بعد ما رخصي اتسحبت
وفي ظل الاسبوع اللي وصل الرخص بيسمحلي بالقيادة خلاله
كنت براقب كل العساكر والامنا واللجان اللي بقابلها
ولما كنت رايح ارش العربية عند بتاع الدوكو اللي ورا قسم شبرا-وده مش اعلان عشان هو صنيعي عادي يعني لاهو احسن واحد ولا اوحش واحد عشان ماحدش يروحله ويقولي انت اللي قلت
فمطلوب مني اني اعدي شارع شبرا بالعربية غصب عني
وبما اني ماشي من غير رخص فلفت نظري العساكر الكتير اوي اللي واقفين عند الحته اللي انا هاعدي منها
وبعد خطة استراتجية تمت بناء على تحليل لحركة العساكر وتوجهاتهم وامتى بيروحوا يتغدو وامتى بيقضو حاجتهم وبعد افتعال بعض المشاكل لشغل العساكر تم العبور بحمد الله
بس ظل سؤال يراودني
ايه كمية العساكر الكتير اوي دي اللي من غير ولا ظابط واحد ولا حتى امين شرطة
وبعدين من امتى العساكر بتاخد نمر
وبعد دراسة اخرى تمت خلال مسايسة بتاع الدوكو عشان يرضى عن عربيتي ويعملها بقي
اكتشفت ايه؟؟؟
ان كمية العساكر دي اساسا مش من ادارة المرور
كل عسكري لابس كتافه على دراعه المفروض بيتكتب عليها الادارة اللي هو تابع ليها
كلهم تانين الكتافات دي عشان ماحدش يعرف يقرا اللي مكتوب بسهولة
وبعد تدقيق في الكتافات طلعوا كلهم عساكر تبع حراسة المنشاءت
لان الحتى دي فيها بنكين جنب بعض
بالاضافة لبقية البنوك المجاورة
فالبشاوات عاملين نفسهم مرور وبياخدو مخالفات
ومنهم اللي ماسك ورق عامله دفتر وقلم وعامل نفسه بينقل نمر
طيب هايوديها فين؟؟؟
مش هايوديها في حته
ده بس بيهوش اصحاب العربيات عشان يدفعوله رشاوي
وبقولها بالفم المليان يدفعوله رشاوي
يعني عسكري المرور ولا امين الشرطة بتاع المرور اللي بياخد رشوة بياكل حرام عن طريق استغلاله لشغلته اللي هي اصلا حلال
لكن العساكر اللي بحكي عنهم دول
بينصبوا عشان ياخدوا رشاوي
يعني بياكلوا حرام مركب
والله اعلم طبعا
بعد حكاية الحكاية دي على بعض المعارف طلع كل واحد عنده حكاية مشابهة
واضح اني اقل الناس ملاحظة او اني جيت متأخر
من ضمن الحكايات مثلا
ان في دفعه على المعاش بيلبس الميري ويجي يعمل الفيلم ده قدام ادارة عمل معينه ايام قبض المكافائات والمرتبات
ياريت اللي يعرف فيكم حكاية مشابهه يحكيهالنا
ليست هناك تعليقات:
إرسال تعليق