يعني ايه بي ال سي؟؟؟؟؟ يمكن بامية لوبيا كوسه؟؟؟؟

إهداء : الى استاذي العزيز د/ محمد مصطفى

سلام عليكم

النهارده احنا بصدد التكلم عن

ولا بلاش الكلام التقيل ده

احنا النهارده هانحكي حكاية البي ال سي

وهو زي ما وضحنا فوق بامية لوبيا كوسه

يعني ايه

هانقول في الاخرلكن تعالو نفرض مثلا ان عند حد مننا ورشه صغيرة

او حتى في نظام بيته العادي

لو انا عايز اعمل لمبه(مصباح كهربي ) في اوضه(حجرة) معينه

اللمبة بتتوصل ازاي؟

اللمبة تركب في الدواية والدوايه فيها سلكتين السلكتين في الكهربا مكان الفيشه

اللمبة تنوريعني نقدر نقول ان اللمبة سلكتين في دواية

طيب بالشكل ده عشان اتحكم في اللمبة اعمل ايه

اشيل السلكتين من الفيشه اللمبة تطفي احطهم اللمبة تنور

بس ده مش حل

مين يا شطار يقول حل

ايوة القصير اللي هناك

برافونعمل مفتاح

ونحطه في النص بين اللمبة والفيشه

ويبقي بالمفتاح(زرار او سويتش) ده ممكن نشغل اللمبة ونطفيها

طيب ده حل ممتاز وعلى فكره الحل ده مستخدم منذ الاف السنين

دي مش مشكلتنا وانا هنا مش عشان اشرح سلزسيون(توصيل كهربة المنازل)

انا هنا عشان اتكلم عن البي ال سي

تعالوا بقي نفكر في حاجه تانية

نفس اللمبة دي انا عايزها تنور بس من مكانين مختلفين

يعني ايه؟

يعني مثلا عندي اللمبة دي هاتنور ممر والممر ده طويل نوعا ما

فعايز مثلا وانا داخل من اول الممر ادوس على زرار ينور اللمبة

ولما اوصل اخر الممر ادوس على زرار يطفي اللمبة

وبعدين وانا راجع من اخر الممر ادوس على نفس الزرار اللي طفا اللمبة من شوية اخليه ينورها

وفي اول الممر ادوس على نفس الزرار اللي نور اللمبة وانا داخل اخليه يطفيها وانا خارج

فيلم كبير حبتين

بس بيتعمل وبسهوله جدا على فكره

ازاي مش مشكلتنا دلوقتي

بس اكيد السيستم(النظام) بتاع السلكتين اللي في الدواية وفيهم لمبة وزرار ماينفعنيش

يبقي هافور(اشيل) النظام ده كله واعمل نظام جديد على نفس اللمبة

واحد يقولي ماتجيب لمبة تانية وتريح دماغك

اقوله افرض ان اللمبة دي مش لمبة مثلا ماكينة في مصنع

او حتى لمبة بس غالية حبتين

المهم هاغير النظام واجيب نظام فيه زرارين ينفعوا للحالة بتاعتي واسلاك وكلام من ده

طيب تعالوا نغير الطلب

يعني عايز اللمبة ماتنورش غير لما انا ادوس على زار وواحد تاني يدوس على زرار تانيي

عني احنا الاتنين نكون عايزين اللمبة تنوربايخ حبتين النظام ده

تعالوا اضربلكم مثل تاني عشان نفهمة

فرضا ان اللمبة دي مقص كهربا(ماكينة وظيفتها انها تقص اسياخ الحديد)

ودي طبعا ماكينه من الحده ان لو في دراع بني ادم تحتها ممكن تشيله من غير ما يحس ولا ياخد باله وممكن يروح وهو مش عارف اساسا

انا عايز احمي العامل اللي عليها

يعني مايبقاش ساند على الماكنه بالغلط ويدوس على الزرار ودراعه تحت المقص بتاعها(في عمال حمير وماعندهمش اي سينس خالص)

اقوم اعمل ايه

اقوم اعمل الماكنه دي ماتشتغلش غير بزرارين بعيد عن بعض

بحيث ان العامل عشان يشغل الماكنه لازم يكون دايس على الزرارين مع بعض

واحط الزرارين دول في مكانين بعيد عن سن الماكنه عشان ابقي ضامن ان ايد الراجل ما تتقطعش

فاهاعمل ايه

اكيد نظام غير النظامين اللي فاتوا

طيب تعالوا نتخيل اني دايما دايما بغير نظامي باستمرارليه؟

هو ايه اللي ليه

افرضوا مثلا اني مصنع شبسي مش كل فترة بحب اغير الغلاف بتاعي والغلاف ده مش بيطبع ببمكن

علمت حجم جديد في مصنع البان(كليوا الا ربع مثلا)

او مصنع سمنه(من اللي مغرقين البلد) عامل عرض اللي هو عشرة في المية زياده مثلا

مش هاغير نظام المكن

المكنه اللي بتعمل العلبة بتاعة السمنه هاتغير مقاساتها

المكنه اللي بتصب السمنه في العلبه هاتغير الكمية

كل دي تغيرات

اكبر مثل واوضح مثل للموضوع ده

مصانع العربيات

لانها بتغير موديلاتها كل اربع خمس سنين بالكتير

وعلى فكره اصل ظهور البي ال سي هو مصنع فورد عشان السبب ده بالذات

بس انا لسه ماتكلمتش وقلت يعني ايه بي ال سي

خلونا في موضوعنا

انا قلت اني ممكن اغير النظام بتاعي كل فترهيبقي ايه الحل

ايوة الاخ اللي بياكل ورا ده

بالظبط

اجيب صندوق كبير قوي واحط فيه شوية زراير واسلاك ومكونات كهربية من اللي بحتاجها في التوصيل بتاع النظام

وكل ما احب اغير النظام اجيب حاجاتي اللي انا عايزها من الصندوق واحط الحاجات القديمة فيه تاني يمكن احتجلها لما اغير النظام تاني

صح كدا

تمام

ركزوا بقي معايا في الحته اللي جاية دي عشان مهمة قوي وتقيله حبتينحد فيكم سمه عن الاي سيهات

IC الدوائر المتكاملة

اللي مايعرفش دي عبارة عن ايه

اقوله لو مسكت اي لوحه بتاعة جهاز الكتروني

هاتلاقي مستطيل اسود كدا ليه رجول غريبه مخلياه عامل زي العنكبوت ولا الصرصار

دي بقي الدوائر المتكامله(معلومة تحرق دم الاخوات يستخدم في صناعة تلك الايسيهات الذهب وهناك طرق

معروفه لاستخلاص الذهب منها يعني ممكن تروحي لاي بتاع روبابيكيا تشتريهم منه بالكيلوا وتقعدي تطلعي منهم ذهب)

المهم خلينا في موضوعنا

الايسيهات دي بتعمل ايه في الدنيا

الاي سيهات دي بتعمل حاجات كتير قوي

بس اللي يخصنا في الموضوع هنا هو عيله اربعه وسبعين

يعني اي ايسي يبتدي برقم اربعه وسبعين

7401

7402

7403

7404

الخ الخ الخ

طبعا كل واحد منهم ليه شغلانه بس العيله تبع عيلة اربعه وسبعين

طبعا في عيلات تانية

ممكن تكون بتعمل وظائف مشابهه بس دي اكثر العائلات شهرة في المجال ده

ايه بقي العيله دي

احنا لازم نتفق على شوية حاجات

فاكرين الماكنه بتاعة المقص؟؟؟

دي كان الشرط بتاعنا ايه ؟؟؟

كان الشرط يا الزرارين شغالين يا بلاشالشرط ده في الكهربا اسمه

AND

في شرط تاني ممكن

نسمية (الموجود يسد)

يعني اي زرار من الاتنين يشغل الماكنه

(طبعا ده تطبيق تاني مثلا النور اللي في سلم العمارة)الشرط ده في الكهربا اسمه

OR

وفي شرط تاني

ممكن نسمية خالف تعرف

يعني ايه

يعني يديني عكس اللي موجود

ازاي

يعني لو انا دايس على الزرار اللمبة ماتنورش ولو شلت ايدي من على الزرار اللمبة تنور

واحد يقولي اديني مثل

حد شاف زرار التلاجه

زرار كدا الباب بتاع التلاجه لما يقفل بيدوس عليه

اول ما يدوس عليه لمبة التلاجه تنطفي

لكن اول ما يسيبه اللمبة تنورده بالظبط تطبيق مباشر للشرط دهالشرط ده ممكن نسمية في الكهربا

NOT

دي الشروط الاساسية

ممكن نشكل منها اي تشكيلة انا عايزها

المهم

نرجع لموضوع الايسيهات

كل اي سي من دول بيبقي في جيت (او بوابه ) من دول

ممكن انا اعمل ايه اوفر الاسلاك الكتير قوي واحط في الصندوق بتاعي شوية ايسيهات من دي

واوصل بينها

ويبقي الصندوق اصغر ومادام الحاجه اصغر يبقي توصيلاتها اقل ونقلها اسهل

تمام لحد هنا وبرده كل ماحتاج حاجه من الصندوق هاخدها وارجع القديم في الصندوق يمكن احتاجه بعد كدا

جه شوية علماء بقي وقالك طيب مانا اعملك حاجه ظريفه

بدل ما تقعد تلحم وتفك واسلاك وشوية توصيلات مقرفه (مع انها قليله) مانا احطلك الايسيهات دي في الصندوق بترتيب معينواطلعلك من الصندوق شوية نقط توصيل(اماكن تركب فيها سلك) حبه منهم يبقوا دخل للصندوق وشوية يبقوا خرج للصندوق

وانت تعمل برنامج معين تقول فيه انك عايز الخرج الفلاني ما يشتغلش غير لما الدخل الفلاني يشتغل

او تحط في البرنامج بتاعك اي شروط

وبناء على الشروط دي ممكن تعمل اي نظام انت عايزة وتوفر حاجات كتير جدا مكونات

تعقيد في التوصيل

امكانية التجربة للبرنامج عل يكون فيه حاجه غلط انت مش واخد بالك منها سهوله التعديل

ومش هايكلفك حاجه

ده برنامج

تقدر تسيف البرامج بتاعتك على ديسكات بحيث تحط اي برنامج في اي وقت

حاجات كتير قوي

يعني زي ما يكون عندك طباخ في البيت وانت تقوله اعملي النهارده بامية يعملها

او اعملي لوبيا يعملها

او اعملي كوسه يعملها

وهو هو نفس الطباخ

ونسمي الطباخ ده

PROGRAMMABLE LOGIC CONTROL

يعني بي ال سي

وتوته توته فرغت الحدوته

بقي بس اني اقولكم ان اغلب الصناعات دلوقتي شغاله بالبتاع ده

بس بتفرق في الماركه والامكانيات وعدد الدخل والخرج الليي ممكن استخدمه

مستني اي تساؤلات