سؤال وجيه
انا هاجاوب على السؤال
وعشان نجاوب عليه نقسمه لحاجتين
ليه بتأخر في المدونة هنا وليه بتأخر في مدونة بعد منتصف الليل
الحقيقة الطبيعي اني ماكتبش اساسا
فالسؤال اجابته تكمن في انا بكتب ليه اساسا
ويبقي سبب عدم كتابتي بالاضافة لقلة الفضا اليومين دول
هو عدم توافر اسباب كتابتي
انا بكتب في تاخاريف لما احس ببساطة كده اني عايز اكتب
على فكره انا كتبت موضوعين قبل كده اخرانيين في الفتره الاخيرة ومسحتهم
كتبتهم لما حسيت اني عايز اكتبهم
ومسحتهم لما اكتشفت انهم ماسخيين
وبعد في بعد منتصف الليل لما الاقي الحماسة والفكره اللي اكتب عشانها
او لما الاقي حد باعتلي قصه على الميل
النهارده بقي انا جي اكتب موضوع
طبعا هاكتب موضوع امال هاكتب بطاطس مثلا؟؟
هاتكلم في شوية عن نفسي
للأسف انا مابحبش اكتب الموضوعات القصيرة
عارف ان الموضوعات الطويله وحشه
وانا اول واحد بزهق منها حتى لو كانت غاية في الابداع
ويمكن هنا يكمن سر نجاح الاختراع اللي اسمه النكته
حاجه حلوة وصغيرة
تبقي ايه؟
تبقي نكته
حاجه حلوة وسهله
تبقي نكته
المهم اني من النوع اللي بيعرف يكتم مشاعره
لو حبيتوا الدقة
فانا من النوع اللي مابيعرفش يظهر مشاعره ويعبر عنها
لازم عشان الاقي الحماسة الكافية اني اكتب
اكون في حاله طفح للمشاعر
واللي بكتبه هو الزياده بس لحد ما اللي جوايا يتسرب براحته
اخر مرة صرخت فيها من الالم كان وانا عندي بتاع تسع سنين تقريبا
كنت باخد علاج يتطلب اني اخد حقنه حوالي عشرة سم في رقبتي على حوالي عشرين او خمسه وعشرين جرعة
يعني الابرة بتدخل وتخرج خمسة وعشرين مره ورا بعض في رقبتي بهدف توزيع مفعولها على الرقبه كلها
عملية كانت بتستغرق حوالي نص ساعة متكتف فيها من تلات اشخاص بالغين كبار اقوياء اغلبهم رجال
والكورس كان حوالي تمن حقن
كان بعد ما وجع الحقنه يروح افضل اسبوع بتألم من خوفي من وجع الحقنه اللي جاية
لدرجة اني فكرت في الانتحار
اقول فكرت ولم اقول حاولت
ليه ماحاولتش
ببساطة لاني عبقري من يومي
حسيت ال ايه ان في امل
ومن اخر حقنه اللي كانت من حوالي ستاشر سنه دي
كانت اخر مرة اصرخ من الالم
لاحظو اني كل ده بكلمكم عن الوجع الحسي لطفل بياخد حقنه
ماكلمتكوش عن الوجع المعنوي لطفل عنده سبب قوي جدا انه ياخد الحقنة دي
كنت بقول اني من ساعنها حسيت بالابتذال من الصراخ
البني ادم اللي بيصرخ من الالم ده بني ادم مبتذل
ناهيكم طبعا عن اللي بيقول كلمة اي
خاصة اللي بيقولها خطف
اي
يكون بياخد حقنه
صباع رجله خبط في رجل الكورسي
داس على زلطة
كلام فارغ من ده
عارفين
مرة كنت في اوتوبيس
كنت عيل بتاع عشر سنين كده
وكنت واقف قدام عن الباب اللي جنب السواق ده
وجه وقف في محطة
فانا اتحركت عشان اوسع للناس اللي ورايا عشان تنزل
انا اتحركت من هنا
والباب فتح من هنا
وزنقني في التابلوه
فكرت اصرخ عشان السواق يقفل الباب تاني
بس ماعرفش ليه-لحد النهارده- فضلت ساكت
لحد ما الباب قفل والاوتوبيس مشي من المحطة دي
الشاهد بعد الاحداث المعوية دي
اني مابعرفش اطلع مشاعري
ممكن اي حد -من وجهه نظري- يبقي صحفي شاطر جدا
مجرد انه يملك ادوات لغة بسيطة للغاية
وينزل يتمشي في الشارع
يوووووووووووووووووووووووووووووووووووه
هايكتب مقالات عن خمسين الف حاجه
وحتى مش هايبقي محاج يقول رائيه
مجرد ما يكتب مثلا
رحت النهارده لواحد صاحبي محامي
واتكلمت شوية مع الاوفس بوي بتاعه
لقتهم عشرة اخوات وهو نمره سبعة واخوه الكبير فاتح ورشه واخوه التاني عنده ميكروباص
ولما عدلي اخواته لقيتهم اتناشر
قلتله امال عشرة ايه يابني
قالي مالبنات عندنا في الصعيد ما بيتحسبوش
شفتو
كتبت خمس ست سبع سطور في موقف خد خمس دقايق في اليوم
طبعا كان ممكن يبقو تلاتين اربعين
لو اتكلمت شوية عن اسمه وعن اني قلت لصاحبي مش عايز اشرب حاجه فحلف عليا
قلتله خلاص قهوة على الريحه
ولا اقولك خليها سكر زيادة
وبعدين الولد بقي كان عنده حوالي حداشر سنه
وطلع تلميذ في مدرسة مش عارف ايه
وبيجي يشتغل في الاجازة
وكلام سهل وفارغ من ده
بس لو انا حصلي الموقف ده-حصلي فعلا - مش هاكتبه في موضوع
اه هاهتم اني اسأل الولد
فقط كي ازداد علما
لكن صعب تجيلي الحماسي اني اكتب الموضوع ده لوحده كده
عشان كده
اعذروني لما اتأخر عليكم
يمكن ده يكون ضريبة انكم تقرو مواضيع نوعا ما كويسة
اعتذر لكل المدونين الاعزاء عشان بقالي فتره ما باخدش جولات في مدوناتهم
لكن بجد الوقت ضيق اوي عندي اليومين دول
ماتعرفوش حد عنده وقت واسع
نقوم مثلا سته واربعين سبعة واربعين تمانية واربعين
الى اللقاء
هناك تعليق واحد:
اولا الحمد لله على رجوعك بالسلامه
وتشكر يا سيدى على أهتمامك بيناوشرح سبب تأخيرك فى الكتابة
ولك أحترامى لأحترام عقولنا فيما تكتب وتنشر
انا مختلف معاك فى موضوع انك مبتعرفش تعبر عن احساسك
أو كما قلت:(فانا من النوع اللي مابيعرفش يظهر مشاعره ويعبر عنهالازم عشان الاقي الحماسة الكافية اني اكتباكون في حاله طفح للمشاعرواللي بكتبه هو الزياده بس لحد ما اللي جوايا يتسرب براحتهاخر )
الصراحه مش عارف لو كنت مبتعرفش تبعبر على اللى جواك او مشاعرك كنت عملت إيه ولا كتبت إيه تانى اكثر من كده كفايه انك حسستنى بمتاعب وألم الطفل ابن تسع سنين أقصد وانت صغير
أما موضوع انك مبتصرخش من الألم أو مبتطلعش مشاعرك شايف انك مش عارف لسه جانب من جوانب لؤى أنك متعودتش أنك تظهر لحد نقاط ضعفك وخدها من شميس ثقه
وعلى العموم حمد لله على السلامه
وكنت اتمنى انك تعلق فى المدونه
إرسال تعليق