متى تنضم للثورة؟؟؟؟

خمسة اخوات

ابوهم مات...وورثوا هما وامهم شقة غير اللي هما ساكنين فيها 

كانوا صغيرين..وامهم اجرت الشقة عشان تصرف عليهم

طبعا اشترطت انه يبقي ايجار جديد يتجدد كل سنة او سنتين بالكتير عشان تزود الايجار بما يتناسب مع سعر السوق في كل وقت

جالها مستأجر كويس..عريس جديد عايز يتجوز

هو صحيح بياع سريح على باب الله لكن شكله محترم

وبعدين كلنا على باب الله 

والشقة كمان ماكانتش في الزمالك يعني

المستأجر كان ماشي على السطر فعلا

بيدفع الايجار في وقته 

مش بيتأخر خالص

وبيتعامل كويس في وسط الجيران

جددتله مره واتنين وتلاته

بس في نص اخر عقد للمستأجر ده

في شقة فضيت جنب حماه

وحماه عنده محل وعرض عليه يجيي يشتغل معاه بدل ماهو بياع سريح

بس بيت حماه ده كان بعيد اوي عن الشقة اللي هو ماجرها

وفي نفس الوقت الواد بقى ليه زبونه اللي في المنطقة اللي فيها الشقة اللي هو بيسرح فيها

هداه تفكيره ان ابوه وامه يجيوا يسكنوا في الشقة دي

ابوه كمان بياع سريح

منها يستفيد بالزبون اللي الولد رباه

والشقة كويسة

وقريبه من شقة ابوه اللي عقدها خلص وصاحب الشقة عايز يعلي الايجار اوي

فجه قعد معاه شوية

ولما الام عرفت  ان البياع السريح ماشي

قالت ان العقد هايتلغي

اقنعوها ان الاب يكمل العقد بتاع الولد

وفعلا كمله 

وبقى يدفع الايجار في ميعاده برده

كان في شوية كلام متنتور كده عن ان الاب ده مكروه من الجيران عشان معاملته معاهم وحشه

بس الام شافت انه مادام بيدفع الايجار مظبوط يبقي تمام

ولما العقد خلص

جددتله

صحيح قعد يفاصل حبه كتير في الزياده

بس المهم في الاخر اتفقوا

وسمعة الراجل بقت زي الزفت في العمارة

ماحدش طايقة 

الام حست بالذنب فقررت ماتجددلوش تاني

ولما قالتله انها مش هاتجددله تاني

بلطج

مارديش يمشي لما العقد خلص

ومارضيش يدفع الفلوس

ومباقاش يدفع الكهربا والمية اللي هو بيستهلكهم

الام وقعت في مشكلة 

وولادها الرجالة اكيد هما اللي هايحلولها المشكلة دي

اتصرفوا ازاي؟؟؟

الاولاني

هو من الاول ضد تجديد العقد للاب

بس كان شايف ان الزيادة في الايجار معقوله وافق

قرر يتفاوض مع الراجل تاني

عشان العقد الجديد يبقي فيه زياده حتى لو كان ده هايضايق الجيران

حتى لو كانت الزياده عشرة ولا عشرين جنيه

كان هايثور لحد ما الحل اللي هو عايزه ده يتحل

ممكن في الوقت ده عشان يقنع الراجل يهدده 

يتخانق معاه 

يضربه

يتفاوض معاه حتى

اي حاجه ممكن يعملها لحد ما يوصل للحل ده 

التاني

كان شايف ان مجرد ان الاب يكمل العقد بتاع ابنه حاجه غلط 

وماكانش موافق على التجديد للاب حتى لو هايزود الفلوس

لانه اتفرض على الام صاحبة الشقة 

كان المفروض العقد يخلص ويشوف بقي المتسأجر ده وغيره من المستأجرين ويختار ما بينهم مش يتفرض عليه

ده كان عمال يحاول يقنع اخواته انهم يقفوا مع بعض قصاد الراجل 

بس ماكانش عنده استعداد يتخانق

اخواته ممكن يتخانقوا

لكن هو شايف انهم لو مع بعض كلهم فرصتهم في انهم يكسبوا الخناقة دي هاتبقي اكبر

التالت 

هو اللي اقنع الام في الاول ان الراجل يكمل مكان ابنه

في الحقيقة الراجل كان قراه من الاول وغمزه بقرشين عشان يقنع امه

وده مصر ان الام تجدد العقد مادام هو بياخد من الراجل فلوس من تحت الترابيزة

الرابع 

كان ضد ان الراجل يقعد مكان ابنه

وانهم يجددوله

راح القسم ورفع قضية واتنين 

واستأنف ونقض

وفين وفين لما خد حكم وبعدين تنفيذ الاحكام مانفذوهوش

فقرر يروح يضرب الراجل ويخرجه بره الشقة ويبقي هو اللي جواها وساعتها لما يبقي الحال على ماهو عليه يبقي هو اللي جوه

للاسف ده مات

الخامس

برطه

مالوش دعوة

المهم يبقي في مستأجر بيدفع ايجار عشان امه تصرف عليه

لما الجيران اتكلموا وقالوا ان معامله الراجل وحشه 

قال ان الجيران متغاظين من امه عشان ماجرة الشقة وعندها شقة تانية وهما لا

ولما قعد مكان ابنه قال وماله اللي نعرفه احسن من اللي مانعرفوش

ولما بطل يدفع الايجار قال ماتجددوله وماتزودوش الايجار

ولما عرف ان الدنيا غليت قال وماله..امي تشتغل في البيوت عشان نعوض الفرق

ولما بطل يدفع المية والكهربا قال مش مشكلة..امي تشتغل في البيوت اكتر شوية

ولما بطل يدفع الايجار نفسه قال خلاص ما امي بقت بتجيب فلوس من حتة تانية 

صحيح فلوسنا هاتقل عن اللي محتاجينه

صحيح هانخرج من مدارسنا ونروح مدارس ارخص

صحيح هاناكل اقل من ما كنا بناكل

بس خلاص

هانعمل ايه يعني

وفضل كده لحد ما مات من الجوع

في الحقيقة

اخر واحد بس ماكانش حاسس ان المشكلة دي مشكلته

ولا الشقة دي شقته

ولا مطلوب منه حاجه عشان يحل الموضوع ده

اهدي هذه القصة لحزب الكنبة

نصحية اخيرة

لما تبقي كل يوم الصبح بتشرب شاي

وبعدين تجيلك فترة يجيلك فيها صداع نصفي

لازم تعمل حاجه غير اللي بتعملها كل يوم الصبح

ممكن تبطل تشرب شاي

او تشرب شاي وقهوة

او تشرب نسكافيه

اي حاجه غير اللي بتعمله طول عمرك

عشان المشكلة تتحل

ولما تبقي طول عمرك بتشتغل وبتلف عجلة الانتاج

ويجيلك اقتصاد واقع

لازم تعمل حاجه غير انك تشتغل وتلف عجلة الانتاج

ممكن انك تشتغل اكتر

تشتغل اقل

تشتغل وتذاكر

تشتغل شغلانة تانية

تعمل عصيان مدني

اي حاجه غير اللي بتعمله طول عمرك 

بمجرد انك تحس ان البلد دي بلدك وانك مسؤول عن ازمة البوتجاز لمجرد انك ماعملتش حاجه تحل الازمة

ولما تحس بالاحساس ده فتبتدي تدور على حل فيه حاجه مختلفه عن اللي بتعمله طول عمرك

ساعتها هاتبقي انضميت للثورة

شهادة المشير امام المحكمة

المقالة دي منقولة من جبهة التهييس الشعبية
بنشرها عشان ابقي ضامن ان في منها اكتر من نسخة
احتمال تكون صح واحتمال تكون متفبركة
ممكن الجيش يطلع ينفيها ويطلع ميتينا مع ان ده مش من حقه
وممكن يسكت
ممكن يسكت عشان الكلام ده صح او يسكت عشان الكلام الصح ماينفعش يتقال
ماينفعش يتقال لانه انيل من ده او ماينفعش يتقال عشان اسرار دولة
ولهذا انا بأعلن اهو عشان لو الجيش قرر انه يحبسنا
الكلام ده انا - كلؤي - مش متأكد من صحته
لكن كاتبه هنا عشان كلام قريته وحبيت احتفظ بنسخة لنفسي
واللي يقراه وعايز يصدق انه حقيقي هو حر
واللي شايف انه كلام فارغ برده هو حر

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟ 
ج1 : الاجتماع كان برئاسة رئيس الوزراء واعتقد أننه بلغ 

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟ 
ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس 

س3: ما الذي أبداه رئيس الجمهورية في هذه اللقاءءات ؟ 
ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث 

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير ؟ 
ج4 : ليس لدي معلومات عن هذا واعتقد ان هذا لم يحدث 

س5 : هل ترك رئيس الجمهورية السابق للمتهمين المذكورين من أساليب لمواجهة الموقف ؟ 
ج5 : ليس لدي معلومات 

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟ 
ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران 

س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟ 
ج7 : ليس لدي معلومات 

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟ 
ج8: إنا معنديش معلومات بكده.. الاحتمالات كتير لكن مفيش معلومة عندي 

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟ 
ج9 : إنا معرفش ايه اللي حصل 

س10 : هل تستطيع سيادتك تحديد هل كانت هناك عناصر أخري تدخلت ؟ 
ج10 : هيا معلومات غير مؤكدة بس اعتقد ان هناك عناصر تدخلت 

س11 : وما هي تلك العناصر ؟ 
ج11 : ممكن تكون عناصر خارجة عن القانون 

س12 : هل ورد لمعلومات سيادتك ان هناك عناصر اجنبية قد تدخلت ؟ 
ج12 : ليس لدي معلومات مؤكدة ولكن ده احتمال موجود 

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟ 
ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه 

س14 : ولمن يصدر رئيس الجمهورية علي وجه العموم هذه الأوامر ؟ 
ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك 

س15 : وهل يجب قطعا علي من تلقي أمر تنفيذه مهما كانت العواقب ؟ 
ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه 

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا 
ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا 

س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟ 
ج17: يسأل في ذلك مساعديه الذين ابلغوه هل هو علي علم أم لا 

س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟ 
ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات 

س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟ 
ج19 : هذه مسئولية جهات التحقيق 

س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية؟ 
ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه ولكن التظاهر وفضه هي خطة وتدريب موجود في وزارة الداخلية 

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة وذلك من منظور ما وصل لعلم سيادتك ؟ 
ج 21 : معنديش علم بذلك 

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس سيارات لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟ 
ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها 

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟ 
ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش 

س24 : هل هناك اصابات أو وفيات لضباط الجيش ؟ 
ج 24 : نعم هناك شهداء 

س25 : هل تعاون وزير الداخلية مع القوات المسلحة لتأمين المظاهرات ؟ 
ج 25 : لأ 

س26 : هل أبلغت بفقد ذخائر خاصة بالقوات المسلحة؟ 
ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة 

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟ 
ج27: هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات 

س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟ 
ج28: لا ..لم يتم القاء القبض على أى أحد 

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟ 
ج29 : لم يحدث 

س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟ 
ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب  

دي اقوال طنطاوي.. لو سمحتوا كل واحد ياخد كوبي بيست وينشرها على مدونته او صفحة الفيس بوك، لان اللي محمد الجارحي كده ممكن يتحبس وكل ما ننشر اكتر ما يقدروش يحبسونا كلنا او بقى يحبسونا كلنا، لو الف مدون واكاونت فيس بوك نشرها ما يقدروش يحبسونا كلنا، او يحبسونا كلنا ويتفضحوا يالا.. المهم ان شهادة طنطاوي دي حقنا نعرفها، لان اصلا القضية دي كلها تحصيل حاصل.. احنا عارفين مين اللي قتل ولادنا، وعارفين المتهم، ووعارفين الحكم، والشهادات دي مالهاش اي لازمة غير تبين لنا مين معانا ومين علينا... احنا صابرين على المحاكمات دي واحنا عارفين الحق والعدل فين عشان ما ننتهكش القانون بس وهم مش من حقهم يطلعوا قانون يمنعونا نعرف ايه اللي بيحصل في بلدنا سيبنا لهم البلد مش عارفين عنها حاجة 30 سنة بحجة الامن القومي وادي النتيجة... لا.. من هنا ورايح يكلمونا زي ما بنكلمهم ومافيش اسرار البلد بلدنا واحنا احرار فيها

خلسة

نعم ان العنوان صحيح
انه خلسة وليس غلسة
وخلسة تعني في اللغة ...في غفلة من مراقب


امس كنت اقود سيارتي في طريق النصر في تلك المنطقة المتعمد تنظيمها مروريا عن طريق الدوران للخلف بدلا من اشارات المرور الطبيعية لتحويل الطاقة المبذولة من رجال المرور لطاقة محروقة من المواطنين تتمثل في احراق المزيد من الوقود والاكثر من استهلاك السيارة والاكثر بكثر من الوقت الضائع
اعترف بان هذا النوع من الدوران للخلف-اليو تيرن-خاصة ذلك الموجود في المربع الذهبي-عباس العقاد,طريق النصر,مكرم عبيد,مصطفى النحاس- اي من دورانات هذا المربع يستهلك من عمري ما يقرب من ثلث الساعة على الاقل لعبوره مرة واحده

ولكن ليس هذا موضوعنا
امس كنت اقود في احد هذه المضيعات للوقت والمال حيث يكثر الباعة الجائلين بمناديل ومعطرات وماسحين السيارات
وكثر منهم اطفال
احداهن-طفلة في حدود الثالثة عشرة-اتت لتقوم بمسح سياراتي ولكني رفضت شاكرا

وحيث ان الطريق يقف مشلولا فلقد تسليت بمراقبتها

فوجدتها في لحظة ما تتبع سيارة متواضعة الى حد ما-128- من الخلف
تمسك بطرف السيارة الاخير
السيارة تسير ببطئ
تقوم الفتاه بمحاولة تسلق السيارة
ثم جلست على حقيبة السيارة

فقط

لم تفعل شيئا اخر
لم تكن تقوم باي سلوك ضد قائد السيارة
لم تكن تنظر لاصحاب السيارات الاخرى
فقط جلست وظلت عينيها تراقب شيئا ما في الخلف
لم يسمح لي الموقف ان ارى ما تنظر اليه
ولكن ليس استنتاجل ببعيد

انها تنظر لمن يقوم بتشغيلها

الله اعلم بمن هو
من الممكن ان يكون اب سكير او جده طاعنة في السن او اخ اكبر كسول
انها ببساطة تختلس الجلوس
لقد جلست خلسة وفي غفلة منه
ببساطة جلست لتستريح
جلست لتستريح خلسة فلم تجد الا الجلوس على حقيبة سيارة تسير في الطريق
بالتأكيد في لحظة ما قبل الجلوس حاولت المقاومة والاستمرار في العمل
بالتأكيد تسائلت عن مدى غلظة قائد السيارة التي ستجلس عليها وكيف ستكون ردة فعله
وبالتأكيد ايضا قررت انها -ردة فعله- اي ما كانت

ستكون اهون من ردة فعل من يدفعها للعمل والوقوف طوال هذا الوقت لو شاهدها جالسة على الرصيف
نعم
كان من الممكن ان تجلس لتستريح على الممشى او الرصيف
ولكنها في هذا الوضع ستصبح امام اعين هذا الشخص الذي يدفعها للعمل
وحينها لا يعلم الا الله كيف كان سيقدر عقابها


للحظة حاولت ان اتسامح مع هذا الوغد
عله اب مريض
علها ام مسكينة لها اطفال كثر
ولكن
لم اجد مبرر ما يجعل هذا الوغد يدفع طفله للعمل بحيث يمنعها من الجلوس للاستراحة بالقدر الذي يدفعها في المقابل للجلوس على سيارة متحركة


ان خطورة هذا ليس في تقبل الطفلة في هذا السن لهذه المخاطرة

انها في تقبل الطفلة في هذا السن لقبول المخاطرة اصلا

هل تتخيل حين يضيق الحال بهذه الطفلة؟؟؟
هل لديك من الخيال الواسع او حتى الضيق ما يسمح لك بتصور مستقبلها؟؟؟؟

هل تعلم ان هؤلاء الاطفال هم بلطجية ولصوص الغد؟؟؟
بالطبع من الممكن ان يتحلى الطفل بالارادة فيستقل عن دافعه للعمل  ويعمل لحسابه الخاص ويكمل تعليمه ويصبح طبيبا او عالما
لكن هل تعلم ما احتمال هذا؟؟؟؟

ونهاية
هل لديك اي اقتراحات قد تساهم في مساعدة هؤلاء الاطفال؟؟؟

اتركك الان مع بعض الصور لاطفال الشوارع
عللك تدرك خطورة الموقف

عن احداث الاول من رمضان

ناس كتير مش عارفه مين اللي كان في التحرير فعلا....اقولهم..كان في شوية مستقلين مارضيوش يمشوا ويسيبوا اهل الشهدا في رمضان في الشارع لوحدهم ...وطبعا كان في اهل شهدا مايعرفوش يروحوا ...مش عشان الظابط اللي قتل ابنهم لسه قاعد جوا القسم اللي جنب بيتهم...لكن عشان الظابط اللي قتل ابنهم ده لسه بيضغط عليهم وبيعذبهم وبيهددهم...الى كل مواطن كان بره الميدان وكان شايف ان الميدان مش بتاع شوية عيال والمفروض الحكومة تطلع ميتينهم عشان عجلة الاستقرار ....عايزك تفتكر ابتسامة النصر اللي اترسمت على شفتك النهارده واللي شفتها بنفسي من الناس اللي دخلت الميدان سواء على رجليها او بتزمر بالعربيات احتفالا بضرب اهالي الشهدا...عايزك تفتكر ابتسامتك دي كويس عشان تحاول تبتسمها تاني وانت بتشوف فيديو تعذيب لابنك بعد سنة ولا تنين ومش بعيد يكونوا بيحطوا عصاية في مؤخرته زي عماد الكبير كده وده ببساطة هايحصل لان النظام مابيفرقش بين غني وفقير ولا ماشي في وسط الشارع ولا جنب الحيط ولا حتى جوا الحيط ولا حتى الحيط نفسه لانهم دخلوا في نهار رمضان جامع عمر مكرم بالجزم وسبوا ولعنوا للناس-بلاش اقول ثوار لاتزعل- اللي جوه

عزيزي المواطن الطبيعي الغير مسيس

كنتم مع برومو لثورة لمدة ست شهور

رأيت فيه كيف يتكتل الشعب ليقيل ديكتاتور مثل مبارك وكيف يتفرق الشعب ليصنع ديكتاتورا جديدا

رأيي الشخصي

على المدى القريب

قفل الميدان في رمضان كان غلط

خروج القوى السياسة كان غلط

ضرب الجيش والشرطة للمواطنين كان غلط

الحل

نحاول نرجع ايد واحده

نحاول نفهم الناس اللي في الشارع

اللي في البيوت

طلب شخصي من الكام واحد اللي بيدخلوا على المدونة دي

لو اقتنعت بوجهه نظري حاول تنقلها للي حواليك

اي حد تقدر تتكلم معاه حاول تنقله وجهه النظر دي

ولو ماقتنعتش

حاول برده تنقل وجهه النظر اللي انت مقتنع بيها للي حواليك

اتكلم معاهم

اتناقش

اعرف رأيهم

حاول تتعلم منهم وتعلمهم

البلد دي بلدنا ومش هانعرف نغيرها




ناس كتير قالولي اهالي الشهدا قاعدين ليه

ماهو زودلهم التعويض

برد عليهم واقول








لا تصالحْ!



..ولو منحوك الذهب



أترى حين أفقأ عينيك



ثم أثبت جوهرتين مكانهما..



هل ترى..؟



هي أشياء لا تشترى..:

















بلاش اقولكم رأيي الشخصي

هانقلهم بعض الاراء التانية




بلاش حتى المصرية

مصور فرنسي نزل مصر بعد اسبانيا واليونان عشان بيعمل فيهم تسجيلي عن الثورات في العالم

لما سألته ايه الرسالة اللي عايز توصلها من الفيلم

قالي ...اعملوا ثورة

استغربت

قلتله عايز توصلها لمين؟؟؟

قالي للفرانسويين

ياراجل؟؟؟

ازاي ده

انتوا مش بلد لامؤاخذة حرة؟؟

قالي دي كدبه

كدبه كبيره

قلتله ليه مش لاقيين تاكلوا وتشربوا وبتعملوا اللي انتوا عايزينه

ده حتى انت اهو بتعمل فيلم بتقول فيه اعملوا ثورة

عايز حرية اكتر من كده؟؟؟

قالي الحرية مش كده

الحرية ان صوتك يبقي فعلا معدود

مش يبقي في صندوق الفرانساويين يقولوا فيه لا لحاجات في الاتحاد الاوروبي وساركوزيه يعمل برده اللي هو عايزه




قالي ان اللي سجل معاهم في مصر حسسوه انهم كانوا بس عايزين فلوس زياده

افتكروا الثورة خلصت لما مبارك مشي

قالي انتوا عملتوا ثورة مش حركة اصلاحية

ليه راضيين بالقليل




قلتله ان اول خطوة في طريق الحرية انك تبقي حر تاكل وقت مانت عايز

يبقي معاك اكلك وشربك

لان لو مش معاك

ساعتها هاتبيع صوتك -ده لو بيتعد- بازازة زيت وكيلو رز







للأسف حاولت اسأله عن رأيه في مشهد جمعة الاسلاميين لقيته وصل مصر بعدها

وللأسف برده سافر قبل منظر النهارده







بشكل ما سمحتلي الظروف اقعد في اجتماع للمستقليين اول امبارح عشان يقرروا هايعملوا ايه في الاعتصام




بعد القوى السياسية ما قالت لاهالي الشهدا احنا ماشيين




وطبعا لما طلعوا البيان بتاعهم قالوا ان المعتصمين كلهم ماشيين

يعني ببساطة اللي قاعدين بلطجية




انا كنت احد اكثر المحبطين اللي موجودين

قلتلهم لو القوى السياسة مشيت

يبقي الاعتصام هايتفض

انا ضد تعليق الاعتصام بالرغم من اني مش معتصم اوي يعني

بس عارف ان القوى السياسة لو مشيت

الباقي هايمشي

ياما عشان هايضرب

او خايف يضرب

او هايحس بالخيانة ويحبط

اي كان السبب الاعتصام هايتفض

بس الناس كان ليها رأي مختلف

لما سألوا مين ممكن يقعد في رمضان في ساعات النهار وقت كافي لتأمين الميدان

اغلبهم رفع ايده

واغلب اللي رفع ايده بنات

وانا مارفعتش ايدي

لما عرفوا ان اهالي الشهدا قاعدين غيروا موضوع الاجتماع

بدل ما كان هانقعد ولا لأ

بقي هانقعد ازاي؟؟؟؟

لما عرفوا ان مبارك مش هايحضر المحاكمه

وده معناه ان القضية هاتتأجل

وده معناه ان كل اللي في القضية محاكمتهم هاتتأجل لانها قضية واحده

وده معناه ان الاعتصام مش هايتفض يوم الاربع

يعني مش هايقدروا يحققوا مكاسب يمشوا عشانها يوم الاربع

يعني ممكن يقعدوا الى ماشاء الله

موضوع الاجتماع ماتغيرش

فضل زي ما هو

هانقعد ازاي؟؟؟







لما رحت الميدان النهارده

للأسف بعد الضرب

ولقيت الشرطة في الميدان

ماشيين بمنتهى التناكة

والسلاح في وسطهم

واللواءات قاعدين مكان المسرح

لابسيين بدل

واهالي الشهداء حواليهم في منظر ذليل جدا




لما عرفت ان الشرطة العسكرية

الجيش لامؤاخذة

دخل المسجد بالجزم

وسب ولعن للناس

لما لقيت مدرعة عليها علم مصر

قلبي وجعني




لما عرفت الناس اللي اتقبض عليهم

ولما لقيت المخبرين ماليين كل حتة في وسط البلد

لما شفت في المترو عساكل بعصاين ودروع

ولما شفت اكوام من حاجات المعتصمين

لما مشيت في الميدان ولمحت ناس اعرفها

وكلنا عاملين نفسنا مانعرفش بعض زي مانكون في اسرائيل في مهمة حربية

انقهرت




لما لقيت نفسي مش عارف ابكي من المنظر

عشان ده هايترتب عليه انه يتقبض عليا

وانا اصلا مش ببكي

بس لما لقيت نفسي ممنوع من البكا

انقهرت

لما عرفت ان مكي اللي كان اول ما بيصحى من النوم بيمسك كيس كبير ويقعد ينضف المكان

مكي اللي شلته على ايدي يوم موقعة العباسية لانه كان واخد خرطوش في رجليه الاتنين ومش قادر يتحرك خطوتين بالعدد

ومع ذلك كان بيضحك وعنده امل

لما افتكرت الناس يوم موقعة العباسية وهم في الخيم في ليلة جديرة بانها تكون ليلة حرب من بتوع صلاح الدين وهما بيجروا خايفين

انهارت

لما بصيت على شكل اللي بيتقبض عليهم ولقيت اني شبهم عرفت اني بلطجي في وجهه نظر النظام

لما لقيت الناس العادية بتشتم في المعتصمين وبتشكر الحكومة سواء في حوارات جانبية او في كلاكسات العربيات




لما شفت خسة الشرطة والجيش وهما مابيهجموش غير لما عددهم بقى اضعاف المعتصمين وغير في نهار رمضان وقبل الفطار بكام ساعة




لما فكرت ان ممكن اشوف في الميدان ظابط سواء جيش او شرطة-ماهم بقي زي بعض- ماسك سلاح ان شاللله حتى عصايا وابص في وشه والاقيني اعرفه




كان صاحبي في المدرسة او جاري او قريبي

خرجت من الميدان عشان ماستحملتش




ملحوظة

الاجانب اللي اعرفهم

بيتكلموا معايا عن الثورة




بالانجليزي طبعا

بس بيعرفوا يقولوا كام كلمة عربي




منهم اللي بيعرف كلمة بلطجية

ومنهم اللي عارف المجلس العسكري

ومنهم اللي عارف امن الدولة




بس لسخرية القدر

كلهم بيعرفوا يقولوا ايد واحده




نصيحة شخصية




اقروا لا تصالح كاملة




http://ta-kha-ref.blogspot.com/2011/08/blog-post_265.html

من دونك - من أشعار دكتور أحمد خالد توفيق

من دونك

لا أشعر حزناً

هل يملك قبر أن يشعــر ؟

-------------------------------------------

من دونك لن أزعم أبداً

أني أتنفس من دونك

حقاً ما زالت أبياتي

تتسكع في أرض الذكرى

ما زال الشعر يدغدغني

وتعربد في قلبي نشــوة

لكني

ـ عفواً يا قلبي ـ

أدري في ركن من قلبي

أني ما يبقى من عمري

أحياه وحيداً

من دونك

من دونك

أهذي

أتثاءب

أكتب أبياتاً

أتعثر

ولبضع ثوان أتمادى

ولبضع سنين أتقهقر

من دونك

لا أشعر حزناً

هل يملك قبر أن يشعــر ؟

شيء كالأنفاس الحمقى

تتلاحق في صدر مقفر

أحياناً أهمس: لا جدوى

لكني أجهل معناها

من دونك ما معنى (جدوى) ؟

أحياناً أضحك

أتناسى

أهمس ألفاظاً وسنانة

وأخط عبارات الشكوى

من فوق جدار الزنزانـــــة

من دونك

نبض مغمور

لا يجسر أن يدعى نبضاً

يغفو في صدري أحياناً

يغزو شرياني أحياناً

يوقظني في جوف الظلمة

يخبرني

أني من دونك

من دونك

حقاً لن أزعم

أني لن أحيا من دونك

لكني أتألم حقاً

أتلاشى في الظلمة حقاً

ولأني أحببتك حقاً

أطبق أجفاني منهوكاً

وأهيب بقلبي أن يفهم

ما معنى

أن أحيا دونك

صلاح جاهين

يقول صلاح جاهين

أنا كنت شئ و صبحت شئ ثم شــئ

شوف ربنا .. قادرعلي كل شـــــــئ

هز الشجر شواشيه ووشوشني قال :

لابد ما يموت شئ عشان يحيا شئ

وعجبي

الثأر

ولو انه مش وقته خالص بس مش قادر ما سجلش اللحظة التاريخية دي

من حوالي تمن او تسع سنين كده

حد اتهمني
تهمه مخله
تهمة زور
وقال عليا زور قدامي
وفي بيتي
ساعتها الصدمة ماخلتنيش اعرف حتى ازعل او استغرب
كنت بحاول استوعب ان ممكن حد يقول زور بالطريقة دي
وبالطلاقة دي
وبالجبروت والبجاحة دي
ماكنتش متخيل ان ممكن حد يشهر بسمعته -زور او غير زور- بهدف انه يأذي حد تاني مش ياخد حقه
عمري ما قدرت استوعب

النهارده
نفس الشخص ده
جه طلب مني اشهد في المحكمة معاه
بغض النظر هو عايزني اشهد بأيه
وبغض النظر انا فاضي في اليوم ده ولا لأ
وبغض النظر عن رأيي فيه او في خصمه
وبغض النظر شهادتي دي هاتأثر ولا ماتأثرش

انا قلتله وفكرته
قلت
انا اتشهد عليا زور في بيتي وقدام عيني
لحظة قلبي فيها دق وحسيت باحساس غريب
ربنا مابيسبش حق حد

يا عم هاتعيط

الشقة اللي جنبي
فيها طفلين
من معلوماتي السابقة هما مش اخوات
طفل ساكن في الشقة وطفل تاني اعتقد انه ضيف
المهم
واقفين في البلكونة ويتخانقوا على حاجه معينة
الطفل الضيف مصر على كلمة ياعم هاتعيط
والطفل الساكن بيقول كلام كتير اهمه كلمة ايه هاتعيط دي

وبعد شوية جدال
واضح ان الطفل الضيف عمل حاجه
اعتقد انها نوع من التخريب لمقتنيات الطفل الساكن
فالطفل الساكن فقد اعصابه
وعيط

الانسان كائن طفيلي

نستطيع ببساطة ان نعرف الانسان بانه كائن حي

وبالصدفة البحته يعتبر الطفيل كائن حي
ومن هذه الجمل البسيطة نستنتج انه يوجد علاقة قرابة بشكل او باخر بين الانسان والطفيل

يعرف الطفيل بانه

الطفيلي parasite عبارة عن متعضية تمضي وقتا طويلا من حياتها ضمن أو على نسيج حي لمتعضية أخرى مضيفة مما يسبب أذى للمتعضية المضيفة بدون أن يؤدي ذلك إلى قتل المضيف . تظهر الطفيليات أيضا قدرا كبيرا من قابلية التكيف يسمح لهم باستنزاف مقدرات المضيف .

ويقال ايضا

الطُّفَيْليات كائنات حية تعيش وتتغذّى بكائنات أخرى حية، يُطلق عليها العائل أو المُضيِف. وتشير بعض المصادر العلمية إلى أن كل الحيوانات كائنات طفيلية، لأنها يجب أن تعتمد في غذائها على كائنات حية أُخرى. ولكن المعنى الأدق هو أن الطفيليات تعيش عادة على النباتات والحيوانات التي تكون أكبر منها. وهذه الكائنات لا تعيش إلاَّ على كميات ضئيلة جدًا من أنسجة العائل أو غذائه.

وهي تستخدم الطعام لإنتاج الطاقة ، وتصرف فضلاتها مباشرة في جسم الإنسان أو الحيوان. وللطفيليات آثار متباينة على المصابين. ويعتقد الخبراء بأن معظم الطفيليات تسبب قليلاً من الضرر للعائل، بل قد لا تصيبه بأدنى ضرر على الإطلاق. ويضربون مثلاً على ذلك بنوع الأميبا الذي يعيش في أمعاء الإنسان ويتغذى بالطعام المهضوم. والأنواع الأخرى من الطُّفيليات المعوية التي تعيش فيها دون أن تسبب أي ضرر ظاهر. وتسبب بعض أنواع أُخرى من الطُّفيليات ضررًا أكبر مثل الأوَّليات (الحيوانات وحيدة الخلية) التي تسبب حمى الملاريا، وهي طفيليات تسري في خلايا الدم الحمراء في جسم الأنسان.

لا اعلم سبب الحاح عقلي بتذكر بعض الاخبار عن الخضراوات المسرطنة والزراعة بماء الصرف الصحي والضرائب العقارية ....الخ


دعونا نكمل اقتباسنا عن الطفيليات

الطفيليات التي تتطفل على الإنسان أو الحيوان. تسبب هذه الطفيليات كثيرًا من الأمراض. فأحد أنواع الأميبا يؤدي إلى إصابة المريض بمرض مؤلم هو مرض الدوسنتاريا الأميبية (الزحار الأميبي). وتغزو بعض الطفيليات الأُخرى وحيدة الخلية، دم الحيوان و تسبب أمراضًا مثل الملاريا. والحشرات الماصة للدماء والقراد تلتقط الطفيليات من الحيوانات المريضة لنقلها إلى حيوانات وأجسام أخرى.

تخيلو معي
الطفيليات في التعريف
تصيب بهذه الامراض البسيطة
لا يوجد سرطان في القائمة
لا يوجد ضعف القلب
وان اردت رأيي لا يوجد اي من الاغتصاب او حتى التحرش ولا يوجد السرقة وفرض الضرائب ولا يوجد اي نوع من القمع الفكري
او غسيل المخ

بل ان الطفيل لا يجرؤ على استغلال ضحيته حتى يموت جوعا
لا يدعه واقفا في محطة المترو اكثر من نصف ساعة ينتظر القطار
ثم يأتي القطار مزدحم للدرجة التي تجعل المنتظر يقوم بضرب الراكب ليجعله يتخلى عن موقعه في القطار ويحتله هو
لاحظو اني اتحدث عن مترو الانفاق وليس قطار السكك الحديدية
فهو قطار سكك حديدية فعلا


لا يقوم الطفيل بغسيل مخ المضيف
بعبارات مثل

عزيزي الراكب العبث بأجهزة المترو يسبب تلفيات بملايين الجنيهات ويعرضك لغرامة مائة جنيه

او
عزيزي المواطن اتفوتر بدل ما تتقنطر

هل تعتقدوا انهم يقصدون سجن القناطر؟؟؟!!!!

او عبارات على غرار
التطفل في مصلحتك اولا

او
نتطفل عليك من اجلك انت

لا يفعل الطفيل ذلك
ولو فعل
اعتقد ان هذه العبارات سيتخللها عبارت اقناعية
على غرار
حين تنتظر امام باب الصعود ستجد مقعدا خاليا فقد دفعت ثمنه بالفعل

او
حين تتفوتر احنا هانقنطر اللي بيسرقوك

او القانون يخدمك والشرطة تعمل من اجلك

او
ضريبتك العقارية تم صرفها في هذه المنافذ المبينة في الميزانية العامة للدولة

او
هذا هو دفتر الشرطة فقد تم ارجاع نسبة 90% من المسروقات في هذا العام
الخ

ولكن
دعونا نترك الكيانات الكبيرة ونعود للكائنات الصغيرة

الم تقابل في حياتك كائن طفيلي يتطفل عليك شخصيا وبشكل مباشر
لن اتحدث هنا عن الشحاذين او سياس السيارات
فهم اشخاص يقومون بعمل ما بشكل او باخر
على اقل تقدير
هنا من يقول لك اعطني جنيها حتى استطيع ان اعود لمنزلي
هو يكذب
هذا وارد
ولكنه يقول
يطلب
يكذب
كلها افعال لو كنت لاحظت
وكلها ليست
هو يأخذ
انك انت الذي تعطيه
قد اقنعك او الح عليك فاعطيته
حتى ان كان هددك مثل سايس السيارات
او احد رجال الامن المروري-ليس كلهم فقد عرفت منهم شخص محترم
هو يملك شيئا ما يضغط به عليك حتى تعطي له من مالك الخاص
حتى ان كان هذا الشيء غير قانوني
او غير دستوري
او غير ديني
او غير انساني او ادمي
لكنه يمارس مهنه ما
الا وهي الضغط
لكن
انا اتحدث هنا عن من يأخذ بدون اي عمل
مع العلم اني اعتبرت الضغط عملا
والشحاذة عملا
وسياسة السيارات عملا
فهناك من يستغلك ويتطفل عليك بدون عمل
بداية من الشخص الذي يجلس مكانك في الحافلة لمجرد انه عنده القدره على اظهارك بمظهر الشاب الرقيع الذي يترك رجل مسن-في الاربعين من العمر وبكامل صحته وهندامه-يتركه واقفا ويجلس هو
هناك بالفعل بعض الشباب الرقيع
وهناك بالفعل رجالا ونساء مسنين
ولكن انا اتحدث عن هذه الفئة الخاصة
مرورا بسائق الميكروباص الذي يجبرك -بكسر الكاف- على تحمل الزحام حيث صمم المهندس هذا الميكروباص ليحمل ست وعشرين شخص فقط لا غير ويصر السائق على اثبات فشل هذا المهندس في عمليات الجمع حيث حسب الجالسين فقط ولم يقوم بعد المأئة وثلاثة-بدون مبالغة - الواقفين سواء في الحافلة نفسها او على جوانبها

نمر ايضا على الشخص الذي يقرأ في جريدتك بل ويمد يده احيانا ليمنعك من قلب الصفحة التي بيدك حتى ينتهي هو من قراءة ما يقرأه

نهاية برئيسك في العمل الذي يصر على وضعك ثلاثة شهور - على الاقل- تحت الاخبار
قبل ان يحدد -هو فقط- حينها كم سيصبح راتبك -المبدئي- الى ان يطمئن قلبه الى اقالتك من العمل فهناك شخص اخر مستعد للاختبار


للمرة الاولى اعتقد
اطلب من قارئي الكريم-انا الذي لا يعنيني رائيه ولا اهتم بالرد على التعليقات وان كنت اهتم بقراءتها-
للمرة الاولى على ما اعتقد اطلب من قارئي ان يشاركني تجاربة الطفيلية
من تطفل عليك
وكيف
وانت
تطفلت على من
وكيف

كن صريحا -لبعض دقائق- فلا احد يعرفك هنا ولن تجبر على ترك بياناتك الحقيقية او حتى المزيفة

ام زلومة --اعلان

قريبا.....

ايه الاساتوك ده

يستيقظ احمد كالعاده في السادسة واالنصف
يتناول اصطباحته اليومية من المكيفات المتمثلة في كوباية الشاي بحليب
يرتدي ثيابه ويذهب لعمله
فهو موظف في السجل المدني
بعد حوالي نصف الساعة من العمل
وجد حسين زميله يزغده برفق
ايه في ايه ياحسين
شوفت الخبر ده
(بصوت خفيض)
بيقولك قسيس في كنيسة تنبأ بظهور العذرا النهارده
طب واحنا مالنا يا اخي
هما بيستهبلولنا فيها ولا ايه
طيب ما بالمره بقي يشوفولنا بكره الجو هايبقي حر ولا برد
يابن الناس احنا مالنا ليهم دينهم ولينا دينا
شوية شوية يقولولك العذرا بتقولنا لازم حد منا يترشح للرياسه
طيب يابني ماهم ممكن يترشحوا للرياسة من غير ماتقولهم
لا طبعا الدستور بينص على ان مصر دولة مسلمة وبالتالي ماينفعش يترأسها مسيحي
بص انا مافهمش في الحكاية دي اوي بس عموما
لو الدستور بيسمح يبقي هما مش محناجين العذرا تقولهم حاجه ممكن يترشحوا كلهم ولو مابيسمحش يبقي مش هاتفرق معاك حاجه تقولهم ولا ماتقولوهمش

لا يا عم ماهم بكره يقولولك حقوق الاقليات وبتاع ويقوموا مغيرين الدستور

يابني اولا دول زي مانت قلت اقليات
يعني لو حد رشح نفسه منهم مش هايكسب
ثانيا يعني هي جت على اللعبه دي في الدستور
ولا انت ماشي اوي يعني بالحكم الاسلامي
دا الكفار ياخي ماكانش عندهم طابور عيش

يعني انت فاكر كان حد في دول يستجري يتكلم ايام الرئيس المؤمن الشهيد انور السادات؟؟؟

يابني دينهم وهما احرار عندهم قناعاتهم وماطالبوكش انك تقتنع

بقولك مستحيل حاجة تحصل زي دي بالتنبأ ولازم الكنيسة تشوف صحة الكلام دة
وبعدين اشمعنى بتظهر فى مصر بس هى باقى الدول غضبانه عليها ولا ايه مابتظرهش فى الفاتيكان لية ربنا يهديهم

ومين قالك انها انهم مش بيقولوا انها بتظهر في اماكن تانية كتير
في الهيصة اللي فاتت دي انا سمعت ان في قرية في مش عارف فين بيقولوا ان الظهور هناك شبه اسبوعي

ايه ده ايه ده ايه ده ؟؟؟ انت مصدق ولا ايه؟؟؟


ياسيدي مش مصدق انها بتظهر لكن ده لا يتعارض مع اني مصدق انهم مصدقين انها بتظهر


طيب مين اللي قال اصلا ان السيدة مريم هي اللي في الصورة دي اساسا

نظام بقي البيضة ولا الفرخة
يعني تفتكر انهم مصدقين انها بتظهر ومش مصدقين ان هي دي اللي في الصورة؟؟
اكيد عندهم قناعتهم

بس بس
والله عال
تلاقي القسيس ده معاه مكنة الليزر عشان يطلع هو العذرا وشكله ما يبقاش وحش
ال ايه تنبأ بالظهور
ايه الاساتوك ده يا عم


ينتهي اليوم

بعد مرور عدة اشهر
يحصل احمد على منحة ليكمل دراساته العليا في الولايات المتحده الامريكية
يطير فرحا
في اول صلاة للجمعة له في بلاد العم سام
يتحدث الخطيب عن رحلة الاسراء والمعراج

بعد الصلاة
يخرج احمد فيستوقفه احد الماره
ويساله عن محتوى الخطبة فقد سمع منها شيئ بسيط اثناء عبوره امام المسجد
ففي امريكا لا توجد مكبرات صوت خارج المساجد
يخبر احمد انه استرعى انتباهه بعض الحديث من الخطبه ويود ان يفهم الموضوع الذي تحدثت عنه الخطبه
يجدها احمد فرصه طيبة في بلاد الحرية ان يحدث شخصا اخر عن الاسلام بدون امن دولة ولا فتنه طائفية

يظل حوالي النصف ساعة يحدث الامريكي عن قصة الاسراء والمعراج
والامريكي يستمع باهتمام
وفي النهايه قاله له
بقى سافر من السعودية لفلسطين وطلع السبع سموات ورجع لقى سريره دافي كمان؟؟
بتقولوا عليها ايه عندكم في مصر؟؟؟
اه
ايه الاساتوك ده؟؟



للمراجعة
برجاء مراجعة الرابط هنا