بلاد السعادة

كان في مسلسل اطفال زمان اسمه بلاد السعاده

كان بيحكي عن اتنين بيلفوا الارض عشان يوصلوا لبلاد السعاده

ودي كانت احدى الحلقات

وصل الغريبين بلد جديدة

قابلهم واحد من اهل البلد

قالهم تعالوا اوريكوا أغرب حاجة عندنا في بلدنا

قالوله هي ايه؟؟؟

قالهم المحكمة!!!!!

راحوا المحكمة

لقوا واحد رايح للقاضي يشتكيله من واحد تاني

القاضي قاله مالك

قاله انا حرامي رحت أسرق بيت فلان

وعشان ماعييش مفتاح

قلت ادخل من الشباك

ولما جيت أدخل من الشباك

وكنت متشعبط فيه

الشباك طلع ملخلخ وخدني ووقع

فلما وقعت رجلي اتكسرت

وانا عايز تعويض

عن الكسر اللي في رجلي ده

قام القاضي سأل فلان ده قاله

أزاي يا راجل انت ماتركبش الشباك

بتاع بيتك مظبوط عاجبك كده؟؟؟اديك

هاتتشنق عشان غلطتك دي

فلان ده قاله يا سيادة القاضي

مش انا اللي مركب الشباك

ده النجار هو اللي ركبه

فأمر القاضي ياحضار النجار

ولما جه القاضي سأله وقاله

إزاي يا راجل انت ماتركبش

الشباك بتاع فلان ده مظبوط

عاجبك كده اديك

هاتتشنق

قام النجار قاله مش ذنبي انا

يا سيادة القاضي ,

اصلي لما كنت بركب الشباك ده

كان في واحد في الشارع

راكب حصان وقام الحصان

قعد يتنطط لدرجة ان صاحبه

وقع من عليه فانا قعدت اتفرج

وماركزتش في تركيب

الشباك

فأمر القاضي باحضار صاحب الحصان

فلما جه القاضي سأله وقاله

إزاي يا راجل انت تقع من

على الحصان مش عارف ان ده

بيعطل الناس عن

شغلها ؟؟؟

عاجبك كده اديك هاتتشنق

فقاله صاحب الحصان مش ذنبي

يا سعادة القاضي ده الحداد

اللي ركب للحصان الحدوة

هو اللي ركبها غلط

عشان كده الحصان قعد يتنطط

لغاية ما وقعت من عليه

فإمر القاضي يإحضار الحداد

اللي ركب الحدوة

فلما جه قاله ازاي يا راجل انت

تركب حدوة الحصان غلط

مش عارف ان ده هايخلي الناس

تقع من علي الحصان

والناس التانية تتفرج عليهم

وتسيب اشغالها يقوم الحرامي

الغلبان ده لما يجيي يسرق

بيت فلان ده ي

تشعلق على الشباك يقوم

ياخده ويقع تتكسر رجله؟؟؟

عاجبك كده اديك هاتتشنق

الحداد قاله مش ذنبي

يا سعادة القاضي اصل المعلم

بتاعي ماعلمنيش كويس

فأمر القاضي ياحضار المعلم

بتاع الحداد

فالحداد قاله ان المعلم ده مات

فقال القاضي يبقي مافيش غيرك

خدوه واشنقوه

فلما راحوا يشنقوه

لقوا الحداد طووووويل جدا على

المشنقة فماعرفوش يشنقوه

فالقاضي احتار

قالهم خلاص انا هاشفلكم

واحد قصير تشنقوه

تعالى انت

انت ده طلع مين؟؟؟؟

واحد من الاتنين الغرب عن

البلد اللي بيدوروا على بلاد السعاده

فاكرينهم؟؟

خد واحد منهم عشان يشنقه

بسبب انه قصير

قام الراجل اللي من البلد اللي

قالهم تعالوا افرجكم على

المحكمة حب يتوسطله

فراح للقاضي وقاله

يا سعاده القاضي

الراجل ده غريب

ولو قتلته ماحدش في البلد

هايحس بالعدل

حضرتك لازم تشنق واحد

من اهل البلد

قام القاضي قاله طيب

ماهو الحداد طويل على

المشنقة نتصرف ازاي؟؟؟

قاله انا هاجيبلك واحد مكانه

من اهل البلد ولا تزعل نفسك

تعالى انت

انت ده كان الحرامي

خدوا الحرامي وشنقوه

وتوتة توتة فرغت الحدوته

الهوم وورك

اذكر خمس

دروس مستفادة من القصة

كل ما يخص منحة وزارة الاتصالات

انا مقدم في المنحة

عادي

عملت الانتر فيو

عادي

مستني نتيجة الانترفيو

مافيش مشكلة

حسيت ان الموقع متهاك عليه لاني بدخل كتير ومابالاقيش اي تعديل

في اوربا والدول المتقدمة بيعملوا داون كاونت عشان تعرف حاجتين

تعرف ان الموقع شغال

وتعرف فاضلك اد ايه عشان تعرف النتيجة

ما علينا

عملت سير على

نتيجة الإنترفيو

وكانت نتيجة هذا السيرش على الإنتر فيو

اني دخلت على موضوع في منتدى الديفي دي فور عرب

ده اللينك بتاعه

http://www.dvd4arab.com/showthread.php?t=309169

عنوان الموضوع هناك هو هو عنوان البوست ده

كل ما يخص منحة وزارة الإتصالات

اللي مش عادي بقي

ان الموضوع ساعة ما انا دخلته

كان تلتمية وعشرة صفحة

لو قلنا ان كل صفحة فيها خمستاشر رد

يعني اربع تلاف وخمسمية رد

لما نقول ان نسبة الناس اللي مقدمين في المنحة وبيتفاعلوا هي عشرين في المية

وعلى فكره ده رقم مبالغ فيه جدا

يعني حوالي اتنين وعشرين الف ونص بني ادم على الاقل

اتنين وعشرين الف بني ادم عايزين يعرفوا نتيجة الانتر فيو ومستنين

والوزارة مكسلة تعمل حتى داون كاونت

ياخسارة يا مصر

لحد هنا والموضوع اللي انا كتبته ده بريء جدا مش كده؟؟؟

تعالوا بقى نبص على الكواليس بتاعة الموضوع

كواليس الموضوع مش بريئة بالمرة

اولا

انا كتبت كلمة منحة وزارة الاتصالات اكتر من مرة

وبهمزة ومن غير

طبعا عملت نفس الموضوع في كلمة نتيجة الانتر فيو

وحتى فصلت بين كلمة انتر وفيو ومافضلتش

ده انا كمان حطيت لينك لموقع الديفي دي

وكتبت كلمة خسارة يا مصر

والوزارة

من الاخر

الموضوع ده بشكل اساسي دعاية للمدونة بتاعتي

عشان الرجل تخش عليها كتير

طبعا ده تجربة

وعشان التجربة تتمتع بنسبة عالية من الشفافية

احب اقولكم ان عدد الزوار بتاع المدونة لحد دلوقتي

13222 زائر

والنهارده تلاتة وعشرين اتناشر الفين وسبعة

عشان اي حد يخش في اي وقت يقدر يعرف نتيجه الموضوع ده من نفسه وبنفسه

الكلمتين اللي فاتوا دول في حد ذاتهم هايخلوك تدخل المدونة كتير

تاني غرض مش بريء بقي

هو اني اديتكم رسالة سلبية قوية جدا عن مصر والوزارة والبلد

وده عشان انا صيغت المعلومات بشكل قليل الادب

ايه هو الشكل ده؟؟؟

ببساطة لان الارقام اللي كتبتها مش مضبوطة

ببساطة

لان المنحة دي هاتقبل الفين وخمسمية شخص بس

وكل ستنر بيعمل انترفيو لضعف العدد اللي هايقبله بس

يعني لو سنتر مخطط انه يدرس لمية شخص

فهو بعمل انتر فيو لمتين

بيختار منهم مية

وبالتالي في خمس تلاف واحد بس هما اللي عملو الانتر فيو

منهم اللي ماقدرش يقدم الاقرار

ومنهم اللي جاله جيش

ومنهم اللي قدم زي الناس ما بتقدم ومش مهتم بالموضوع

ومنهم اللي عارف يقينا انه ساقط في الانتر فيو

ومنهم اللي مراحش الانتر فيو اساسا

يعني فعليا في تلات اربع تلاف بس هما اللي مستنين

فضلا عن انه عشان تعمل انتر فيو مع العدد ده كله وتدخل البيانات بتاعة كل طالب من اسم ورقم بطاقة واوراق كاملة ولا لا ونتيجة جيش ودرجة انتر فيو على الداتا بيس بتاعة الاتصالات مش عملية بسيطة وبتاخد وقت

النتيجه نفسها مش هاتاخد وقت لان الكمبيوتر هايختار اعلى درجات في كل سنتر

ببساطة جدا المشكلة مش في الوزارة

لنا عوده مع النوايا الغير حسنة في موضوع تاني

الوادي الجديد

محافظة الوادي الجديد
تخيلوا في محافظة في مصر بالاسم ده
افتكر ان عندي معلومة قديييييييييييييييييييمة عن الموضوع ده من ايام اعدادي
بس للاسف كانت المعلومة تتلخص في ان في محافظة بالاسم ده
ابن خالي راح هناك اليومين اللي فاتوا لسبب ما
المهم لما جه بيحكلنا
عرفت منه ان المحافظة دي مساحتها تلت مساحة مصر
وعدد سكانها مية خمسة وتمنانين الف نسمة بس
يعني واحد لكل اتنين كيلو متر مربع تقريبا
فيها مية وعشرين موقع سياحي
تحفر عشرة متر في الارض تلاقي نافورة مياه جوفيه طلعتلك
المحافظة بتقولك تعالى خد ارض وازرعها واحنا هانيسرلك كل حاجه
هانديك فلوس كمان
كان راكب تاكس
والشارع فاضي
ولقا السواق وقف
ليه يا اسطى؟؟
اصل الاشارة حمرا
تخيلوا
سواق تاكس
بيقف في الاشارة الحمرا
ومافيش عسكري ولا امين ولا عربية غيره
مافيش حتى واحد ماشي في الشارع
اللي عايز يعرف اكتر عن المحافظة دي
الموقع اهو

http://www.geocities.com/egyptalwady/index1.htm

labyrinth

Labyrinth, building made up of intricate, mazelike chambers or passages so designed that a person entering one would find it difficult to find a way...

بفكر اعمل برنامج يحل المشكلة دي

من خمس ست سنين

من خمس ولا ست سنين كده كنت لسه بقول يا برمجة قلت اعمل برنامج ذكاء اصطناعي ودورت لقيت برنامج اوبن سورس بيتكلم عن برنامج لتعبان ماشي في متاهة ساعتها قلت ده سهل بس ماعملتوش من كام ساعة ربنا من عليا وعملت اول برنامج ذكي في حياتي صحيح هو برنامج عبيط بس تحت لستة برامج الذكاء الاصطناعي

وعشان كده حبيت اخلد اللحظة دي لاحفادي ستاشر نوفمبر الفين وسبعة

في عشق الزجازيج (أول زجل شعبولي فريد من نوعه )

ليه بتسألني إن كنت حبيبي ؟

وانت معاك القلب دليل

!ليه وياك السكة تطول

ويا عذاب ب ودموع وأنين

ليه بستنى يقرب بكرة

وانت حبيبي قريب في العين

وان من الليل عمالة اناديك

وأتمنى حبيبي أكون ليك

أنت في حلمي يمكن صورة

جوا مشاعري ..أجمل فكرة

ليه بتسالي إن كنت حبيبي ؟؟

يعني يا شيخ مخك دا مأشة ؟؟

***********

يعني في يوم مسألتش نفسك ؟؟

ليه الشوق جوايا يزيد ؟؟

يعني لا عمرك يوم حسيت

إن عيوني تنادي عينيك ؟؟

وان العمر في قربك لحظة

وفي بعدك سنتين ويومين !

طب والشوق الي بيجريلك

عينك منه اتحولت فين ؟؟؟

أعمل إيه إن كنت سعادتك

كلب البحر بينطق عنك

أصلك يا حبيبي بجموته

يعني ياروحي صنم متصور

وجاي تسألني بعد ما شاب

شعري دماغي خلاص واتقصف

**********

لما يأست وقلت خلاص

عوضك في المخ الترباس

واستسلمت لقدري عشان

اقدر أواصل وأنسى هواك

أتاريك يا منيل كنت انت

ميت فيا ودايب دوب

واما عينيك العمشة تقابل

نن عينيا تبص لفوق

وأنا كنت بظن انك احول

بس طلعت خجول وخلوق

**************

وانا يعجبني الشاب الدوغري

عينه لا تبص شما ويمين

ولا غاوي يألف أشعار

ولا عاجبه الغنا والتلحين

علشان فاكر انه بكدبه

يقدر ياكل عقلي وياخده

هي هع هي هع هي هع

دا بعده بعده بعده بعده

*************

علشان كدا ماهويت إلا انت

وكتمت الشوق جوا عيوني

وناديتك جوايا وأنا عارفه

إن الصدى هيكون صدى صوتي

أنا مقدرتش أبين حبي

ولا اشكي الألم المكلوم

كان قلمي الصاحب الوحداني

وورق كراستي شايل همي

*************

بس تصدق يا ابن الناس

كدا أحسن من ميت إحساس

تعب القلب لوحده في لحظة

أحسن من جلده لأيام

واما تخبي مشاعرك عني

وأنا أداريها وأفضل ساكتة

أسلم و أأمن من الإفصاح

أصل أنا عندي نظرة ومبد

أ أي كلام في الحب يا مستر

قبل كتاب وجوازة حلال

يبقى مهما كان من جوا

صادق برضه وهدفه نبيل

برضه هيفضل لعب عيال

وعلى السلم هيكون رقص

ومرجحة شمال ويمين

**************

وأنا منك هتعلم درس

انك مهما شقيت وتعبت

وكتمت وخبيت جواك

ومخلتيش شوشو يذلك

ويقلب قلبك وهواك

ويوسوس بالسم فؤادك

ويلوث عقلك ويقولك

ارحم قلبك وارحم عينك

كبدي عليك يابني وعلى حالك

الحب دا بهدلة وعذاب

اجري صارحها وبص لحالك

عيش كام يوم جنب الي اختارها

قلبك ولا يقدر ينساها

حب بريء وتعارف طاهر

ومشاعر متبادلة في كام كلمة

تطفي النار وتهدي الشوق

وبكرة تفرج طول ما النية

بيت وعيال وجوازة هنية

ومتستعجلش المستقبل

بكرة يحلها ميت حلال

روق بس أنت وخدها

واتفسحوا جوا الأدغال

خلص شوشو كلامه وفضى

كل زبالته في دماغ عاشق غلبان

*************

اسمع يابني وانتي ياحلوة

حذار منه حذار حذار

خليك في السليم وهتكسب

وارضي ربك وبلاش تلعب

بالنار وخصوصا لو كانت

قايدة يف قلب وروح انسان

************

وانتي يا بيدا يا حلوة يا نونو

حسك تسمعي كلمة جميلة

تفرحي بيها زي الهبلة

وما يسمعك اسطوانات عنتر

ويحسسك إن أنتي بقيتي

روحه وكرشه آنسة عبلة

اديه على دماغه وسكيه

وارميه بالجزمة وربيه

وعلميه إن بنات الناس

مش لعبه في ايده النسناس

*************

نرجع للموضوع من الأول

اصلي نسيته من كتر الرغي

كان إيه يا آيات فكريني

أه كان ليه بتسالني ؟؟

بعد ما الأستاذ غلبني

وبعد ما أنا نفذت المبدأ

وبعد ما البال هدا وارتاح

علشان رضى ربه الفتاح

وعشان كمل تحت النور

ومستخباش تحت السور

و لا قال معلش يارب انت غفور

وحط لعرف الناس والأهل

ألف حساب مش جهل ×جهل

وعشان كدا كان حب صحيح

من غير تلميح ولا تصريح

وقبل ما امشي أنا عايزة اعزمكم

برهومة جه واتقدملي

ولما خلاص بقى ليا حلالي

بس ساعتها قدرت أقولها

وبس ساعتها هو عرفها

وبس ساعتها كان طعمها أحلى

وقلتله بالفم المليانان

ت حبيبي وروحي وقلبي

يا ملاكي يا أحلى إنسان

بس خلاص

stubborn emmy

ذكريات جامعية

لاسباب يطول شرحها التحقت في حياتي بثلاث جامعات

جايز ده من حسن حظي

يمكن عشان تباين الفئات اللي قابلتها في كل جامعة

الاولى كانت خاصة -يعني بمصاريف عالية وخاصة لفشلة الثانوية العامة- ومش عيب اني اعترف اني فشلت في الثانوية العامة

خصوصا اني مش معترف بمجاميع الثانوية العامة اصلا

نرجع لموضوعنا

قابلت فيها ناس غريبة جدا

واذا اخدنا في الاعتبار ان ده اول احتكاك ليا بالدراسة الجامعة هانلاقي اني كنت دخل في عالم غريب

قابلت نوعيات سفلة من البشر

ونوعيات جدعة

وكدابين ومؤدبين وناس فاكرة صوتها حلو وناس غاوية تمثيل وناس غاوية تعليق

بفضل ربنا تفوقت وخرجت من الجامعة الخاصة لجامعة حكومة

لما بسال نفسي دلوقتي لسه بكلم كام واحد من اللي عرفتهم في الجامعة الخاصة دي

بلاقيهم تلاتة بالعدد

واحد منهم بكلمه على مضض اساسا

في الجامعة ام بلاش

عرفت كتير اوي

بكلم منهم كام واحد لحد دلوقتي

عشرة اتناشر بالكتير

نصهم مش فرحان اني بكلمهم

بس لما نبص لفرق العدد

نكتشف ايه؟

نكتشف اني في الاول كنت مش بعرف اعرف الناس الصح

عشان كده مابيتبقاش منهم كتير

مع اني في الجامعة الاولانية دي عرفت تقريبا اربع تخماس الدفعة معرفة قوية مش سلام سلام يعني

بس ارجع واقول

الذبد بيذهب

واللي بينفع الناس يظل راسخ في الارض

النهارده هاحكيلكم حكاية من ذكرياتي الجامعية التانية

كنا في مشروع التخرج

مطلوب منك تعمل تيم وورك بين اربعة وعشرين طالب

منهم اللي مابيعرفش يعمل حاجه واللي عامل نفسه مايعرفش

واللي بيستهبل واللي رامي عليك الحمل

مرة من المرات

اكتشفت ان الاربعة وعشرين طالب

مافيش اتنين منهم طايقين بعض

اي اتنين يقفوا مع بعض

يشتموا في بقية المشروع

وانا اولهم

انا اول اللي بيشتموا مش اول اللي بيتشتموا

والنتيجه الطبيعية

ماحدش عايز يشتغل في المشروع قبل ما التلاته وعشرين طالب التنين ما يشتغلوا

تفتق ذهني عن فكرة عبقرية -او انا كنت فاكرها كده- هي اني انظم رحلة

ايه رايكم يا جماعة نطلع رحله

يمكن نلطف الجو

طبعا كانت اول خناقة هي نروح فين

لكم ان تتخيلوا

تاني خناقة نروح ازاي

تلات خناقة نروح امتى

رابع خناقة نجيب مرافقين ولا لا

خامس خناقة نروح فين-كنا نسينا اننا اتخانقناها في الاول-

سادس خناقة لما بعض الناس اتاخرت

سابع خناقة كانت في الطريق مع بعض المتسولين

تامن خناقة لما وصلنا نعمل ايه

تاسع خناقة نعمل كلنا حاجه واحده ولا كل واحد يعمل اللي هو عايزة

بعد كده مابقتش اعد

في لحظة صفا

قعدنا نلعب لعبة الازازة

جه دوري اسال بنت زميلتنا سؤال

سالتها سؤال بريء جدا

وردت على مضض وهي بتبصلي بقرف

ولما جه دورها تسالني

سالتني سؤال غريب جدا

لؤي انت ليه قليل الزوق؟؟؟

سؤال صعب واجابته اصعب

قلتلها اصلي مالاقتش زوق كفاية

المهم عملنا في اليوم ده حوالي مية وخمستاشر خناقة

وجاهدا حاولت اصلح الموقف لحد مارجعنا كلنا مبسوطين والحمد لله

تاني يوم رحت الكلية

صباح الخير

......................

صباح الخير

...................

سلام عليكم

.....................

الله الله الله

هو فيه ايه

اكتشفت ان كل واحد عايز يقتل الباقي

ليه؟؟؟

قعدت يومين اتحرى لغاية ما عرفت

كل الناس راحت الكلية تاني يوم

لقوا الكلية كلها معاها تفاصيل الرحلة

بالاضافة الى بعض التفاصيل المشينة لبعض البنات اللي كانوا معانا

الله الله الله

احنا كدا دخلنا في منطقة اعراض

طبعا كل واحد فاكر ان فلان او فلان هو اللي قال الكلام ده

وكله بينكر

حادثة غريبة

بعد شهر عرفنا مين اللي قال وطلع واحد بره المشروع اساسا بس معانا في الكلية وكان جاي مع صاحبه

وبعد سنتين عرفت ليه البنت سالتني السؤال ده

ببساطة لانها فهمت سؤالي غلط

فهمته على ضوء ان في حد كان قايل عليها كلام وافتكرتني بنبط عليها

طيب انا بحكي الموضوع الطويل ده كله ليه؟؟؟؟

عشان النقط التالية

1 لو بتعمل مشروع تخرج اعمله لوحدك

2 لو اضطريت تعمله مع حد اختاره بعنايه

3 لو ماخترتوش بعناية حاول ماتكرهوش بعض

4 لو كرهتوا بعض حاول ماتطلعوش رحله

5 لو طلعتوا رحلة حاول ماتلعبش لعبة الازازة

6 لو لعبت لعبة الازازة حاول تكون قبلها على علم بكل الاشاعات اللي طالعة على اعضاء مشروعك

7 لو ماكنتش عارفها كلها حاول ماتسالش اسئلة مالهاش لازمة

8 لو سالت اسئلة مالهاش لازمة حاول ماتكونش قليل الزوق

9 لو طلعت قليل الزوق حاول تروح مصحة نفسية تتعالج

10 لو قابلك في كليتك حد وحش ماتنظمش حياتك عليه لانها كلها كام سنه وتشيله من حياتك اصلا

11 لو نظمت حياتك عليه هاتلاقي الف غيره بوظولك حياتك دي تاني

12 حاول تنتقي اصحابك بعناية

13 حاول تفكر في مستقبلك وماتبصش تحت رجليك

14 لو وقعت في مشكلة حاول تحلها مش تورط نفسك فيها اكتر

15 يوجد في مصر جامعات خاصة

16 يوجد في مصر جامعات حكومية

17 يوجد في مصر جامعات لسه مانعرفش عنها حاجه

18 مصر فيها اكتر من جامعة على الاقل تلات جامعات

19 الجامعات فيها الغث وفيها الثمين

20 حاول تركز مع الكويسين لان دول اللي هايفضلوا معاك

21 حافظ على بسمة في حياتك ولكن حافظ على عقلك اكثر ولا تتشتت مع الاسماء المتعددة

22 اذا ادعى شخص ما انه مصطفى من الله بعد النبي صلى الله عليه وسلم فلا تكترث لما يقول

23 المرء على دين خليله فلينظر احدكم من يخالل

24 تحلى بالصبر والايمان فهو المعين لك في حياتك

منحة ربنا يسهل للكمبيوتر

الرابط ده لموضوع اتنشر في جريدة الأهرام

واضح ان حد من الطلبة ابوه ولا عمه صحفي

انا بقي لا ابويا ولا عمي صحفي

بس انا عندي مدونة

ومن هذه المدونة

احب ازود على الموضوع اللي اتنشر ده شوية حاجات

المركز المذكور وان لم يكن اسمه مذكور

كان بيوزع على المحاضرين ورقة بتعليمات المركز

ودي بعض التعليمات العبقرية

رجاء التكرم بالالتوام بالحضورز قبل ميعاد المحاضرة بنصف ساعة

طبعا مش هايحاسبوك عليها

ممنوع دخول الدارس قبل المحاضر

طيب وبتمضوا المحاضر على الكلام ده ليه

يعني المحاضر هايمنع الدارس انه يدخل قبله

ممنوع ترك الدارس بمفرده داخل المعامل وقاعات الدراسة

طبعا عشان الشيطان شاطر وممكن الدارس ينتحر من اللي حاصله في المركز فبلاش ينتحر في المعمل ويجيبلنا مصيبة

اجراء اختبارات للطلبة الدارسين بعد نهاية كل دورة تحت اشراف ادارة المركز وغير مسموح بحضور المدرسين للامتحان

طيب المدرسين مالهم بقي يمضوا على الكلام ده ليه

يراعى عدم تناول اي مشروبات او مأكولات داخل قاعات التدرييس والمعامل ويمكن تناولها في الاماكن المخصصة لذلك

اصل المركز كان فاتح كافتريا جديده

الالتزام بالمظهر العام والتحدث بصوت منخفض مع الزملاء

البند ده ممكن يبان عادي

لكن اللي راح المركز يعرف ان اخر حاجه ممكن يفكر فيها صاحب المركز هي الصوت الواطي

التاكد من حاله المختبر قبل بدء الدورة وبعدها

ولو المختبر عايز نفخ عجل ولا ظبط زوايا ولا حتى تغيير زيت المحاضر يعله مش عيب اصل مافيش طقم صيانة في المركز

طبعا المحاضر مابيتحاسبش على الكلام ده

وفي محاضرين مابتتحاسبش على اي كلام اصلا حتى ساعات التدريس

بعد الانتهاء من المحاضرة مراجعة الادارة

وتقولهم وضبنا المعم وكنسناه ومسحناه وغسلناه بالليفة والصابونة ونيمناه في زنزانته

تفعيل وتنفيذ تعليمات المركز للساده الدارسين

معلش يا جماعة اصل مافيش طقم امن

بالاضافة الى انه المركز ممكن تطق في دماغه يقوم يقول الدارسين يجوو بشورتات

طيب مين غير المحاضر يمنع دخول اي طالب او طالبة جاي ببنطلون

من حق المدرس تاول المشروبات اثناء الاستراحه في الاماكن المخصصة لذلك

يعني الكافتريا لازم تشتغل

بس هو فين بقي اوقات الاستراحه دي

عدم السماح للدارسين باستعمال التليفونات المحمولة اثناء المحاضرة

حتى لو الدارس اللي جاي ده عنده مصيبة سودة

ممنوع تبادل ارقام التليفونات مع الدارسين

عشان ماتاخدهمش تديهم درس بره

طيب دي منحه اساسا هايجيوا ياخدوا درس بره ليه

يبقي بلاش تديهم رقم تليفونك عشان ده مش كاباريه

عايزين يتكلموا معاك بره المحاضرة يقعدوا معاك في الكافتريا

ومش بعيد لو لاقناك عضو نشط نديلك نسبه على ازايز الحاجه الساقعة اللي هاتتفتح

غير مصرح للمدرسين بالتجول داخل المركز

عشان المركز مبني في منطقه عسكرية

وبعدين احتمال تلاقي حد كده ولا كده خالع راسه ولا حاجه

التأكد من ان كل الاجهزة بحالة جيده وتم اغلاقها بعد نهاية كل محاضرة

ولو جهاز سخن ولا عيان ولا هارده واجعة ولا عنده التهاب في الكابلات تعمله كمادات وتديله اسبرينتين

تشغيل جميع الاجهزة والتأكد من سلامتها قبل بدء المحاضرة

عشان كده بقي جايبين المحاضر نص ساعة بدري

طيب افرض لقيت جهاز عامل حادثة ولا عينه واجعاه نتصرف ازاي؟؟؟

دي بعض التعليمات العبقرية للمركز

وكفاية كده بقي عشان ماغلطش فيهم

عربية رمضان

المنظر ده كان في محطة مترو روض الفرج الساعة ستة الا ربع مساء

اربعة امنا واتنين عساكر

واقفين بالظبط في المكان اللي هايبقي فيه اخر باب في العربيية التانية

منتظرين المترو يجيي عشان يقلبوا عيشهم

يعني ايه؟

يعني الجماعة دول بربطة المعلم كده هزوا طولهم وكتفاتهم وايشاتهم ونزلوا الرصيف عشان يشوفوا الناس المخالفين ولاد الكلب اللي راكبين في عربية الستات

ماشي حقهم

بس اللي مش حقهم الطريقة اللي بينزلوهم بيها

من سنتين ركبت في عربية الستات الساعة سته الا عشرة

طبعا ماكنتش بصيت في الساعة لكن لقيت رجالة راكبة فماخدتش خوانة

تاني محطه لقيت تشريفة زي دي كده

عشان كده عرفت ان دول واقفين عشان كده فقلت اصورهم

اللي حصل ان البهوات -ساعتها-قالولنا انزلوا اركبوا في العربية اللي وراها

طبعا الناس نزلت بطيب خاطر بناء على الكلام اللي اتقال

كل اللي بينزل بيلاقي عسكري مانعه يركب العربية اللي وراها

مع العلم انهم بيطلبوا من الناس تنزل بمنتهى الادب

لانه مايقدرش يدخل يشده من قفاه

فبينزله بمزاجه

طبعا في ناس مانزلتش

ماحدش عملها حاجه

يفضل الحال كده لحد ما المترو يمشي

ساعتها الادب يروح بعيد

ونبتدي بقي قلة الادب

بطايقكم

غرامة عشرة جنية واربعين قرش

لما نزلت من العربية من سنتين

قررت اني الامض

قلتلهم انا من حقي ارفض الغرامة وتعملولي محضر

اللي مش منحقكم انتوا انكم ماتقوليليش على حقي ده

ودخلت عملت محضر في وسط التهديدات بان الغرامة ممكن توصل بعد المحضر لخمسمية جنية

تقريبا قصده اجرة وكيل النيابة اللي هايحقق في المحضر

قلتله ماهو ممكن حضرتك اللي تدفع الخمسميت جنية

طبعا كتبت في المحضر كلام جميل جدا

بحيث ان المحضر في الغالب اتقطع بعد ما خرجت

لانه ماجاليش لحد دلوقتي

وبعدين هما مش خاسرانين حاجه

لما كل يوم يصطادلهم متروهين تلاته من دول

كل متروا فيه خمسه سته زباين

لو واحد ولا اتنين من الزباين في كل مترو عمل محضر واتقطع هما اللي كاسبانين

الظريف اني من سنه

وقعت في نفس الموقف تاني

بس المره دي مانزلتش

استنين لحد ما قرروا ان مافيش حد تاني هاينزل

وبعدين نزلت من الباب الاولاني قبل ما المتروا يقفل على طول

طبعا كانوا هما مشغولين في لم الغلة

المرة دي بقي ركبت في العربية التالته بعد ماصورتهم الصورة التانية دي

وسمعت تعليقات الناس اللي شافت الموضوع ده في العربية التالته

راجل قال

رمضان داخل ولازم يعملوا قرشين عشان ياميش رمضان

وست قالت

الحكومة لو ليها حق عندك تاخده لكن لو ليك حق عندها انساه

خميس ابو العافية

قطاع الطرق والكباري

ليه الجزء التاني

قابلت واحد صاحبي امبارح ماشفتوش من زمان وسبحان الله لقيته بيتكلم في موضوع الجواز

ماتجوزتش ليه ومش ليه

فسالته انت ملهوف على الجواز كده ليه؟؟

قالي كلام كتير

كلامه كان مقنع الحقيقة

وقالي على درس للشيخ محمود المصري

بيتكلم فيه عن فوائد الجواز

قلت اجيبهولكم

وعشان تحملوا الدرس ممكن تحملوه من هنا

ست ستات

قال العرب زمان

لاتنكحوا من النساء ست

الانانة والمنانة والحنانة والحداقة والبراقة والشداقة

يعني ايه لامؤاخذة

الانانة دي اللي هي كثيرة الانين والشكوى والتألم

اه يا راسي ايه يا صباعة فلانة ضربتي وفلان بصلي باحتقار

والمنانة اللي كثيرة المن

مش انا اللي جبتلك وانا اللي سوتلك وعملتلك

انا قعدت من الشغل عشان خاطرك

حملت في العيال عشان خاطرك

قصيت ضوافري عشان خاطرك

والحنانة هي اللي بتحن لجوزها القديم وهي مع جوزها الجديد

ابو محمد لما كان بيشرب الشاي كان بيشربه من غير صوت

ابو محمد كان بيغسل رجليه قبل ما ينام

ابو محمد كان كل ما يدخل البيت يجبلي معاه ورد

ابو محمد كان عنده عضلات كبيرة

الحداقة هي اللي تحدق في ما لغيرها

فلانة عندها عربيه واحنا لا ليه؟

اشمعنى اختي بتصيف في مارينا

انا عايزة خدامة فلبينية

سوسن جارتنا المشلولة جوزها جابلها ك رسي بعجل تمنة اتناشر الف جنية عشان بيمشي لوحده مش لازم حد يزقها هاتلي واحد

البراقة هي كثرية الاهتمام بمظهرها

الجزر على العنين عشان يشد الجفون

والخيار على المناخير عشان يصغر فتحتها شوية

والبطاطس مش مهم تتعمل صنية بس ياترى ممكن نعملها كريم ترطيب ولا لا

كوافير وميكياج ومنيكير وبادكير والحاجات دي يعني

الشداقة هي الرغاية

دانت نزلت الصبح الشغل وسماح جارتنا اتخانقت مع ابنها اصله ماعملش واجب المدرسة امبارح وماقلهاش غير النهارده ال ايه المدرسة اخر مرة ضربته عشان ماعملش الواجب كله وماضربتش ولد تاني ماعملش الواجب خالص بي عشان الولد ده ابن اخت مدرس زميلهم ولما سماح راحد المدرسة وبصت على المدرسة لاقتها مش لابسه لا دبلة يمين ولا شمال وسالت على المدرس لقته طول بعرض وحليوة ومدرس كميا كمان يعني بيكسب دهب

قالت ياما نفسي اخده لاختي

وقعدنا نفكر ناخده لاختها ازاي ازاي

وفي الاخر قالت تسال اختها يمكن تكون عندها فكره حلوة ولا حاجه رد علينا جوزها وقال انها في المدرسة عشان ابنها جاله استدعاء ولي امر

.............................

بجد بقي

الحاجات دي تنكد على اجدعها راجل حتى لو كانت صاحبتها ملكة جمال العالم

احقاقا للحق برده

يحكى ان ملكا كان مابيطقش نكد النسوان

وفي مرة جاتله جارية كانت حلم حياته

اخر واحده ممكن تنكد في الدنيا

لما اتاكد من انها مش ممكن تنكد عليه

اخدها وراحوا قصر تاني بتاعة

وقفل عليها

وهو بياكلها عنباية

وقفت في زورها ماتت

عكننت عليه برده

يعني مافيش فايده

العلم لا يكيل بالبتينجان

قابلت واحد لاول مرة

وفي الغالب هاتكون الاخيرة

عنده اتنين وتلاتين سنة

حكالي انه في مرة راح يقدم على شغل

الراجل لاقاه مش عارف حاجه

قاله كان المفروض تاخد كورسات

قام صاحبنا قاله اصلي اتجوزت وخلفت بدل ما اخد كورسات

الظريف بقي

اني قابلته وهو بياخد كورس عشان هايقدم على شغل عشان الشغل اللي هو فيه مش عاجبه

انتهت القصة

اللهم ارزقنا الجنة ومن نحب

السلام عليكم
اخباركم ايه يا شباب
كووووول؟
نايس
يو
يو يو

وانا معدي قدام التلفزيون لمحت اعلان جبنة
عبيط جدا
بس لفت نظري في حاجه
كان متصور في لوكشن عبارة عن جنينة او ارض خضرا فيها شلالات لبن
طبعا جرافيك
بس المنظر شدني
الاخضر مع الابيض مبهر بجد

بعد ما خلص الاعلان
عرفت شدني ليه
عشان مس جوايا حلم قديم
انهار اللبن في الجنة
والله يا خونا المنظظر-اللي من تخخيل بني ادم محدود القدرة على الابداع ده- في منتهى الروعة
فما بالكم بالحقيقة
اللهم ارزقنا الجنة
وارزقنا من نحب
وارزقها من نحب

ليـــــــــــــــــــــــــــــــــــــــــــــــــــــــــــــه!!!!!!!!!!؟؟؟؟؟؟

ليه الواحد بيتجوز؟؟؟

سؤال غريب مش كده؟

طيب معلش خليك معايا للأخر

حضرتك متجوز؟

طيب متجوز ليه؟

اتجوزت ليه يعني؟؟؟؟

لو سمحت ماتقوليش استقرار

الكلمة دي شكلهم بيوزعوها على قسيمة الجواز

بيوزعوا الكلمة لكن مابيوزعوش الفعل

ولا تكونش بتداري بيها خبتك

اعذرني على وقاحتي بس خلينا صرحا مع بعض

انت عايش لوحد رايك من دماغك فلوسك في جيبك صحابك على القهوة فشارك وتلفزيونك وماتشاتك وسلطاتك وبابا غنوجك

توجع دماغك ليه بقي؟

باللي يزاحمك في السرير ويعترض على تفكريك او ارائك -الاقتصادية تحديدا- ويقولك نتغدى بره واتفرج على المسلسل واروح ازور امي وتيجي تاخدي الساعة اتنين بالليل ومش مهم شغلك الصبح

ايه السبب اللي يخليك تشيل ده كله فوق دماغك

ايه

لقمة نضيفة

المطاعم ارخص من الجواز

اولا المطاعم مالهاش راس مال ثابت زي الشبكة والمهر والشقة

وبعدين اذا كانت المطاعم حرامية وبيغلوا الاكل عن تكلفته في البيت للضعف فافتكر انك واحد مش اتنين

يكفي انك هاتريح دماغك من انتظار الاكل

فضلا عن اختيارات الزوجه العبقرية لاكل النهارده

طابخة ايه النهارده يا سنية

طابخة بسلة وبتنجان

بس انا مابحبش لا البسلة ولا البنتنجان

مافيش غيرهم في السوق

على اساس ان السوق ده مافيهوش مكرونة ولا دقيق ولا حاجه ساقعة حتى

سيبك من ان في ريحة ملوخية بالطاشة طالعة من الشقة اللي جنبكم

اسمحلي

الاكل مش سبب بالمرة للجواز

امممم

طيب الهدمة النظيفة؟

اللي مشي على الاكل في المطاعم يمشي على الغسالة الاوتوماتك

حتى تنضيف الشقة

ممكن تجيب حد ينضفهالك وياخد اجرته ويمشي

طيب عشان البيولجي يعني؟؟؟؟؟

بس انا هافترض انك راجل محترم

مابتلعبش بديلك

وعمرك ما عرفت معنى البيولجي ده ايه

بس نت راجل محترم بقالك تلاتين سنه ماعرفتش البيولجي

نصهم على الاقل كنت محتاج في البيولجي ده

كمل جميلك بقي وانسي البيولجي

وبعدين البيولجي ده لو هايخليك تتجوز يبقي هايأثر على السيكولوجي بتاعك

يعني قصاد البيولجي هايجيلك سكر وضغط وقلب ومرارة وبنكرياس واحمد ومنه وتهى وحسين وسيف ورضوى

يمكن هو ده اللي خلاك تتجوز؟

العيال؟

مش عارف

دي بقي مش هاعرف اناقشك فيها

اسيبك انا بقي عشان تلحق تروح للمدام

من شابه اباه ما ظلم

وانا ابويا الله يرحمه مات بجلطة في المخ

ام اربعة واربعين

المدونة بالموضوع ده تبقي باربعة واربعين موضوع

ده اذا اعتبرنا ان ده موضوع يعني


ابقوا فكروني اعمل بوست زي ده لما المدونة تبقي ام سبعة وسبعين


ليه؟؟؟


فكروني وانتوا ساكتين وخلاص

ارادة النكد

سيداتي انساتي سادتي

مرحبا بكم في برنامجكم المفضل فلسفات ومعجنات

معنا اليوم دكتور زكي ماهر نبيه

وده على فكره اسمه يا جماعه

اسمه بس

هايكلمنا النهارده عن تلات حاجات

البيتزا بالتونة وارادة النكد واحدث رنات الموبايل

اهلا بحضرتك معانا يا دكتور

اهلا بيكي

تحب تكلمنا في ايه الاول؟؟

نتكلم الاول في البيتزا اللي بالتونة

ولو في وقت في اخر الحلقة ممكن اكلمكم عن البطاطس بالخيار

..................................

....................

....................................

..................................

(تم حذف الكلام الفارغ ده لانه مايهمناش في المدونة)

وبعد ما اتكلمنا عن الفطيرة ام سكر نتكلم بقي عن ارادة النكد

فرويد مرة قالي انه مؤمن تماما بارادة الموت

قمت انا طلبت واحد سحلب -ماحنا كنا قاعدين على القهوة زي عادتنا- وقلتله

انا بقي مؤمن بارادة النكد

قام فرويد مافهمش

سالني يعني ايه

ودي ميزة -الشهاده لله- في فرويد الحقيقة انه لما مايفهمش يسال على طول

صحيح هو بيسال كتير وساعات تحسي انه غبي كده

لكن انا شخصيا مابطقش الناس اللي بتدعي العلم دي

نرجع لما فرويد سألني في (غباء) يعني ايه اراده النكد

قلتله يعني الناس تبقي عايزة تنكد على نفسها

يعني مثلا عندك اي واحده ست في عزا

تقعد تعيط وتصوت وتلطم

ليه ؟

تفتكر بتعيط على المرحوم

هي بتعيط عشان نفسها تعيط

حابه جدا انها تشعر بالحزن

على فكره اغلب الستات كده

اغلب الستات بيفتكروا ان الحزن بيديهم جمال

وده اكبر غلط

مافيش حد بيبقي جميل وهو مكشر

وهو ممبوز

وهو قرفان

عمر ما واحده تتصور انها لما تقول لجوزها ان الدنيا حر جدا -وهي مش عايزاه يجبلها تكيف لان في تكييف فعلا- عمرها ما هاتقوله كده وتنتظر انه يبقي مبسوط

انا هاضرب للمشاهدين مثل يقرب الصورة

لو انا عندي عربية

والعربية دي بتبوظ

لو بتبوظ لسبب منطقي

هاوديها للمكانيكي يصلحها

وكل الناس عربيتها بتبوظ وبتصلحها

ده عادي جدا

لكن لو العربية دي بتبوظ لاسباب غير محددة

انزل الصبح ادورها ماتدورش

اجيبلها الميكانيكي تشوفه تروح تدور عادي جدا ومافيش مشكلة

اجي امشي بيها تحلف ماهي ماشية

تجيبلها حد يشوف مالها تلاقيها بقت رهوان

وياسلام لو بتبوظ كتير بقي

لو العربية فاهمه انها بكده هاتخليني مهتم بيها اكتر تبقي غلطانة

ليه؟

لاني مش هايبقي عندي وقت اغسلها ولا انظفها

مش هايبقي عندي حتى استعداد لكده

عربيتي بتبوظ على طول

مش مامن اركبها وماعملش بيها حادثه

تفتكروا هاسمكرها كويس ولا هاحطلها شخاليل وكشافات

طبعا لا

امتى اهتم بعربيتي

لما تبقي مريحاني

مريحاني مش مقضيالي الغرض

ماهو اللي عربيته عربية عاديه جدا

بتبوظ بشكل عادي وبتتصلح بشكل عادي هايعاملها بشكل عادي

لكن اللي عربيته دايما سانداه

كل ما يحتاجها يلاقيها

اكيد هايحافظ عليها

هايحافظ عليها قوي

وعمره ما يبعها

لكن صاحبنا ابو عربية نكدية

مش هايفكر كتير لو جاله مشتري للعربية دي

اما بقي بالنسبة لرنات الموبايل فرنات عمرو دياب الجديده هاتنزل قريب اوي اوي اوي.........................

......................

........................

وفي نهاية برنامجنا بنشكر الساده المشاهدين وانا بقولكم اهم حاجه نكون مسكنا ورقه وقلم وكتبنا وصفة البتزا وارقام التليفونات اللي هاتنزلوا منها النغمات

كنت سعيده معاكم اوي يا جماعة

اشوفكم الحلقة اللي جاية على خير

تترات

الدكتور

انتي ليه مانوهتيش عن ارادة النكد في ختام الحلقة

المذيعة

اصل المخرج لاقاك هاتعك قام منزل اعلانات لو كان سابك كانت مراته قتلته