السعادة..!!!
كلمة كانت غريبة على وداني في فترة
مالهاش صورة قدامها في قاموس المصطلحات عندي
مش معقوله هاحط قدامها صورة واحد بيضحك
الناس ممكن تضحك لما تسمع نكته
بمعنى اخر
الواحد ممكن يبقي سعيد
بس ده لفترة محدوده
لو طلعت الاول في المدرسة هابقي سعيد بس ده بالكتير اوي شعور هايخلص السنة الدراسية اللي جاية
لو كسبت ماتش كورة هابقي سعيد لحد ما اتزحلق اقع على الارض او اضرب في المدرسة عشان ما عملتش الواجب
باختصار
كنت مقتنع ان مافيش حد في الدنيا نقدر نقول عليه سعيد
والا كنت خليت صوره الحد ده قدام كلمة سعاده في دماغي
نسيت اقولكم ان كل الكلام ده كان في دماغي وانا ابن ست سبع سنين
كانوا بيقولوا عليا نبيه من يومي
بس ابتديت اغير وجهه نظري دي بعد ما عييت العيا اللي حكتلكم عليه قبل كده
عارفين ليه؟
لاني في الفتره دي حسيت ان في صورة ممكن نحطها قدام كلمة سعاده
هي صورتي انا بس عليها علامة غلط
اي حد في الدنيا مادام مش انا فنقدر بضمير مستريح نقول عليه سعيد
لاني لقيت اني كل وقت بيعدي عليا ببقي مضايق
انا اللي كنت بضحك من يومي
قعدت بالشهر والاتين والتلاته ماضحكش
في الوقت ده كنت بقعد لوحدي كتير
وكنت بفكر في كلام فارغ من ده
لما فكرت
لقيت اني غيرت فكرتي عن الاحاسيس والمشاعر
طبعا ساعتها ماكتنش عارف ان اسمها احاسيس ومشاعر بس كنت مدرك اني غيرت فكرتي عن حاجه انا عارفها كويس بس ماعرفش اسمها ويمكن كمان الكبار مايعرفوش اسمها
فكرتي كانت ان الاحاسيس والمشاعر دي وقتيه
بس اكتشفت انها ممكن تبقي مستديمة
على الاقل ممكن تبقي وقتها طويل اوي
لان انا -اللي مره واحد صاحبي قالي اوصف نفسك في اتناشر صفة قلتله سريع الملل سريع الملل سريع الملل سريع الملل.............-انا بكل مللي ده لسه ما غيرتش شعوري بالاكتاب-طبعا ماكنتش اعرف ان اسمه اكتئاب-لحد دلوقتي
ومن هذا المنطلق يمكننا ببعض الاستنتاج والتعميم الرياضي نقول
ان في ناس حاسة بالسعادة لفترات طويله
وكان السؤال هو ياترى مين دول؟؟؟؟
دورت في كل معارفي واقرايبي واصحابي
كل العالم اللي اعرفه يعني
مالاقتش
او بمعنى تاني مافهمتش
فقررت ااجل البحث في الموضوع ده شوية
هنا بقي زاد الاكتئاب
زاد لدرجة اني فكرت في الانتحار
وانا عندي سبع سنين ؟؟؟؟
ايوة
ولحد دلوقتي فاكر امتى وفين حصل ده
ولما رجعت عن قراري رجعت عنه بسبب الجبن مش اكتر
حسيت ان الموته اللي اخترتها دي مش يقينية
ممكن اتعور بس وماموتش
يبقي هاضايق زياده مش هارتاح
وكانت خبراتي بالموت قليله فماكنتش لسه عرفت وسايله
المهم
الكلام ده كان لما كنت رايح اخد حقني المعتاده
اظن جو ملائم جدا
وانا مستني دوري
لمحت راجل
مستني دوره هو كمان -كننا في مستشفى بقي
الراجل ده فعلا هو اللي قعدت ابصله كتير اوي عشان قررت اني احطه قدام كلمة سعاده في دماغي
عشان كده لسه فاكر ملامحه لحد دلوقتي بعد اكتر من سبعتاشر سنه
وفاكر كان لابس ايه
ببساطة لانه ماكنش لابس كتير
كل اللي كان لابسه كان سروال ابيض خفيف
ليه؟
غالبا عشان يستر عورته
طيب ليه لابسه خفيف مش تقيل؟؟
لانه طايق الخفيف بالعافية
طيب فين بقية هدومة؟
مش معاه طبعا
مش معاه ليه؟
لانه مابيلبسهاش اصلا
ليه؟
لان جسمه كله محروق
كله؟
كله؟
فقط هو لابس السروال الخفيف ده وقطعه من القماش الخفيف حاططها على كتفه حياء ليس الا
اول ما شفت الراجل ده
وقارنت اللي هو فيه باللي انا فيه
حسيت بسخافة الاكتئاب اللي عندي
ايه الدلع الماسخ اللي انا فيه ده
بس بعد ما لقيت الراجل ده بيضحك ويهزر مع ولاده
ساعتها عرفت يعني ايه سعاده
الراجل ده سعيد
وحطيت صورته في دماغي على طول
معنى السعاده انك تقدر تبتسم في اسواء الظروف
عشان من جواك تقدر تخلي مشاعرك واحاسيسك تركز بس على النقط الجميلة
قضيت سنه
بحاول اتعلم فيها ازاي ابتسم
ازاي اتعامل مع مرضي على ان كل الناس عنها المرض ده
بمعنى اخر
ازاي احس اني بني ادم عادي
هي دي السنة اللي اتعلمت فيها ماقولش اه
لاني اتعلمت فيها اني ابتسم
بدل ما اركز تفكيري على اني اعيط ركزت تفكيري على اني ابتسم
في سخص اعرفه من زمااااااااااااااااااااااااان اوي
هو تمانية وتسعين في المية مش هايقرا المدونة دي
الشخص ده عنده مهارة عاليه جدا في انه يعيط
ابقي انا عارف كويس اوي انه كويس اوي
والاقيه بيتكلم مع واحد صاحبه وبيشتكيله من الدنيا كلها
الشخص ده اعرفه من وانا طفل
لما بلاقيه عمل كده
بقول الحمد لله انه خلاني اشوف الراجل بتاع المستشفى ده عشان اتعلم منه
واحمد ربنا انه خلاني اركز اني اتعلم من الراجل اللي شفته مره واحده وماتعلمش من الشخص-مش قادر اقول راجل- اللي اعرفه طول عمري تقريبا
باختصار
السعاده هي تعلم السعاده
هناك تعليقان (2):
معنى السعاده انك تقدر تبتسم في اسواء الظروف
عشان من جواك تقدر تخلي مشاعرك واحاسيسك تركز بس على النقط الجميلة
مفيش أحلى من كلمتك ديه أرد بيها على الموضوع ده
معنى السعاده انك تقدر تبتسم في اسواء الظروف
عشان من جواك تقدر تخلي مشاعرك واحاسيسك تركز بس على النقط الجميلة
مفيش أحلى من كلمتك ديه أرد بيها على الموضوع ده
إرسال تعليق