لا لا لاااااااااااااااااا لا تكذبي

اعرف هشام من تلات اربع سنين
ومن داي زيرو وضحتله حاجتين مهمين اوي
اولا انا اخر واحد يفهم مزيكا
ثاينا انا اخر واحد ممكن يفهم او يشوف او يسمع او حتى يقعد مع حد بيعمل حاجه من دول وتكون ليها علاقة بالكورة
الحقيقة هشام تفهم التاني وبالرغم من انه من هواه الكورة-كان كده قبل معهد الاحصا-الا انه كان بيغفرلي اسئلة من نوع
ازاي عصام الحضري ييبقي بيلعب في الاهلي والمنتخب في نفس الوقت؟؟؟ طيب لما الاهلي يلاعب المنتخب بيتصرف ازاي؟؟؟

لكن الحقيقة اللي هشام ماقدرش يسامحني فيه موضوع المزيكا ده
هشام من العباقرة لاسباب كتير
السبب اللي يهمنا هنا هو ان هشام من الناس اللي فاهمة يعني ايه لغز الربع تون والتص تون ده
-ملحوظة على جنب الراجل اللي بيشغل التليفون بصوت عالي لسه راكب حالا ولسه ماشاغلش التليفون-
نرجع لهشام
اللي فهم بشكل ما ماهية الربع تون وماهية النص تون
ويعني ايه سيكا ونهاوند
والكبيرة بقي
ال ايه
بيعرف يسمع مقطوعة موسيقية فيكلمك عن جمله موسيقية معينة

مالك انت يابني ومال الكلام ده
انت راجل بتاع برمجه
-الراجل اياه شغل التليفون وبنفس الصوت العالي-
المهم
هشام في مناقاشاته الكتير معايا
اللي بيحاول فيها استكشاف الراجل اللي فاهم مزيكا جوايا
محاولة منهم كانت امبارح
-حاولت ادور على السماعات احطها في وداني مالاقتهاش والغريبة ان الراجل وطى الصوت لدرجة معقولة انا لو مكانه كنت هاحس بمنتهى السخافة من نفسي لما كنت معلي الصوت-
اعتقد كده اقدر اكمل وانا مركز شوية
هشام عمل معايا ديل

يبعتلي مقطوعة ما
واكتب تعليقي عليها بعد ما اسمها في المدونة
حوارنا كان عن التلحين
كنت بقوله اني مش فاهم شغلانة الملحن دي
ايه لازمتها
يمكن افهم شوية فكرة المؤلف الموسيقي
على الاقل ده بيعمل حاجه ماكانتش موجوده اصلا
الملحن ده بقي بيعمل ايه غير انه بيلحن الكلام اللي في اصله موزون مقفى
هشام بعتلي اغنية لا تكذبي بصوت عبد الوهاب

مع الكلمات
وطلب مني اني اقرا الكلمات الاول قبل ما اسمع
وبعدين اسمع وانا بحاول اتخيل كل كلمة هاتتغني ازاي قبل ما تتغنى

اتصلت بهشام وفهمته انه غلط غلطة عمره
لاني حافظ لا تكذبي
هو الحقيقة اصر اني المرة دي هاسمعها بشكل مختلف

فل يا عم هشام
قريت الكلمات
ومن وانا لسه في مرحلة قراية الكلمات
اكتشفت ان اختيار هشام موفق جدا
ليه؟
لان الكلام يمكن موزون مقفى
بس عبد الوهاب اختار وزنه المناسب
تعالو معايا شوفوا من اولها كده
الكلام بيقول
لا تكذبي
عبد الوهاب اصر على انه يظهر اللا عن تكذبي
وده بيخدم المعنى طبعا

بالهمسِ بالأهاتِ بالنظراتِ باللفتاتِ بالصمتِ الرهيبِ

التقسيمة مختلفة تماما
ده من مرحلة ما كنت بقرا الكلام
لما ابتديت اسمع
لاحظت الاتي بقي
اولا من ناحية الاداء الصوتي
وبالرغم من ان الاغنية رجوليه في معناها
الا اني حستها من نجاة احسن
يمكن زي ماقلت لهشام اني شوفت الاغنية في فيلم
وكان صالح سليم بيمثل العنصر الرجولي بشكل مؤثر
بس مش قضيتنا
لاحظت برده ان مخارج الفاظ عبد الوهاب مخارج الفاظ محترمة جدا

يعني بصراحة
مخارج الفاظ تليق بعبد الوهاب

ده من ناحية الاداء الصوتي

قضيتنا فعلا التلحين
بصراحة
الراجل عامل شغل جامد
لدرجة اني حسدته للحظة عشان كان اول واحد يسمع الاغنية دي
وكان بيسمعها لوحده
وحته حته
ولما كان بيضايق من حته منهم بيغيرها
ده واحد يحسسك انه عمل حاجه جديده

بالنسبة للجمل الموسيقية بقي
فانا خمنت كده انها المزيكا اللي بتتعزف بين الكوبليهات وبعضها
ولاحظت انها مختلفة في كل مره
يعني اللي بين اول كوبليهين غير اللي بين تاني كوبليهين

مافهمتش الحقيقة غير واحده منهم
مش فهمته فهمتها يعني
لكن فهمت انها متسقة مع الشعور العام للكلام

ملحوظتي الاخيرة بقي اللي هشام كان هايقتلني عليها
اني لاحظت ان بعض الجمل-الغنائية وليست الموسيقية - عبد الوهاب بيقولها اكتر من مره بشكل مختلف في كل مره
وبما ان الاغنية مافيهاش غير عبد الوهاب والعود
فانا قلت ان ده نوع من البروفات وعبد الوهاب محتار بين اكتر من طريقة يلحن بيها الجملة دي فبيقولهم ورا بعض عشان يقدر يعمل نوع من المقارانات بعد كده
طبعا مافيش داعي اقول هشام رد فعله كان ايه

حاولت ارفع الاغنية مرتين لحد دلوقتي بس في مشكلة مش عارف سببها
فهارفع البوس ده دلوقتي لحد ما ااشوف مشكلة الاغنية دي