النهاردة تلاتة وعشرين يناير الفين واتناشر الساعة سبعة مساء تقريبا
يوم اول اجتمال لاول مجلس شعب بعد الثورة
والسطر اللي فات ده مالوش علاقة بالشهادة اللي جاية دي غير اني اعرف اليوم كويس
وانا جاي بالعربية من عبود ورايح المظلات على الكورنيش
في حتة ضلمة عند مطلع كوبري
وعلى بعد حوالي مية متر قدامي لقيت عربية -من اضاءتها بس شفتها-بتتصرف بشكل غريب
كان حد بيدوس عليها عشان يجرب المساعدين
الكشافات الواطية بتاعتها بتطلع وبتنزل بس بشكل مبالغ فيه
كانها بتاخد مطب بسرعة او ماشية فوق حجر
لما قربت شوية لقيت انها عربية بيضا بس ماخدتش بالي من الموديل
هو للتقريب فقط
عربية سيدان جديدة نوعا
ممكن تكون لانسر او ابترا او حاجه شبه كده بس مش متأكد
العربية دي بعد التصرف الغريب ده لقيتها بتلف وتمشي عكس
الحكاية دي خدت حوالي من سبع لعشر ثواني تقريبا
كنت قربت اكتر وبقت المسافة بيني وبينها حوالي اربعين خمسين متر
ولقيت ان في عربيتين ...لونهم مش باين في الضلمة بس هو لو غامق وهي عربيات تشبه اوي عربيات الاتاري الاتش باك بتاعة الشرطة
من مكان وقفتهم ممكن استنتج ان العربية البيضا ساعة التصرفات الغريبة كانت واقفه عندهم تقريبا
وبما انها لفت ومشيت عكس عشان بتهرب منهم-زي مابان بعد ثواني- يبقي كانت واقفه قبلهم مش بعدهم
الامنا او عناصر الشرطة اللي كانوا واقفين جنب العربيتين الاتاري
واقفين بره العربيات ساعة مانا وصلت لمسافة اقدر اشوفهم منها
وقفوا مدهوشين حوالي ثانيتين تلاتة تقريبا
وبعدين سمعت صوت طلق بس انا كنت قافل الازاز فماسمعتوش كويس او صوته كان ضعيف مايوحيش بطلق حي
بصراحة ماجربتش اسمع طلق حي وانا قافل ازاز العربية قبل كده عشان اعرف درجة العزل
عموما هو كان صوت طلقة واحده
وبعدين ركبوا العربيات وشغلوا السارينة وانطلقوا ورا العربية البيضة
دي شهادتي اللي شفتها النهارده
ليست هناك تعليقات:
إرسال تعليق