انا ارى ان كل ما يحدث خير ان شاء الله ونصر من الله بجد انا لم ارى انتخابات كده من زمان والناس بتنتخب بالشكل ده
كل ده معناه ان استحالة كل المنتخبين من الفلول معلش مهو احنا مش اغبية اللى بننتخب ومش جهلة والحمد لله على قدر من العقل برده زيكم انا مهندس ووالله لا انتمى لاى حزب ولكن اامل ان مصر تكون افضل واامل مش كل شوية يموت مننا حد لتنفيذ مطلب معين لابد من وجود وسيلة اخرى لتحقيق مانريد غير الدم وده ان شاء الله اللى هيتحقق بعد الانتخابات واللى جاى احسن
اخيرا هذا رايى وليس راى غيرى والله اعلم كم شخص يوافقنى ولكن ان شاء الله اللى جى افضل
بالنسبة للاخ طالب حوار
شاكر اهتمامك بالرد ومحترم اختيارك تماما
بالنبسة للاخ المهندس
انا لم اجزم بكونه رأي الاغلبية بالعكس
قلت اني ممكن اطلع مابفهمش وكلامي يطلع غلط في الاخر وده تصور ورأي شخصي
اتمنى ان الانتخابات تعدي على خير وماندفعش دم كتير
بس للاسف لا يستويان
ماينفعش تبقي ثورة بس تبقي مش ثورة اوي
إرسال تعليق