هالة غير مفيدة

اول امبارح مش عارف ليه قعدت قدام التلفزيون بتاع عشر دقايق

تقريبا كنت باكل

ولقيت التلفزيون مفتوح على المحور برنامج تسعين دقيقة

مش مهم انا مالي كلام فارغ وبعدين سمعت واحد بيكلمهم في التلفيون بيقول ما معناه ان هاله سرحان ماعهاش دكتوراه والنيابة وجهتلها تلات تهم امبارح

ايه ده هو في ايه؟

سالت

قالولي انها عملت حلقة عن فتيات الليل وكان مأجرة بنات تعمل نفسها فتيات ليل

المهم البنات تقريبا اهلهم عرفوهم من صوتهم فحصلهم مشاكل فقالو بقي انهم كانو واخدين فلوس

يابنت الذين

-خلفية تاريخية-

في يوم من الايام كنت ضمن الجماهير اللي في برامج هاله سرحان كان ساعتها على ما اذكر كانت بتعمل يا هلا وبرنامج تاني اسمه الليلة

كنت ماعرفش اساسا مين هاله سرحان دي كنت صغير بريء ماعرفش الحاجات الوحشة

المهم واحد صاحبي خدني معاه

كانو بياخدونا في باصات مخصوص تاخدنا وتجيبنا وبيدونا عصير سمعت بعد كده ان في ناس بتاخد فلوس

وبمنتى الصراحة انا اتعاملت مع الشباب اللي بيحضرو دول معامله مباشرة

منتهى الهيافة

نسيت اقول انهم واحنا ماشيين كانو بيحملونا باربع خمس اعداد على الاقل من مجلة سيداتي سادتي

مجلة في منتهى الهيافة

بس الانطباع العام اللي خدته في الاول ان هاله سرحان دي مهمة اوي

بتعمل برنامج مصروف عليه ده كله ورئيسة تحرير مجله

ومجلة الوان كمان مش ابيض واسود

يعني حاجه كبيرة

اول حلقة وتاني حلقة كانو عن التطبيع باسرائيل وكانت جايبة ناس محترمة الحقيقة

بصراحة عجبني الحوارده كلام كبير اوي اوي اوي ومهم بقيت اروح عشان انا ماعنديش دش اتابع فيه الكلام المحترم ده

تالت حلقة بقي كانت مفجأة

كانت عن التخسيس

مستضيفة واحد بتاع طب صيني وناس بتوع طب عادي جايباهم يهزقوا الراجل بتاع الطب الصيني

وبعدين بقي جايبة واحدة صاحبتها بجوزها وواحدة صاحبتها من غير جوزها

الزوج اللي موجود ده كان تخين جدا ومراته كمان كانت تخينة اوي بس كانت خاست ايام الحلقة جابولهم صورة زمان وهما الاتنين تخان والراجل يقول كانت عجلة والست تزغرله بالظبط زي الافلام العربي القديمة

ياديني

ده ايه الهبل ده

انا ماشي

ومشيت ومن ساعتها وانا مابطقش الست دي وكل ما اشوفلها برنامج بعد ما ربنا فتح علينا وجيبنا الدش - ماطيقهاش اكتر



نرجع بقي لموضوعنا

المهم اول امبارح في تسعين دقيقة كان في ضيوف طبعا بيغلطو هاله سرحان

بصراحه تغليطها مش محتاج ضيوف

لكن اللي خنقني بقي

مفيد فوزي لما اتصل

بالمناسبة الراجل ده برده انا مابطقيهوش

-ملحوظة على جنب-

مرة كان مفيد ده عامل حلقة عن المصرين في الخارج وكان مصور في الامارات باين المهم قابل واحد في مول اقل ما يقال عنه -ساعتها- انه انضف من انضف مول -دلوقتي

بعد الحوار

ساله هاترجع مصر؟؟؟وهز راسه لتحت كده يعني ايوة الراجل قاله لا

عاد عليه السؤال يعني بعد ما تعمل فلوسك هنا هاترجع بلدك مصر وقاله بهمس كانه بيأمره انه يقول طبعا

الصوت كان واضح ساعتها اللذيذ بقي ان الراجل برده قاله لا

فضل وراه لحد ما خلاه يقول هارجع بس مش قريب

نرجع لموضوعنا بقي

مفيد فوزي اتصل

وقعد يهزقهم ازاي يدبُحو في هاله بالمنظر ده والوسط بقي بيتصيد الاخطاء لبعضه

وان البنات اللي جم دول عملو كده بكامل ارادتهم ماحدش سقاهم حاجه اصفرة والمذيع والمذيع والضيوف يحاولو يردو عليه وهو رافض ويعقد يقولهم سيبوني اكمل كلامي

يا عم الحج انت مش محاور ازاي ترفض ان حد يحاورك

صحفي وبيمنعهم من الكلام

سبحان الله

للأسف كنت عايز اتصل بيهم ارد انا عليه بس ماكانوش كاتبين نمرة التليفون

ولذلك انا حاكتلكم كل الحكاية دي عشان ارد عليه هنا

مفيد يا فاوزي

الرجل العاقل يرد عليك ويقولك المشكلة مش في البنات عملو كده بمزاجهم ولا غصب عنهم المشكلة في ان الكلام اللي اتقال ده ماحصلش فعلا وان هاله بتشتغلنا

والرجل الوطني يرد عليك يقولك هالة سرحان تروج لشائعات او على الاقل( لا حقائق) تسئ لسمعة مصر

والرجل الشريف يرد عليك عيب لما تدخلو الحاجات دي بيتونا اساسا فما بالك بقي لما تكونو بتكدبو

والرجل الديوث يقولك مادام الحكاية كدب وتمثيل كنتو صورلنا بقي كانو بيعملو ايه في الليالي الحمرا يمكن الفيلم ده يضرب

والرجل الرجل يقول يا ولاد ال######

- تم التشفير عشان الانسات اللي بيدخلو -

والليمبي يقولك يلا ياه

وانا بقولك

####### #### ##### ###### ######### ######### ####### ######### #### ## ### ### ##### ## # ## # ##### ####### ####### #### ###### #### ### # #### ####### #### #### ###