ساعتين اتنين حشرات الشعر فين؟؟؟؟؟؟
يمكن هي دي الحاجه الوحيده اللي ممكن تتعمل في ساعتين
لكن معقوله الواحد ينام في اليوم ساعتين؟
امبارح قاعد بذاكر انا واصحابي
كلنا عندنا شغل الصبح
بس مواعيدنا الصبح مش زي بعض
انا كان عندي شغل الساعة اتناشر
يعني على الاقل اصحى الساعة عشرة
هشام عنده شغل الساعة تسعة يعني هايصحى سته ونص
شريف عنده شغل الساعة عشرة يعني هايصحي تمانية
الظريف اننا مخلصين مذاكرة الساعة تلاتة ونص الصبح
يعني انا مثلا عشان اروح من الهرم لشبرا -في وقت زي ده مافيهوش مواصلات- محتاج ساعة
يعني معايا خمس ساعات تقريبا عشان انام فيهم ده على اعتبار اني هادخل من باب البيت على السرير عدل
هشام بقي اللي مصيبته مصيبة
على ما يروح بيتهم ويصلي بقت الساعة اربعة ونص
مطلوب انه ينام ساعتين بالكتير
شريف نفس القصة وان كان محظوظ نوعا ما لاننا كنا بنذاكر عنده فهو اقرب واحد فينا لبيته
مش مشكلة يوم ويعدي
وننام بعد الشغل بكرة
للأسف مش هانام بعد الشغل بكره لان بكره عندنا دراسات عليا بعد الشغل
وفي امتحان كمان
خلاص مش مشكلة نطبق يومين ولا حاجه
لكن لما يبقي ده المنوال بالشهر والشهر ونص نعمل ايه طيب؟
تفتكروا في امل نفضل ماننامش غير ساعتين تلاته وفي الاخر نفضل بصحتنا؟؟؟؟؟؟؟؟
لؤي صقر -بحلم اني انام واحلم
ليست هناك تعليقات:
إرسال تعليق