كان نفسي

كان نفسي بعد الغيبة الطويلة اجي الاقي المدونة مليانة اسئلة عني

كان نفسي اعمل زي كل المدونين اللي بيغيبو فتره واقولكم

اعتذر عن الانقطاع ولكني كنت مريض او مسافر او بقص ضوافري

كان نفسي اجي بعد المدة دي بخبر يكسر الدنيا اكون من اهم اللي اتكلموا عليه ورأيي فيه يكون من اهم الاراء

مثلا اقولكم ان مجمع التحرير وقع وكان واحد صباعه اتكسر وكان واحد ضفره طار

كان نفسي حتى اجيبلكم خبر على سبيل الفانتازيا واقولكم ان الريس بنفسه نزل يطيب خاطر الواد الصغير اللي كان مربي ضفره وعز عليه اوي انه اتكسر في وقعان المجمع

بس للأسف سمعت -والله اعلم- ان المجمع هايأجروه مفروش

وهايشتريه حد يعمله فندق

كان نفسي في حاجات كتير

كان نفسي افرح لما عدد زوار مدونتي جاب اول الف

بس للأسف انا عامل نصهم على الاقل لاني اكتر واحد بيدخلها

السر في اني كنت منقطع الفتره اللي فاتت- ان كنتوا خدتو بالكم يعني- اني ببساطة

ماكنش عندي حاجه اقولها

مش ماكنتش في المود

لا

كان نفسي اكتب

بس ماكنتش لاقي حاجه اكتبها

مش معنى كده اني كنت ميت الفترة اللي فاتت

لا

كنت عايش وبتحرك بس في حاجات ما تتكتبش

حاجات خاصة زي مثلا رحت الشغل جيت من الشغل قابلت في الشغل حصل في الشغل

ممكن تشيلو كلمة شغل وتحطو مكانها اي حاجه تخصني لوحدي

البيت

الحمام

عند خالتي

وفي حاجات ماتتكتبش عشان هايفة ماتستحقش انكم تقروها

مثلا حلقت دقني

جبت شراب

قعدت على القهوة

الخلاصة

اني الفترة اللي فاتت كنت واحد من خمسة وسبعين مليون

فماحبتش اكون مصدر للمل

طيب رجعت تاني ليه؟؟؟

شايف السؤال في عين واحد فيكم مش طايقني

بس كتر خيره انه دخل اساسا

رجعت لاني لقيت حاجه تستاهل اني اقولكم عليها

لقيت كتاب

لقيته من عند واحد صاحبي

بصراحة

عنوانه ماشدنيش

اسمه لا تحزن

اكيد كتاب من الكتب اللي بيقولوا فيها بكره اجمل من النهارده

والدنيا ربيع والجو بديع

والكلام ده كله

كتاب فيه كلام فارغ

بالرغم من انه كتاب قديم نوعا

يعني الكتاب ده موجود في السوق من زمان

بس ماشدنيش

كان صاحبي ده قراه

وقالي انه كتاب رائع

يا راجل؟؟؟؟؟

طيب هاته كده

قريت مقدمة الطبعة التانية ومقدمة الطبعة الاولى وقلتله انا هاخده اقراه في بيتنا

واضح ان الكتاب مش بيهزر

وقريت فيه

ساعتها ابتديت احس اني واحد بس مش من خمسة وسبعين مليون

ابتدى العدد يقل

يقل

يقل

والابتسامة على وشي تزيد

تزيد

تزيد

قلت اجي اديكم خبر عن الكتاب

الكتاب عبارة عن مجموعة مقالات صغيرة

هانقلكم منها اكثرها تأثيرا فيا

طبعا مع ذكر المصدر الرئيسي وهو الشيخ عائض القرني

ومع ذكر المصدر الثانوي وهو الموقع اللي هاخد منه المقالات كنسخة الكترونية

بقي ان اهدي هذا العمل -ان كان هذا الانتقاء للمقالات عملا- لشخص ما

اهدي هذه المقالات الرائعة لمن طلبت منه قراءة الكتاب ورفض

عز علي رفضك

ولكن لمعزتك في قلبي

سانشره لك

عله يغير في تفكيرك شيئا ما