التاريخ
الواحده صباح الاثنين
المكان غرفتي
الحاله زهقان مش عارف ليه
احاول مرارا وتكرارا اني افهملي كلمتين في الماده اللي هامتحنها ومافيش فايده
والحجه هي حجه اي وغد يكره المذاكره
اصلي لامم الماده
ولكن كل مامسك فيها صفحه احس اني كنت مش فاهم حاجه قبل مامسكها
وبرده بعد مامسكتها
وشكلي هافضل على الحال ده لحد الامتحان نفسه كل شوية اقول اصلي لامم الماده
بعض الزملاء اقترحوا -بل الحوا- عليا اني اروح اذاكر معاهم
طبعا مش عشان عبقريتي-على الاقل في الماده دي- لكن عشان
القعده الحلوة ماتتعوضش
او "قعدتنا مع بعض بتوسع الافق"
او "عشان كل واحد يقول اللي عنده"
من الاخر جمعية
وانا ارفض الذهاب
والحجه
حجه اي وغد
اصلي شايف الماده مش مستاهله
مش عارف ليه افتكرت دلوقتي حكاية الارنب اللي دخل سباق مع السحلفة(السلحفاء لانصار الفصحى)الحكاية اللي عمر جدتي ماحكتهالي
صحيح
هي ماحكتهاليش ليه؟
اكيد عشان كنت صغير
لالا افتكرت
اصل جدتي ماتت قبل ماتولد اساسا
وجدتي التانية كانت عيانه قوي قوي وانا مولود
الله يرحمهم ويرحم ابي ويرحم موتانا وموتى المسلمين
لكن ايه الصوت ده
اه ده حد من الجيران الظراف اللطاف الخفاف مشغل التلفزيون ومعليه
هو مايعرفش ان في ناس بتذاكر ولا ايه
ايه؟
مالكم بتبصولي كده ليه؟
قصدي يعني مايعرفش ان في ناس المفروض تذاكر
واقعد اكدب قصدي اكتب الكلمتين دولمافيش فايده لسه زهقان
طيب اذاكر ماده تانية؟
يبقي عيب حتى
اولع سيجارة اقعد وارجع راسي لورا واتخيل نفسي بعد مالنتيجه تطلع
وانجح ان شاء الله
واعمل حفله للتخرج
واجيب كوووووووووووووووول الزملاء الاعزاء اللي كانوا معايا في مشروع التخرج
واقعدهم في دايرةواجيب كل الشباب-مفتولي العضلات- اللي في العيله
واقعدهم في دايرة حواليهم-حماية يعني-واقف في وسطيهم واقول لكل واحد فيهم رايي فيه بكل صراحه
وبعد المعركه
اقطع كل صلتي بالكليه وبالتعليم وبكل حاجه
الغريب اني كل ما قابل حد يقولي بس خلص انت واديني ميسد
وانت تشتغل تاني يوم
انت عندك جيش؟
اقوله ماظنش
يقول خلاص تبقي سهله
امال ياعم الناس اللي قاعده على القهاوي دي عندها جيش؟
المشكله ان عدد العروض دي كتر لدرجه اني مابقتش مقتنع
يعني حتى لو العروض دي حقيقية-مش مجاملات فارغه-الواحد هايقعد سنه عشان يحدد الشغلانه اللي هايشتغلها انهي في كل دول
يعني هاقعد عاطل
ومش هاحلها لوحدي طبعااكيد الشغلانات هاتروح مني واحده ورا التانيه لحد ماتفضل واحده بس
بس عالله الحقها
هما الجيران دول مش هايطفوا التلفزيون ولا ايه
عموما تحديد المستقبل ده حاجه مش هينه الحقيقه
ده حتى موضوع الجواز
امي عاملالي ليسته
واختى عاملالي لسته
ولسه بقية الليست مااعلنتش عن نفسها
والمفروض اني هاختار-هي نتيجه الاستفتا طلعت كام؟؟-ولما امي تقعد مع اختى يقعدوا يتناقشوا في الموضوع ده
ونظام بقي لازم واحده تقنع التانية
وكل واحده منهم تحاول تستقطبني لناحيتها
ياخونا انا مش هاتنيل اتجوز دلوقتي
دانا على ماتجوز تكون كل الليست دي بتلعن الجواز والخلفه
يقولولي بس خلص انت ومالكش دعوة
اقولهم
ماظنش ان ليا جيش
مش فاهم انا ايه المشكله في الجيش
يعني لو الجيش ميري وسلاح وطوابير وانتظام والله يبقي حاجه كويسة
لكن لو الجيش سواقه ومجايب طلبات للمدام واجيب الاولاد من النادي
تبقي مش جيش الحقيقه
وبعدين لو هايستافدوا من تخصصي في الجيش مافيش مشكله
لكن لو يشغلوا بتاع كهربا في الحسابات يبقي مش نظام الحقيقه
بالمناسبة نظام يعني سيستم بالانجليزي
اكتبوها يمكن تنفعكواهي تبقي جينرال نولدج
على راي فؤاد المهندس
الا هو محمود الجندي كان عايز-في المسرحية- يسافر اوربا
والله فكره
بس الغريب انه فكر في اوربا ومافكرش في امريكا
ولا امريكا ماكانتش ظهرت على ايامهم
تلاقيها جديده في الشغله
و عموما كل واحد جديد في اي (كار) بيبقي غشيم حبتين
ياه دي الساعه بقت واحده وتلتت
فتكروا هالحق اوربا
ولا هاتكون امريكا بقت رئيس مجلس ادارة
الا هو ايه الفرق بين هنا وهناك
مانا لو مالاقتش شغل هنا مش هالاقي هناك
ده انا حتى هابقي مواطن دارجه عاشرة
لا ياخونا برده عاطل هنا غير عاطل هناك
ده القهاوي هناك ترد الروح
كفاية انك تقعد على القهوة تلاقي القهوجي جايلك على طول
مش زي هنا اطلطع نص ساعة لحد ما المعلم ياسر يعبرني
بالمناسبة كل القهوجية اسمهم يا ياسر يا عماد يا صلاح مش عارف ده سيم زي ماكل السواقين اسمهم اشرف
ولا الطبقه الاجتماعية اللي بيطلع ولادها قهوجية بيسموا الاسامي دي غالبا
انا في اعدادي
كان معايا ولد في الفصل اسمه صلاح
كنت لما اتفرج على فيلم صلاح الدين افتكر صلاح زميلي دهواقول لنفسي صلاح ده اسم انتهت صلاحيته خلااااااااااص
اصل احنا عندنا في مصر الاسامي بتنتهي صلاحيتها زي مالفراخ بتنتهي صلاحيتها زي الدوا زي المية زي برامج التلفزيون زي الاخلاق زي الطبقات الاجتماعية
مافيش حاجه دلوقي اسمها طبقه متوسطه-والعهده على المحللين السياسين-ماحدش بقي بيحلم يلاقي اوتوبيس فاضي
كل بيحلم يركب عربية
وعربية اخر موديل
لان التمانية وعشرين بطلت خلاص
والاوتبيسات بقى حلم الكرسي الفاضي فيها درب من الخيال
مرة شفت في رمسيس قدام عماره النهضه
اوتوبيس كان الناس بتركبه من الشبابيك
اي والله
بينطوا من الشبابيك عشان يدخلوا الاوتوبيس
لان كل الاماكن المتاحه للقعاد والوقوف-متاحه عقليا طبعا بل ومتاحه مع بعض الخيال والمجاذفه-كانت اتملت
مافضلش مكان فاضي غير فوق دماغ الناس اللي قاعدين
وده كان المكان الوحيد اللي بيمد الاوتوبيس بالهواواهو اتملاطيب ده كان اوتوبيس من ابو ربع جنية
حتى الاوتوبيس ابو جنية -اللي له بديل بربع- بشوف فيه ناس واقفه على السلم
معقوله الناس كلها بقى عندها استعداد تدفع جنية في مواصله ليها بديل
ويقولك الشعب مش لاقي ياكل
لو مش لاقي ياكل كان ركب الاوتوبيس ابو ربع
ايه؟
ماهو ابو ربع مابيجيش.؟
يعني هايكون قاصدها يعني اكيد مشغول حبتين اول مايفضى-من مشغولياته مش من ركابه- هايجي على طول
وبعدين بلاش
يركبوا الميكروباص ابو نص جنيةايه؟
الميكروباصات غليت
بقت بخمسه وسبعين؟
لالا دي بقت بستين بس
بتقول ايه؟
يبقالي عشان مافيش فكه
طيب ياسيدي
وبعدين العمر واحد والرب واحد
مايركبوش ميكروباصات ليه انا عايز افهم
بلاش ده كله
يركبوا المترو
واهو حتى لا يلوص البيئه
صحيح السواق بيدوس فيه فرامل اكتر ما بيدوس بنزين
بس ده راجع لان المترو بيمشي بالكهربا يعني مافيهوش بنزين اساسا
صحيح انتوا شعب عير واعي سياسيا
الساعة بقت واحده ونص وخمسه
هاركب ايه طيب؟
يوووووووه قصدي هاعمل ايه؟
اذاكر ولا انا لامم الماده؟
اروح بكره ولا الماده ماتستهلش؟
اشرب سيجارة تانية ولا ابطل تدخين؟
اشتغل انهي شغلانه؟
ياترى ليه جدتي ماحتكتليش قصه الارنب والسحلفه(سلحفاء لانصار الفصحى)؟؟؟؟
طيب اذا كانت جدتي ماحكتهاليش
امال مين اللي حكاهالي؟
وحكهالي ليه؟؟؟
كان عايزني اقعد اجري اجري اجري ورا الاوتوبيس؟؟؟
طيب اتوبيس من ابو كام؟
الا صحيح اوتوبيس كام بيروح اوربا؟؟؟
وبيروح فين في اوربا؟
انا ماروحش غير فرنسا او المانياليه؟؟
طبعا عشان عندهم لحم مدبوح على الشريعه؟
انا ملتزم على فكره
وكمان -خصوصا فرنسا- عندهم لحم مش مدبوح خالص قصدي يعني مش مدبوح على الشريعه ماتفهمونيش غلط
لكن انا لسه ماحدش جاوبني على اسئلتي
هو صحيح الساعة كام دلوقتي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ملحوظة: رحت تاني يوم اذاكر مع اصحابي وللعجب انا الوحيد فيهم اللي نجحت في الماده دي كلهم شالوها دور تاني بس الحمد لله نجحوا فيها
ليست هناك تعليقات:
إرسال تعليق