خمسة اخوات
ابوهم مات...وورثوا هما وامهم شقة غير اللي هما ساكنين فيها
كانوا صغيرين..وامهم اجرت الشقة عشان تصرف عليهم
طبعا اشترطت انه يبقي ايجار جديد يتجدد كل سنة او سنتين بالكتير عشان تزود الايجار بما يتناسب مع سعر السوق في كل وقت
جالها مستأجر كويس..عريس جديد عايز يتجوز
هو صحيح بياع سريح على باب الله لكن شكله محترم
وبعدين كلنا على باب الله
والشقة كمان ماكانتش في الزمالك يعني
المستأجر كان ماشي على السطر فعلا
بيدفع الايجار في وقته
مش بيتأخر خالص
وبيتعامل كويس في وسط الجيران
جددتله مره واتنين وتلاته
بس في نص اخر عقد للمستأجر ده
في شقة فضيت جنب حماه
وحماه عنده محل وعرض عليه يجيي يشتغل معاه بدل ماهو بياع سريح
بس بيت حماه ده كان بعيد اوي عن الشقة اللي هو ماجرها
وفي نفس الوقت الواد بقى ليه زبونه اللي في المنطقة اللي فيها الشقة اللي هو بيسرح فيها
هداه تفكيره ان ابوه وامه يجيوا يسكنوا في الشقة دي
ابوه كمان بياع سريح
منها يستفيد بالزبون اللي الولد رباه
والشقة كويسة
وقريبه من شقة ابوه اللي عقدها خلص وصاحب الشقة عايز يعلي الايجار اوي
فجه قعد معاه شوية
ولما الام عرفت ان البياع السريح ماشي
قالت ان العقد هايتلغي
اقنعوها ان الاب يكمل العقد بتاع الولد
وفعلا كمله
وبقى يدفع الايجار في ميعاده برده
كان في شوية كلام متنتور كده عن ان الاب ده مكروه من الجيران عشان معاملته معاهم وحشه
بس الام شافت انه مادام بيدفع الايجار مظبوط يبقي تمام
ولما العقد خلص
جددتله
صحيح قعد يفاصل حبه كتير في الزياده
بس المهم في الاخر اتفقوا
وسمعة الراجل بقت زي الزفت في العمارة
ماحدش طايقة
الام حست بالذنب فقررت ماتجددلوش تاني
ولما قالتله انها مش هاتجددله تاني
بلطج
مارديش يمشي لما العقد خلص
ومارضيش يدفع الفلوس
ومباقاش يدفع الكهربا والمية اللي هو بيستهلكهم
الام وقعت في مشكلة
وولادها الرجالة اكيد هما اللي هايحلولها المشكلة دي
اتصرفوا ازاي؟؟؟
الاولاني
هو من الاول ضد تجديد العقد للاب
بس كان شايف ان الزيادة في الايجار معقوله وافق
قرر يتفاوض مع الراجل تاني
عشان العقد الجديد يبقي فيه زياده حتى لو كان ده هايضايق الجيران
حتى لو كانت الزياده عشرة ولا عشرين جنيه
كان هايثور لحد ما الحل اللي هو عايزه ده يتحل
ممكن في الوقت ده عشان يقنع الراجل يهدده
يتخانق معاه
يضربه
يتفاوض معاه حتى
اي حاجه ممكن يعملها لحد ما يوصل للحل ده
التاني
كان شايف ان مجرد ان الاب يكمل العقد بتاع ابنه حاجه غلط
وماكانش موافق على التجديد للاب حتى لو هايزود الفلوس
لانه اتفرض على الام صاحبة الشقة
كان المفروض العقد يخلص ويشوف بقي المتسأجر ده وغيره من المستأجرين ويختار ما بينهم مش يتفرض عليه
ده كان عمال يحاول يقنع اخواته انهم يقفوا مع بعض قصاد الراجل
بس ماكانش عنده استعداد يتخانق
اخواته ممكن يتخانقوا
لكن هو شايف انهم لو مع بعض كلهم فرصتهم في انهم يكسبوا الخناقة دي هاتبقي اكبر
التالت
هو اللي اقنع الام في الاول ان الراجل يكمل مكان ابنه
في الحقيقة الراجل كان قراه من الاول وغمزه بقرشين عشان يقنع امه
وده مصر ان الام تجدد العقد مادام هو بياخد من الراجل فلوس من تحت الترابيزة
الرابع
كان ضد ان الراجل يقعد مكان ابنه
وانهم يجددوله
راح القسم ورفع قضية واتنين
واستأنف ونقض
وفين وفين لما خد حكم وبعدين تنفيذ الاحكام مانفذوهوش
فقرر يروح يضرب الراجل ويخرجه بره الشقة ويبقي هو اللي جواها وساعتها لما يبقي الحال على ماهو عليه يبقي هو اللي جوه
للاسف ده مات
الخامس
برطه
مالوش دعوة
المهم يبقي في مستأجر بيدفع ايجار عشان امه تصرف عليه
لما الجيران اتكلموا وقالوا ان معامله الراجل وحشه
قال ان الجيران متغاظين من امه عشان ماجرة الشقة وعندها شقة تانية وهما لا
ولما قعد مكان ابنه قال وماله اللي نعرفه احسن من اللي مانعرفوش
ولما بطل يدفع الايجار قال ماتجددوله وماتزودوش الايجار
ولما عرف ان الدنيا غليت قال وماله..امي تشتغل في البيوت عشان نعوض الفرق
ولما بطل يدفع المية والكهربا قال مش مشكلة..امي تشتغل في البيوت اكتر شوية
ولما بطل يدفع الايجار نفسه قال خلاص ما امي بقت بتجيب فلوس من حتة تانية
صحيح فلوسنا هاتقل عن اللي محتاجينه
صحيح هانخرج من مدارسنا ونروح مدارس ارخص
صحيح هاناكل اقل من ما كنا بناكل
بس خلاص
هانعمل ايه يعني
وفضل كده لحد ما مات من الجوع
في الحقيقة
اخر واحد بس ماكانش حاسس ان المشكلة دي مشكلته
ولا الشقة دي شقته
ولا مطلوب منه حاجه عشان يحل الموضوع ده
اهدي هذه القصة لحزب الكنبة
نصحية اخيرة
لما تبقي كل يوم الصبح بتشرب شاي
وبعدين تجيلك فترة يجيلك فيها صداع نصفي
لازم تعمل حاجه غير اللي بتعملها كل يوم الصبح
ممكن تبطل تشرب شاي
او تشرب شاي وقهوة
او تشرب نسكافيه
اي حاجه غير اللي بتعمله طول عمرك
عشان المشكلة تتحل
ولما تبقي طول عمرك بتشتغل وبتلف عجلة الانتاج
ويجيلك اقتصاد واقع
لازم تعمل حاجه غير انك تشتغل وتلف عجلة الانتاج
ممكن انك تشتغل اكتر
تشتغل اقل
تشتغل وتذاكر
تشتغل شغلانة تانية
تعمل عصيان مدني
اي حاجه غير اللي بتعمله طول عمرك
بمجرد انك تحس ان البلد دي بلدك وانك مسؤول عن ازمة البوتجاز لمجرد انك ماعملتش حاجه تحل الازمة
ولما تحس بالاحساس ده فتبتدي تدور على حل فيه حاجه مختلفه عن اللي بتعمله طول عمرك
ساعتها هاتبقي انضميت للثورة
ليست هناك تعليقات:
إرسال تعليق