صباح الفل
الساعة دلوقتي واحده ونص بالليل
مش عارف هالحق اببلش الموضوع ده قبل ما النت يقطع زي كل يوم تلات بالليل ولا لا
عموما انا قلت الحق اكتب الكلمتين اللي في نفسي قبل ما تيجي الساعة اتنين واقعد ارغي ارغي ارغي
طيب انا هاتكلم النهارده عن علاقة وين وين
يعني ايه؟
يعني علاقة اكسب وكسب الاخرين
وهي نقطة في العادات السبع لاكثر الناس فاعلية
واللي مافهمش السطر اللي فات ده ممكن يعمله ديستريشن
نيجي بقي لشرح ما يسمى بهذه التسمية الغرية
المؤلف بيقول
ان الناس في علاقتها يا اما بتكسب يا اما بتخسر
يعني لو في علاقة بين اتنين انت وتاجر القمصان مثلا
يا اما انت هاتكسب يا اما هاتخسر
وتاجر القمصان نفس الموضوع
وبالشكل ده وببعض الجبر البوليني وقوانين الاحتمالات
نكتشف ان علاقتكم انتوا الاتنين مع بعض هاتبقي حاجه من اربعه
يا انت تكسب وهو يكسب
يا انت تخسر وهو يخسر
يا انت تكسب وهو يخسر
يا انت تخسر وهو يكسب
المؤلف بقي بيقول
ان الناس الناجحين بيحاولوا دايما يوصلوا للعلاقة الاولى اللي هي انت تكسب وهو يكسب
ليه؟
لان اي علاقة تانية هاتوصلكم لعلاقة انت تخسر وهو يخسر
تعالو نضرب مثل
لو انت رحت تشتري قميص
وهو قالك بتلاتين وانت قرصت عليه خلته يديهولك بخمسة وعشرين يعني عايز تخسره
وانت تكسب
المرة اللي جاية لما تشتري منه هايقولك مافيش
او هايقولك بخمسين عشان لما تقرص عليه تنزله لاربعين
وبالشكل ده لانت هاتشتري منه تاني ولا هو هايبعلك تاني وتبقوا انتوا الاتنين خسرانين
يبقي المصحلة هي ايه؟
انك لو وصلت معاه لعلاقة ان انت تكسب القميص بسعر مناسب وليس بخس وليس باهظ
وهو يبقاله هامش ربح مناسب وليس بخس وليس باهظ ايضا
هاتفضل انت تلاقي دايما القميص المناسب
وهو دايما يلاقي الزبون المناسب
تبقي هي دي علاقة الوين وين ريليشن شيب
هناك تعليق واحد:
قبل كدا بردو اتعرض عليا بريسينتيشن عن الاربع علاقات دول ... بس بأة مش علاقات بين الاشخاص ... عن المفاوضات بين الدول ... و طبعا طبعا كان الهدف هو انى اوصل بالبلد بتاعتى انى اكون رابح مش مشكلة ابدا الطرف الاخر .... و هو دا علم السياسة و دايما هفتكر كلمة الدكتورة بتاعتنا ...
political science is a dirty science so never talk about morals and ethics in poiltics ... there aren't a good or a bad ... it's politics
بس طبعا فى العلاقات مع الناس ... علاقة رابح رابح هى الامثل .... كان فى بوست فى مدونة hilarious ...
اسمه التوازن و دا اللينك بتاع المدونة كلها ... اللى عايز يبقى يغطس فى المدونة و يشوف البوست دا لأنه يستحق فعلا القراية ....
http://rehamamgad.blogspot.com/
إرسال تعليق