it is to you not for you

مسرحية ماما امريكا
تأليف لنين الرملي
اخراج وبطولة محمد صحبي
جزء من مشهد اعجبني
مقدمة بسيطة لاستيعاب المشهد
مات الاب وترك ابناءه الخمسة
عبود وعاشور وعلام وعذاب وعايش وعفاف
وترك لهم ميراث عبارة عن ارض مسروقه وبيت مرهون وسيارة اجرة
قرر الاخوة ان يبيعوا (العربية)
فكان هذا المشهد
عبود
كل واحد يشوف مصلحته العربية دلوقتي تجبلها بتاع ستين الف جنيه كل واحد ياخد نصيبه
ويشوف مصلحته
عاشور
طب كويس بقي انا مش لاقي اكل وماعييش فلوس وليا حقوق في مصنعك عايزها

عبود
ماسمهاش حقوق دي وهبه انا بدهالك

عاشور
وهبه؟؟ ويشتبكا مع بعضهما

عايش يخلص بينهم ويقول
اللي هايمد ايده على عبود هاكسرهاله
اللي عايز يمدها يمدها في جيبه
(ويمد يده في جيب عبود)

عبود
انا اتحامى في واحد نجس زيك؟

علام
نجس ؟؟ دانت قليل الادب صحيح ماتحترم نفسك

عايش
وانت مال اهلك يا علام اتنين اخوات بيتكلموا مع بعض مالك انت

عفاف
ماتحترم اخوك الاكبر منك يابنيادم انت

عاشور
وانتي مالك ومال كلام الرجالة ماتغوري في ستين داهية

عايش
لا اتكلم مع اختك عدل يا حيوان

عفاف
انت مال اهلك يا عايش

عذاب
انت اللي ولعتها يا عبود ربنا يديك مرض على اد فلوسك
(ويمسك الجميع ببعض)

عايش
ايه اللي جرالكم يا عيلة منافع دي عين وصابتنا وحدوا الله

الجميع
لا اله الا الله

عايش
صلوا على النبي
ا

لجميع
اللهم صلي عليه

عايش
ده العشرة ماتهونش الا علا ولاد الحرام

عفاف
ومهما حصل بينا لازم نفضل فاكرين وصية ابوكم ونفضل اخوات

عايش
مظبوط يا عفاف لازم نفضل اخوات

عذاب
فعلا الضفر ما يطلعش من اللحم

عاشور
والدم عمره ما يبقي مية

علام
والمية اللي في الجوزة عايزة تتغير

عبود
اعوذ بالله من الشيطان الرجيم

عذاب
لازم الشيطان مايخشش بينا ولازم لازم نفضل اخوات

عايش

ايوة مظبوط يا عذاب لازم نفضل اخوااااااااات

عفاف
احنا نشوف ايه المشاكل اللي بينا ونحاول نحلها ونفضل اخوات

عايش
نشوف المشاكل اللي بينا بس المهم المهم نفضل اخواااااااااات

عاشور
والباب اللي يجيلك منه الريح سده واستريح

عايش
نسده
بس المهم المهم نفضل اخواااااااااااااااااااااااااااااااااات

عبود
اول هام الفلوس والسلف لما بيخشوا بينا بيحصل خلافات

عايش
خلاااااااص ماحدش فينا يسلف التاني بس المهم نفضل اخواااااااااااااااااااات

عاشور
تاني هام لما بنشتغل مع بعض او بندخل في مشاريع بيحصل بينا فرقة وخناقات

عايش
خلاااااااص مافيش شغل بينا بس المهم نفضل اخوااااااااااااااااااااااااااااااااااااااااات

علام
تالت هام احنا لما بنتناقش في شيء كل واحد فينا عايز يمشي رايه على التاني فبيتربى
في نفوسنا عاداوات

عايش
ماشي مافيش بينا مناقشات وماحدش فينا يكلم التاني المهم المهم نفضل
اخوااااااااااااااااااااااااااات

عذاب
رابع هام لما حد فينا بيتخانق مع اخوه لو حد اتدخل بينهم بيشعللها اكتر ويبقي بينا كلنا ازمات
عاشوركويس اوي يبقي لو حد مننا اتخانق مع اخوه ماحدش يتدخل بينهم ان شالله حتى يموته (
ويهم بضرب عبود)

عايش
خلاص ده من اللي جاي
خلاص ياخونا مافيش حد فينا يدخل بين اخ واخوه ان شالله يموتوا بعض
المهم نفضل اخوااااااااااااااااااااااااااااااااااااااااااااااااااااااات

عفاف
خامس هام احنا لما بنزور بعض وكل واحد يشوف حال التاني بيحسده وممكن يوقع اهل بيته
في بعض

عايش
خلااااااص بلاش نزور بعض
(ثم مكتشفا للنتيجة اللي وصلولها)
خلاص بلاش نزور بعض واهي العربية هاتتباع
ومش هايفضل بينا حاجه كده بقي كلامنا واضح وكل واحد فينا عارف هو عايز ايه
عايزين نبقي اخوات على الورق بس وكل واحد فينا يشوف مصلحته
ماشي يا اخواتي تعالوا اربوا مني
الهي وانت جاهي شتت شملنا كمان وكمان

الجميع
امين

عايش
ومايجمعناش ابدا من تاني

الجميع
امين

عايش
وماحدش فينا شوف خلقة التاني

الجميع
امين

عايش
اللهم حنن قلوبنا على اعداءنا

الجميع
امين

عايش
وقسي قلوبنا على بعضنا

الجميع
امين

عايش
اللهم اجعلنا نتقبل الخوازيق من اعدائنا

الجميع
امين

عايش
اللهم انصرنا على بعض

الجميع
امين

عايش
وشمتنا فبعض

الجميع
امين

عايش
واكفنا شر بعض
الجميع
امين

عايش
اللهم قومنا على بعض و وقعنا في بعض ونتف في وش بعض ونبقي اخوات

الجميع
اميين